Pakaso 11

Moziz Ḅe Tatarị Yi Ye Goyegoye Fị Mị Ḍukopakụmamẹ

1Anịeso Nyanaḅọ Ḅe nwọse Moziz ḅe ḅẹmẹ, “Gbọrị ḅụfụka kọnmẹ à se Ijipt amanyanaḅọ ḅe na oria tomonima na pịrịḅịaye. Anị mị ḅọrọsa ḅẹḅẹ ori ọ́ wẹrịso se ó soḅịa. Karakaraye ḍukoḅụ, ómine mgba mị ama mị ḅie ori ò depakụmaḅịa. 2Mịọkụ ḍuko Izrẹlapụma pịrị, ye ọrụ ḅọḅọ nụḅọ na kpekima angaḅọ ḅara goli na seleḅa na ḅiriaye nwọ ọkị.” 3Nyanaḅọ Ḅe ọ̀ mịẹse Ijipt apụma ini osi seni Izrẹlapụma pịrịmẹ. Kọkọmaye ḅụ, fịrịtịḅịdapụ ma na tomoni mamgba na, Moziz ḅe anị karakarama opu tomoniḅọ-ẹ nwọḅẹ ḅara ini nwọ seni ori ọkịmẹ.

4Moziz ḅe anịsịkị nwọse amanyanaḅọ ḅe ḅẹmẹ, “Nyanaḅọ Ḅe nwọ ḅẹmẹ, ‘Ḍin karakarama ogboku àrị Ijipt mị ḅie nwẹngị ḅọrọḅịa, 5se Ijipt ḅie ini tatarị yi owutọkụ goyegoye fịḅịa, amanyanaḅọ tatarị owutọkụ ḅe, anị amanyana ngada mị ọgọnọ simeḅịaḅọ ḅe ḅụ sakịmun omoniḅọ ma tatarị owutọkụ ḅe la, anị ịpịamgba gbẹịn gbẹịnḅọ ma. Nambulo ma ḅụ tatarị yi wu goyegoye sọnị, arịmgba fịḅịa. 6Bebe Ijipt mị ḅie mgba owutịḅịḅie fieḅịa, anị jịn sịkị ma ọkọ fieka owutịḅịḅie, pịkị ngịsị anị kịkẹye sime ẹkẹ. 7Ọkụma Izrẹlapụma gbọrị obiri sọnị ini na inia namama na tịḅị oloku ẹkẹ. Anịsịkị ị́ nemiḅịa na Ị̀rị̀ Nyanaḅọ Ḅe Ijipt apụma na Izrẹlapụma na ogboku à kịrịye ḍiepakụmaḅịa.’” 8Moziz ḅe oria ọkwẹịn kọn kuluma ḅụ ọ̀ nwọ ḅẹmẹ, “Ị́ya fịrịtịḅịdapụ mamgba ini ị̀ damaḅo se tịḅịtu ị̀ pịrịḅịa, ini ị̀ tẹkẹḅịa na àrị ị̀ya tomonima ọkị se so. Anịeso, à soḅịa.” Anị Moziz ḅe opu ịganị ḅụ amanyanaḅọ ḅe wẹrịso se soye-ẹ.

9Nyanaḅọ Ḅe ò ḍuko Moziz ḅe pịrị ḅọrọsam na, “Amanyanaḅọ ḅe ngịsị ori ị́ poki ḍụkụ-ẹkẹ, mịẹso sịkị Ijipt mị ḅie ị̀ya ḅụgbiripuma ayema ḅe opu pẹkẹrẹ à nwọ mịẹḅịa ọkụ.” 10Moziz ḅe na Erọn ḅe na amanyanaḅọ ḅe tọrọkọ ḅụ ini ma ḅụgbiripuma ayema nwọ mịẹmẹ, ọkụma Nyanaḅọ Ḅe ọ̀ mịẹse ori ininachịnmẹ, ọ̀ pịkị ḍụkụkẹ Izrẹlapụma oria sẹ mị ḅie pakaso.

Currently Selected:

Pakaso 11: OBTP

Highlight

Copy

Compare