Agbamịẹ Apụ 3
3
Gboloma Ḍiepịrịye Agba Ma
1Gbọrịḅọ nemikase oria nambuloma ḅie gbọrịwu seni gboloma ḍiepịrịye agba mịẹḅịa sịkị ḅẹḅẹye ḅụ oforika owoi anịkanịka ịrọrọ. 2Tomoniḅọ ḅe ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa, Nyanaḅọ Ḅe pakaḅoḅo Ikowarị mị ḅọkọ ḅụ. Erọn furo ḅie agbamịẹ apụma nama ḅe oju pulo mị seni agbamịẹ ẹbẹ mị ḅụ inein-a ịkọlị ma ḅụ mgba saraḅịa 3se nama ḅe ḅụ mà pẹkẹrẹ ma ọkịḅo se ḍiepịrịye fịaye agbamịẹ se Nyanaḅọ Ḅe pịrịḅịa: ḅụlọ ḅie ayema ḅụ sime ḅẹlẹkị mamgba na, 4nịna akpa ma na arịa ḅụ sime ḅẹlẹkị ma na, pịkị iḅi paranga mị na. 5Agbamịẹ apụma ma aye mamgba se dọkịma agbamịẹ ayema na chụa dọkịmaḅịa agbamịẹ ẹbẹ mị ọgọnọ. Mịn fịye agba mị anịa kụnụ mị Nyanaḅọ Ḅe ọ̀ ḅụḅẹlẹḅẹlẹmẹ.
6Nemikase anana anịkanịka oḅori ini nwọse gboloma agba mị mịẹmẹ ḅẹḅẹ, ḅẹḅẹye ḅụ oforika owoi anịkanịka ịrọrọ mị ini se anị mịẹḅịaye-ẹ. 7Tomoniḅọ ḅọrọ nemikase anana se ḍiepịrịye agba mịẹmẹ ḅẹḅẹ, 8ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa Ikowarị mị tọrọkọ ḅụ. Agbamịẹ apụma oria oju pulo mị seni agbamịẹ ẹbẹ mị ḅụ inein-a ịkọlị ma ḅụ saraḅịa 9se mà ayema seni fịye agbamịẹ Nyanaḅọ Ḅe pịrịḅịa: ḅẹlẹkị mị na, bebe kokuogbo imgbe mị kpekima ḅẹlẹkị tumo mị na, bebe ḅụlọ ḅie ayema gbẹịn ḅẹlẹkị mị mgba na, 10nịna akpa ma na arịa ọgọnọ sime ḅẹlẹkị ma na, pịkịna iḅi paranga mị na. 11Fịrịnwẹngịarị agbamịẹḅọ ḅe mịn mị mgba seni agbamịẹ ẹbẹ mị ọgọnọ dọkịma se fịye agba mịẹ Nyanaḅọ Ḅe pịrịḅịa.
12Nemikase tomoniḅọ ḅọrọ oḅori se ḍiepịrịye agba mịẹḅịa ḅẹḅẹ, 13ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa Ikowarị mị tọrọkọ ḅụ. Agbamịẹ apụma oria oju pulo mị seni agbamịẹ ẹbẹ mị ḅụ inein-a ịkọlị ma ḅụ saraḅịa 14se mà ayema seni fịye agbamịẹ Nyanaḅọ Ḅe pịrịḅịa: ḅụlọ ḅie ayema ọgọnọ sime ḅẹlẹkị mị mgba na, 15nịna akpa ma na arịa ọgọnọ sime ḅẹlẹkị mị na, pịkịna iḅi paranga mị na. 16Agbamịẹḅọ ḅe mịn mị mgba ọ̀ dọkịmaḅịa agbamịẹ ẹbẹ mị ọgọnọ, anị Nyanaḅọ Ḅe ḅụḅẹlẹḅẹlẹ fịye ḅaraḅụ. Ḅẹlẹkị mamgba sime Nyanaḅọ Ḅe pịrịmẹ. 17Gbọrị Izrẹlḅọ sọnị ḅẹlẹkị anịkanịka oju pulo pẹị ẹkẹ; mịn mị anị bebe Izrẹlapụ mamgba koko gbasoḅịa oloko-ẹ ini anga nyọ anga nyọ ḅụ.
Currently Selected:
Agbamịẹ Apụ 3: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
