Agbamịẹ Apụ 4
4
Nemika Ḅụ Mịẹirima Agba Ma
1Nyanaḅọ Ḅe tọn Moziz ḅe pịrịmẹ 2ḍuko Izrẹlapụma pịrị na nemika ḅaraḅụ simịẹ se Nyanaḅọ Ḅe chụa olokoma kan ḅọ goyegoye nụḅọ ma olokoma koko ḅịa.
3Nemikase Gele Agbamịẹḅọ ḅe si mị mịẹmẹ se ḅẹrẹ ḅarasi ọkịḅo tomonima ọgọnọ gbanamẹ ḅẹḅẹ, ḅẹḅẹye ḅụ oforika gbọrị ayamburama owoi nambulo ọ̀ nwọse ḅo agbamịẹ Nyanaḅọ Ḅe pịrịḅịa, ọ̀ mịẹ si mị gose. 4Ori owoi nambulo ḅe se Ikowarị mị ḅọkọ ḅo seni ọ̀ ḅarama se nama ḅe tịḅị ọgọnọ gbana se ọ̀ ḅaaḅịa Nyanaḅọ Ḅe tọrụkuḅu. 5Anịsịkị Gele Agbamịẹḅọ ḅe ori owoi nambulo ḅe oju pulo mị ḅụ ye ọkị se anị se Ikowarị mị ḅie sọmunḅịa. 6Ori ọ̀ ḅaratụmgbalị se nama ḅe oju pulo mị ḅie su se anị se sọnọma sịkị se osiḅụ sime nyọ mị kikima ḅịtẹ mị tọrọkọ ḅụ sanaḅịa. 7Anịsịkị ọ̀ pịkị nama ḅe oju pulo mị ḅụ ye ọkị se insẹnsị dọkịma ẹbẹ mị ḅụ ịkọlị ma ḅe ịvalị ma ọgọnọ ḅụ saraḅịa Ikowarị mị ḅie ḅụ. Kirikọn nama oju pulo mị ọ̀ nwọse agbamịẹ aye dọkịma ẹbẹ mị chuku ḅụ sara, anị Ikowarị mị ḅọkọ ḅụ simeye mị. 8Ḅe owoi nambulo ḅe ḅụ ḅẹlẹkị mị mgba ọ̀ nwọ ọkịḅịa, ḅụlọ ḅie ayema ḅụ ḅẹlẹkị mị na, 9nịna akpa ma na pịkị arịa ọgọnọ sime ḅẹlẹkị mị na, pịkị iḅi paranga mị na. 10Agbamịẹḅọ ḅe mị ḅẹlẹkị mị se dọkịma agbamịẹ ẹbẹ mị ọgọnọ ḅụ dọkịmaḅịa, anị ini ḅaa seni gboloma agba mị mịẹḅịa nama ḅe ḅẹlẹkị mị ọ̀ nwọ mịẹ ọkụ mị. 11Ọkụma nama ḅe oju apụra mị na, oju mịnị mị mgba na, tịḅị mị na, ḅụọma na, ḅụlọ ḅie ayema na, pịkị ịla ma na, 12ini pike sime anga mị ḅụ ori àrị deki pakaso mun ḅụmịẹfịafịama anga, anị fọn sara nyọ mị ḅụ, fịnị seni àrị dọkịmaḅịa.
13Nemikase bebe Izrẹl sẹ mị mgba nemika ḅaraḅụ simịẹ se Nyanaḅọ Ḅe chụa koroma olokoma ḅụ gbọrịye kanmẹ ḅẹḅẹ, 14anịsịkị ini mịẹ si mị ini nwọ nemi ḅo gbọrị kirikiri, sẹ mị gbọrị ayamburama owoi nambulo ọkịḅo seni simịẹ agba nwọ mịẹḅịa. Ini ori ọkị se Nyanaḅọ Ḅe pakaḅoḅo Ikowarị mị nwọ munḅịa; 15ama mị ḅie tịḅịdapụ ma inia ḅarama seni ọ̀ tịḅị ọgọnọ gbana, se anị anga ḅụ ọ̀ ḅaaḅịa. 16Gele Agbamịẹḅọ ḅe owoi nambulo ḅe oju pulo mị ḅụ ye ọkị se Ikowarị mị ḅie sọmunḅịa, 17se ọ̀ ḅaratụmgbalị se ḅie chu se anị seni sọnọma sịkị se nyọ kikima ḅịtẹ mị tọrọkọ ḅụ sanaḅịa. 18Pịkị nama ḅe oju pulo mị ḅụ ye ọkị se insẹnsị dọkịma ẹbẹ mị ịkọlị ma ḅụ ịvalị ma ọgọnọ ḅụ saraḅịa Ikowarị mị ḅie ḅụ, kirikọn nama oju pulo mị ọ̀ nwọse agbamịẹ aye dọkịma ẹbẹ mị chuku ḅụ saraḅịa, anị Ikowarị mị ḅọkọ ḅụ simeye mị. 19Anịsịkị oria ḅẹlẹkị mamgba ọ̀ nwọ ọkị seni agbamịẹ ẹbẹ mị ọgọnọ ḅụ dọkịmaḅịa. 20Ò seni si mịẹye agba mịẹ owoi nambulo ḅe mịẹ ọkụ, anị ḅe wu ḅe ḅụ sọnị ọ̀ pịkị mịẹḅịa ọkụ mị-ẹ, mịn ḅara mị ḅụ anị ò se tomonima inia si mịẹye agba mị mịẹḅịa ọkụ-ẹ, se ini si ḅụḅarasin ini pịrịḅịa. 21Anịsịkị ori owoi nambulo ḅe ọkị ini pike sime nyọ mị ḅụ paka mun ọ̀ dọkịmaḅịa, anị oria sima gose ọ̀ dọkịma owoi nambulo ḅe ọ̀ nwọ mịẹ ọkụ mị. Mịn anị se ama mị si mị dekisinḅịa agba mị-ẹ.
22Nemikase ḅẹrẹtọnḅọ nemika ḅaraḅụ simịẹ se Nyanaḅọ Ḅe chụa koroma olokoma ḅụ gbọrịye kanmẹ ḅẹḅẹ, 23ini ọ̀ mịẹ si mị se ò ḍie gbọrị kirikiri, gbọrị ẹkpẹịn ọ̀ nwọse ḅo oria agbamịẹḅịa anị ḅẹḅẹye ḅụ oforika wu. 24Ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa agbamịẹ ẹbẹ mị ḅụ ọgọnọju daọrụ mị ḅụ, anị ini se dọkịma agbamịẹḅịa namama ini nwọ ḅaaḅaa nyọ mị. Mịn anị se si dekisinḅịa agba mị-ẹ. 25Agbamịẹḅọ ḅe ọ̀ ḅaratụmgbalị se nama oju pulo mị ḅie chu se, anị se agbamịẹ ẹbẹ mị ịkọlị ma ḅụ ịvalị ma ọgọnọ ḅụ saraḅịa se kirikọnye mị seni agbamịẹ ẹbẹ mị chuku ḅụ saraḅịa. 26Anịsịkị anịa ḅẹlẹkị mị mgba ọ̀ nwọ dọkịmaḅịa agbamịẹ ẹbẹ mị ọgọnọ ḅụ, anị se gboloma agbamịẹḅịa namama ḅẹlẹkị ma ọ̀ nwọ dọkịma ọkụ mị. Mịn ḅara anị agbamịẹḅọ ḅe ḅẹrẹtọnḅọ ḅe mịẹ si mị gose agba mị mịẹḅịa ọkụ-ẹ, ini pịkị si ḅụḅarasin ọ̀ pịrịḅịa.
27Nemikase papa apụma ḅie gbọrịḅọ nemika ḅaraḅụ simịẹ se Nyanaḅọ Ḅe chụa koroma olokoma ḅụ gbọrịye kanmẹ ḅẹḅẹ, 28ini ọ̀ mịẹ si mị se ò ḍie gbọrị kirikiri, gbọrị ịrọrọ oḅori ọ̀ nwọse ḅo oria agbamịẹḅịa, anị ḅẹḅẹye ḅụ oforika wu. 29Ori ọ̀ ḅara se nama ḅe tịḅị ọgọnọ gbana se ọ̀ ḅaaḅịa agbamịẹ ẹbẹ mị ḅụ ọgọnọju daọrụ mị ḅụ, anị ini se dọkịma agbamịẹḅịa namama ini nwọ ḅaaḅaa nyọ mị. 30Agbamịẹḅọ ḅe ọ̀ ḅaratụmgbalị se nama ḅe oju pulo mị ḅie chu se, anị se agbamịẹ ẹbẹ mị ịkọlị ma ḅụ ịvalị ma ḅie saraḅịa, se kirikọnye mị seni agbamịẹ ẹbẹ mị chuku ḅụ saraḅịa. 31Anịsịkị ori ọ̀ ḅụ ḅẹlẹkị ma mgba nwọ sinḅịa, anị ḅaa seni gboloma agbamịẹḅịa namama ḅụ ḅẹlẹkị sin ọkụ mị, se anị seni agbamịẹ ẹbẹ mị ọgọnọ ḅụ dọkịmaḅịa, anịa kụnụ Nyanaḅọ Ḅe ḅụḅẹlẹḅẹlẹye mị. Mịn agbamịẹḅọ ḅe agba mị mịẹḅịa ọkụ-ẹ, se ini si ḅụ ḅarasin tomoniḅọ ḅe pịrịḅịa.
32Tomoniḅọ nemikase anana se ḅo simịẹ agbamịẹ-ẹḅomẹ ḅẹḅẹ, ḅẹḅẹye ḅụ oforika ịrọrọ mị nụḅọ se ḅoḅịaye-ẹ. 33Ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa agbamịẹ ẹbẹ mị ḅụ ọgọnọju daọrụ mị ḅụ, anị ini se dọkịma agbamịẹḅịa namama ini nwọ ḅaaḅaa nyọ mị. 34Agbamịẹḅọ ḅe ọ̀ ḅaratụmgbalị se nama ḅe oju pulo mị ḅie chu se, anị se agbamịẹ ẹbẹ mị ịkọlị ma ḅụ ịvalị ma ḅie ḅụ saraḅịa, se kirikọnye mị seni agbamịẹ ẹbẹ mị chuku ḅụ saraḅịa. 35Anịsịkị ori ọ̀ ḅụ sime ḅẹlẹkị mamgba nwọ sinḅịa, anị ḅaa seni gboloma agbamịẹ ananama ḅụ ḅẹlẹkị sin ọkụ mị, se ori anị se chụa ini seni fịye agba mịẹ Nyanaḅọ Ḅe pịrịpịrị ẹbẹ mị ọgọnọ anị dọkịmaḅịa. Mịn agbamịẹḅọ ḅe se agba mị mịẹḅịa ọkụ mị-ẹ, tomoniḅọ ḅe mịẹ si mị gose, se ini si ḅụ ḅarasin ọ̀ pịrịḅịa.
Currently Selected:
Agbamịẹ Apụ 4: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
