Pakaso 14
14
Awụwụ Tọrụ Mị Saḅa Mị
1Anịsịkị Nyanaḅọ Ḅe nwọse Moziz ḅe ḅẹmẹ, 2“Izrẹlapụma ḅẹ ini vinpịkị se mun Paị Hahaịrọt mị tọrọkọ pike ịnyọsara, anị Migdọl mị na Awụwụ Tọrụ mị na ogboku, Beal Zefọn mị na kpeki anga ḅụ. 3Amanyanaḅọ ḅe ò koromaḅịa na Izrẹlapụma ini sẹ mị ḅie nwẹngị gelegelema ḅọrọaḅẹ, se mịọkụ ini ḅo piri ele mị ḅie churamasam. 4À mịẹḅịa ori ininachịn, se ori ó ḍukoḅịa, se amanyanaḅọ ḅe na oria ọmụogbo mị na à nwọ nẹngịma sa ḅẹḅẹ anị osi ọkịḅo ị̀ pịrịḅịa. Anịsịkị Ijipt apụma ini nemiḅịa na Ị̀rị̀ anị Nyanaḅọ Ḅe-ẹ.” Izrẹlapụma ò ḍuko ini pịrị ḅara mị ini nwọ mịẹmẹ.
5Ijipt amanyanaḅọ ḅe, tomonima ini sosam ini nwọ ḍuko ọ̀ pịrị sịkị ori na oria fịrịtịḅịdapụ ma na inia kuḅie ḍinma se nwọ ḅẹmẹ, “Mịn cheye wa nwọ mịẹ? Wa Izrẹlapụma wẹrịso se ini sosam, wa pịkị ḅarị ini nyanaḅo ẹkẹ ini ḅo omoniapụ sọ wa pịrị!” 6Se amanyanaḅọ ḅe ori oria owuni kporokporo arụ ma na oria ọmụogbo mị na nwọ karakaramamẹ. 7Oria owuni kporokporo arụ mamgba ọ̀ nwọ ọkị se pakamẹ, pịkị iḅitẹịn ẹndẹ oyiasi fịnjịma sọnị, ori àrị ọkị chụa mun mẹ, ọmụalapụ ma kụlọda àrị pịrịmẹ. 8Nyanaḅọ Ḅe mịẹse amanyanaḅọ ḅe ori ininachịn, se Izrẹlapụma ḍukomẹ, anị ọmụḅaraiḅi na soarị apụma! 9Ijipt apụ ọmụogbo mị na, asụnma na, owuni kporokporoma na, pịkị àrị dọkụarị apụma na, ini ḍuko se mun Awụwụ Tọrụ mị anga ini pike ịnyọsara sime nyọ mị ḅụ ini pẹlẹmamẹ, Paị Hahaịrọt mị na Beal Zefọn mị na kpeki anga ḅụ.
10Izrẹlapụma ini amanyanaḅọ ḅe na oria ọmụogbo mị na ini ḍukoarị ọkụ nwọ ọrị sịkị, inia ḅala opuma famẹ se ini owu Nyanaḅọ Ḅe pịrịmẹ na ọ̀ ḅarachụa ini pịrị. 11Ini nwọse Moziz ḅe ḅẹmẹ, “Ijipt mị ḅie iḍupu ofori? Wa ḅo mị onwun ele mị ḅie fịḅịa ẹrẹchị anị ị́ wa ọkị pakụmaḅoye? Ma ị́ mịẹye ḍiki, Ijipt mị ḅie ị́ wa ọkị pakụmaḅoye ḅụ! 12Ma wa soka sịkị wa ḍuko ị́ pịrịka na anị nwọ paka wa pịrịḅịa-ẹ? Wa ị́ ḅẹmẹ na wa wẹrịso, se wa omoniapụ sọ Ijipt apụma pịrị ḅụ sime mamun. Anịanga omoniapụ sọ ḅụ sime mị iḅitẹịn mịanga onwun ele mị ḅie sime fị mị nẹngịmẹ.”
13Moziz ḅe nwọse ini pẹkẹrẹmẹ, “Ọ́ ḅalafama! Ọ́mịna ḅụ ó jikema, anịsịkị Nyanaḅọ Ḅe ḅara wẹrịma ọ́ ḍụaḅịa ọkụ ọ́ nwọ ọrịḅịa mịmgba; mịna Ijipt apụma ngịsị ọ́ ḅarị ini ọrịẹkẹ. 14Nyanaḅọ Ḅe ori owusọ ọ́ pịrịḅịa, ọkụma ómine re yawụma sime iniaḅụ pakaḅịaye ḍiki.” 15Nyanaḅọ Ḅe nwọse Moziz ḅe ḅẹmẹ, “Nde ị́ gose à ḅarachụa ị́ pịrị nwọḅẹ owu kọn arịye? Tomonima ḅẹ ini nwẹngị tọrọkọ mun. 16Ị́ya amgbara mị dekichịẹma tọrụ mị da. Mengi mị maịn puḅịa, se Izrẹlapụma ini kpoinkpoin kiri ọgọnọ nwẹngị tọrụ mị saḅa koroḅịa. 17Àrị Ijipt apụma mịẹse ini ininachịn so ọkụma, ini ini ḍuko koromunḅịa, amanyanaḅọ ḅe na, oria ọmụogbo mị na, oria owuni kporokporo arụ ma na, pịkị oria arụ dọkụ apụma à nwọ nẹngịma se anị osi ọkịḅo ị̀ pịrịḅịa. 18Àrị ini nẹngịma sịkị, Ijipt apụma ini nemiḅịa na Ị̀rị̀ anị Nyanaḅọ Ḅe-ẹ.”
19Tamụnọ enjẹlḅọ anị Izrẹlapụma inia ọmụogbo mị tọrọkọ simeḅọ ḅe, ò so mun inia ọḅụju chịẹ simemẹ. Soḅuno mị sọnị anị so mun 20Ijipt apụma na Izrẹlapụma na ogboku simemẹ. Soḅuno mị anị kanakana sọ seni Ijipt apụma pịrịmẹ, ọkụma anị enekuḅu sọ seni Izrẹlapụma pịrịmẹ, anịẹrẹchị ḍin mị ḅie mgba owunima ini ineda jụmḅọ jụmḅọ kpekimakẹ.
21Moziz ḅe ori ọ̀ ḅara sụma tọrụ mị damẹ, se Nyanaḅọ Ḅe ịrụapakapaka nyọ ḅụ kụrọ fọrụ seni tọrụ mị de ọḅụ pịrịmẹ. Ḍin mị mgba anị fie nweni tọrụ mị ḅo kpoinkpoin kiri nwọ sọmẹ. Mengi mị anị maịn pumẹ, 22se Izrẹlapụma ini kpoinkpoin kiri ọgọnọ tọrụ mị saḅa koromẹ, mengi mị mama anga ma ḅụ anị chịẹ simemẹ. 23Ijipt apụma ini ini ḍuko mun tọrụ mị ḅie sọmẹ, inia asụnma na, kiri ọgọnọ owuni arụ ma na, pịkị arụ dọkụ apụma na ini na. 24Ḅaso ḅiriḅụ Nyanaḅọ Ḅe ọ̀ fịnị ḅẹlẹ mị na pịkị soḅuno mị na ḅie ḅụ wẹrị Ijipt apụ ọmụogbo mị ḍiki se ḅụḅalaḅala seni ini pịrịmẹ. 25Ọ̀ mịẹse Ijipt apụma inia kiri ọgọnọ owuni arụ ma ḅụọma ḍipimẹ, anị mịẹse nwẹngị mị inia ḅụfụkamamẹ. Ijipt apụma nwọ ḅẹmẹ, “Nyanaḅọ Ḅe ori owusọ seni Izrẹlapụma pịrị se wa dapaka aḅẹ. Mịanga ó ye wa so!”
26Nyanaḅọ Ḅe nwọse Moziz ḅe ḅẹmẹ, “Ị́ ḅara sụma tọrụ mị da, anịsịkị mengi mị anị pịkịma ḅo Ijipt apụma na, inia owuni kporokporoma na arụ dọkụ apụma na gbẹịnḅịa.” 27Anị Moziz ḅe ọ̀ ḅara sụma tọrụ mị daye-ẹ, se ene mị ḅa sịkị mengi mị anị pịkịma ḅo anị kọpụ lala ọkụ lamẹ. Ijipt apụma ini mịẹse ini mengi mị ḅie soḅịa ọkụ nwọ ḍọkịmẹ, ọkụma Nyanaḅọ Ḅe ori ini tan tọrụ mị ḅie gbinmẹ. 28Mengi mị anị pịkịma ḅo owuni kporokporoma na, arụ dọkụ apụma na pịkị Izrẹlapụma ḍuko tọrụ mị ḅie sọmun Ijipt apụ ọmụogbo mị mgba gbẹịn famamẹ; inia ḅie gbọrịḅọ sọnị kọnkẹ. 29Ọkụma Izrẹlapụma ini ḅụọ se tọrụ mị ḅie kpoinkpoin kiri ọgọnọ nwẹngị saḅa somẹ, se mengi mị anị tọrụ mị ḅụ mama anga ma ḅụ kpokponima chịẹ simemẹ.
30Anị ene ḅie Nyanaḅọ Ḅe ori Izrẹlapụma ḍụaḅọrọmamẹ Ijipt apụma ḅara ḅie, se Izrẹlapụma ini tọrụ mị akaka Ijipt apụma fị ọkụ mị nwọ ọrịmẹ. 31Izrẹlapụma Nyanaḅọ Ḅe oria opu kụrọ mị seni Ijipt apụma nẹngịma ọkụ nwọ ọrị sịkị, ini Nyanaḅọ Ḅe ḍikiḅalafamẹ; ini pịkị Nyanaḅọ Ḅe ḅụ ḅereni nyanamẹ, pịkị oria fịrịnwẹngịḅọ Moziz ḅe ḅụ na.
Currently Selected:
Pakaso 14: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
