Pakaso 15

Moziz Nime Mị

1Anịsịkị Moziz ḅe na Izrẹlapụma na mị nime mị chu seni Nyanaḅọ Ḅe bomamẹ:

“À nime chu seni Nyanaḅọ Ḅe bomaḅịa, anịatịḅị boma nyana ọmụḅaraiḅi ọ̀ nwọ nyanasam;

asụnma na árị seni nwẹngịapụma na ò seni tọrụ mị ḅie gbinsam. 2Nyanaḅọ Ḅe anị kụrọma ị̀ ḍụarịḅọ ḅe-ẹ;

ori anị ị̀ ḍụaḅọrọmaḅọ ḅe-ẹ;

Ori anị ị̀ Tamụnọ Ḅe-ẹ, à pịkị ò tokoniḅịa,

ị̀ ḍaḅe Tamụnọ Ḅe, à pịkị oria opu mị se nime chuḅịa.

3Nyanaḅọ Ḅe owuniḅọ-ẹ;

Nyanaḅọ anị oria ẹrẹ-ẹ.

4“Ijipt apụ ọmụogbo mị na anịa kiri ọgọnọ owuni kporokporo arụ ma na ò seni tọrụ mị ḅie gbinmẹ;

inia ḅie owusọtẹịn tịḅịdapụ ma ori ini se Awụwụ Tọrụ mị ḅie simbi ḅaasam.

5Gbun tọrụ mị anị ini gbẹịnmẹ;

ini ḅile mun kiri lamẹ, ḍụparị ḅara.

6“Ị́ya amaḅara mị anị kụrọ ḅara ḅụgbiripumamẹ, yei Nyanaḅọ;

anị tarakapụma ḅaa kọsịmamẹ.

7Ọmụ opu amanyanaḅọ ḅara ị́ nwọse ị́rị́ na tarakapụma nẹngịmamẹ;

ị́ya ịganị mị anị kọrị paka osuein dọkịma ọkụ nwọse ini dọkịmamẹ.

8Ị́ fọrụ fiema tọrụ mị ḅụ sara se mengi mị kpokponima gelema chịẹmẹ;

onu chịẹ ọkụ anị anị chịẹ ọkụ-ẹ;

tọrụ mị ḅụ gbuntẹịn anga mị pịkịḅo kpoinkpoin kiri sọmẹ.

9Tarakaḅọ ḅe nwọ ḅẹmẹ, ‘Àrị ini ḍuko mun ini kunḅịa;

àrị inia ngọma ḍia pịkị à ḅi aye mamgba nwọ ọkịḅịa;

àrị ị̀ya okola-agiji mị wọrọ se ini nyana aye mamgba nwọ ọkịḅịa.’

10Ọkụma Nyanaḅọ, gbọrị sịkị ḅụ ị́ sara ọwụ mị Ijipt apụma simbi ḅaamẹ;

lịmọ ḅile ọkụ anị ini ḅile ọkụ-ẹ ḅalafama mengi mị ḅie.

11“Yei Nyanaḅọ, oru ma ḅụ tụḅọ ị́ kịkẹ?

Tụḅọ ị́ kịkẹ, ḅụgbiripuma osiḅụ simeḅọ, tokoni nyana ḅalafamaḅọ?

Tụḅọ ị́ kịkẹ ḅe ḅụgbiripuma fịrịnwẹngị ḅụ pịkị kụrọye mịẹḅụ na?

12Ị́ya amaḅara mị ị́ nwọ sụmamẹ,

se kiri mị mine-na-tarakapụ ma mịnịmẹ.

13Kuḅie se ḅụgbana na gbẹịnḅọ ị́ nwọ sọmẹ ị́ ḅereniye mị ḅụ, ị́ tọrọkọ tarị ị́ ḍụaḅọrọmasa apụma pịrịmẹ;

ị́ya kụrọ ḅụ ị́ ini pamun ị́ya osiḅụ sime ama mị lamamẹ.

14Sẹ ma àrị naamẹ, se ḅụgeregere ḅụ inia ḅalafamẹ;

Filistia apụma tẹmẹ taịntaịn inia ḅụ sọsam.

15Idọm mị anịa tịḅịdapụ ma inia ḅụgbiripumẹ;

Moab mị anịa kụrọnị ma inia ḅụgeregere aḅẹ;

Kenan apụma ini ḅarị kuḅie kụrọ nyanakẹ.

16Tẹmẹ taịntaịn na opu ḅalafa na ḅo inia ọgọnọ gbanasam.

Yei Nyanaḅọ, ị́ya kụrọ mị ini ọrịsam,

mịọkụ ḅarachụaḅọ nyanaka ḅaraḅụ inia ḅalafa aḅẹ,

ọkịmun ị́ya tomonima ḅọrọso sịkị lamẹ—

anị omoniapụ ḅaraḅụ ị́ pakụmaḅo apụma.

17Ị́ ini ọkịḅo chumẹ se ini seni ị́ya tụndụ mị ọgọnọ ḍipimẹ,

anị Ị́rị́ Nyanaḅọ Ḅe sẹlẹ se ị́ya warị mịẹ nyọ mị,

ị́rị́ ḅara na nama Oputẹkẹwarị mị

18Ị́rị́, Nyanaḅọ Ḅe, ị́ amanyanaḅọ sọ mun ḅene-ḅene laḅịa.”

Miriam Ma Nime Mị

19Izrẹlapụma kpoinkpoin kiri ọgọnọ ini nwẹngị tọrụ mị saḅamẹ. Ọkụma Ijipt apụma inia kiri ọgọnọ kporokporo arụ ma na, asụnma na, àrị se nwẹngịapụma na, tọrụ mị ḅie sọmun sịkị, Nyanaḅọ Ḅe ò mengi mị ọkịḅo ini gbẹịnmẹ.

20Ịkịankoro Miriam, Erọn ḅe nụmbụrarọ ma, árịa ọbọ mị á nwọ ọkịmẹ se eremeni mamgba á ḍuko se ini ọbọ ma farị se sẹkịaḅẹ. 21Miriam ma á nime chu ini pịrịmẹ:

“Ó nime chu Nyanaḅọ Ḅe boma, anịatịḅị boma nyana ọmụḅaraiḅi ọ̀ nwọ nyanasam:

asụnma na àrị se nwẹngịapụma na ò seni tọrụ mị ḅie gbinsam.”

Akụ Mengi

22Anịsịkị Moziz ḅe, Izrẹlapụma tọrọkọda se ini na Awụwụ Tọrụ mị ḅie ḅụ nwẹngị so Shụa onwun ele ḅie mun mẹ. Tẹrẹ-a ḍin ini nwọse onwun ele ḅie nwẹngịmẹ, ọkụma ini mengi ọrịkẹ. 23Ini ḅo Mara nwọ chịn gbọrị anga nwọ lamẹ, ọkụma anị nyọ sime mengi mị opuma akụmẹ gose ini ineda anị ḅukẹ. Anị ini gose Mara nwọse anị chịnye-ẹ. 24Tomonima ini ḍuko Moziz ḅe sua se nwọse ò gbelamẹ, “Nde wa ḅuḅịaye?” 25Moziz ḅe ori ò kuḅie laḅara se Nyanaḅọ Ḅe tẹkẹmẹ, se Nyanaḅọ Ḅe gbọrị chịn ikiḅa nwọse ò ḍiemẹ, ori anị seni mengi mị ḅie gbinmẹ; se mengi mị pịkịḅo ḅu mengi nwọ sọmẹ.

Anịanga ḅụ Nyanaḅọ Ḅe ini seni inia ḅụ kekeḅịa olokoma nwọse ini pịrịmẹ, ọ̀ pịkị anịanga ḅụ ini ḍaḍikimẹ. 26Ọ̀ nwọ ḅẹmẹ, “Ó nemikase ị̀ ḅịpịpoki se karakaraye mị kẹngẹ nwọ mịẹ pịkị à tọn ọ́ pịrịayema nwọ mịẹmẹ ḅẹḅẹ, à seni Ijipt apụma pịrị obi ma ḅụ gbọrịye sọnị à se fomuḅara ḅụ ọ́ pịrị-ẹkẹ. Ị̀rị̀ Nyanaḅọ Ḅe anị ọ́ gwọgwọḅọ ḅe-ẹ.”

27Anịanga ḅụ ini sọmun Ẹlim mị lamẹ, anị oyimaịn ideri mengi fịnjịma na pịkị kọrọ-a tesi oyi fịnjịma na sime nyọ mị-ẹ; anịju ini mengi mị anga sịkị pike simemẹ.

Currently Selected:

Pakaso 15: OBTP

Highlight

Copy

Compare