Pakaso 10
10
Igurube Ma
1Anị Nyanaḅọ Ḅe nwọse Moziz ḅe ḅẹye-ẹ, “Somun amanyanaḅọ ḅe ḍiki. À mịẹse ori na oria fịrịtịḅịdapụ ma na ini ininachịnsam, mịẹse inia ogboku ḅụ à ma ḅụgbiripumaye ma mịẹḅịa ẹrẹchị 2pịkị mịẹse ómine ineda à ḅara wẹrịma Ijipt apụma seni oḅori chịẹma ọkụ mị nwọ ḍuko ọ́mịna awọma na ọ́mịna awọma yi ḅịa awọma na pịrịḅịa ọkụ, anị ma ḅụgbiripumaye ma à nwọ mịẹarị sịkị ḅụ. Ómine mgba ó nemiḅịa na Ị̀rị̀ anị Nyanaḅọ Ḅe-ẹ.”
3Anị Moziz ḅe na Erọn ḅe na so amanyanaḅọ ḅe damamun se nwọse ọ̀ ḅẹye-ẹ, “Nyanaḅọ Hibru apụma Tamụnọ Ḅe nwọ ḅẹmẹ, ‘Ị́ ininachịn ị̀ pịrị mun nde sịkị laḅe? Ị̀ya tomonima wẹrịso se ini so, mịẹse ini mun ị̀ tẹkẹḅịa ọkụ. 4Ị́ nemikase pa ḍụkụkẹ nwọ ḅẹḅẹ, anịọkụma àrị igurube ọkịḅo ị́ya sẹ mị ḅie chuḅịa ḅa. 5Àrị opuma ḅaka so ọkụma kiri mị mgba àrị gbẹịn famaḅịa. Opu ene mgbọlụ mị ḅaa kọnmaye mamgba àrị pẹị famaḅịa, ejema ḅụ kọn ayema sọnị. 6Ị́ya amanyanaḅọ warịma ḅie na ị́ya fịrịtịḅịdapụ ma warịma ḅie na pịkị ị́ya tomonima warịma ḅie mgba na àrị sọ ḅeinḅịa. Àrị sitẹịn ọ́mịna ḅieju-aḍapụma jịn sịkị ọrịsa aye mamgba nẹngịḅịa.’” Anị Moziz ḅe Fẹro ḅe tọrọkọ ò vinpịkị soye-ẹ.
7Amanyanaḅọ ḅe, oria fịrịtịḅịdapụ ma nwọse ọ̀ ḅẹmẹ, “Ḅe ḅọḅe ọ̀ ḅụfụkase wa pịrị mun nde sịkị laḅe? Ye Izrẹl owuapụma so, mịẹse ini ineda Nyanaḅọ, inia Tamụnọ Ḅe tẹkẹḅịa ọkụ. Ijipt mị sisosa ọkụ ị́ ọrịka?”
8Anị ini Moziz ḅe na Erọn ḅe na ọkịḅo amanyanaḅọ ḅe pịrịye-ẹ, se ọ̀ nwọse ini ḅẹmẹ, “Ó somun ọ́ Nyanaḅọ ọ́mịna Tamụnọ Ḅe tẹkẹḅịa ọkụma nde jokoma munḅịa apụma?”
9Moziz ḅe nwọse ọ̀ pẹkẹrẹmẹ, “Mine mgba wa munḅịa, mịna awọma na pịkị olomusa apụma sọnị. Mịna owuapụ awọma na eremeni awọma na, mịna ananama na oḅorima na, pịkị mịna nambuloma na wa se chụa munḅịa, anịatịḅị wa alalị fị ḅụ osi se Nyanaḅọ Ḅe pịrịḅịa.”
10Amanyanaḅọ ḅe nwọ ḅẹmẹ, “À Nyanaḅọ Ḅe karị fịmẹ na ngịsị à ḅereni-ẹkẹ ọ́mịna eremeni ma na awọmẹnịma na ọ́ nwọ ọkị se chụa so! Pikipikiye ofori-ẹ anị ḅele pakamẹ na ọ́ ḅarị ị̀ chukuḅie sime ḍọkịkẹ. 11Ẹn-ẹn! owuapụma kẹngẹ anị mun Nyanaḅọ Ḅe tẹkẹḅịaye-ẹ, ọ́ ḅọrọ nemikase ọkọ simeye nwọ ḅimẹ ḅẹḅẹ.” Mịn ọkwẹịn mị ọ̀ nwọ kọn sosịkị, Moziz ḅe na Erọn ḅe na ini nwọ depakụmamẹ amanyanaḅọ ḅe tọrọkọ.
12Anị Nyanaḅọ Ḅe nwọse Moziz ḅe ḅẹye-ẹ, “Ị́ ḅara dekichịẹma Ijipt mị da se igurube ma chịnḅo. Àrị ḅo kiri ḅie sopakarịye goyegoye fịḅaa, anị opu ene mgbọlụma koro sịkị ḅụ fịkaye goyegoye.” 13Anị Moziz ḅe oria amgbara mị dekichịẹmaye-ẹ, se Nyanaḅọ Ḅe ọ̀ mịẹmẹ ịrụa mị pakapaka anga ḅụ fọrụ fieḅo ama mị ọgọnọ saramẹ, ḍin na enekaka na ḅụ. Dede funfun ḅụ anị igurube ma koroḅo ama mị ḅie saraye-ẹ. 14Kpo ḅụ arịḅo bebe sẹ mị mgba ḅie saramẹ. Mịn igurube kpo mị ḅakatẹịn jịn sịkị ini ọrịsa ye nẹngịmẹ, anịkanịka anị na kịkịnaye jịn sịkị nweni ḅarị pịkị ọrịẹkẹ. 15Àrị kiri mị gbori so ọkụma, kiri mị àrị na gbọrị ḅara ḅọrọmẹ, opu ene mgbọlụ mị ḅaka aye mamgba àrị fị ḅaamẹ, chịnma tịḅị sime chịnmgbọlụma sọnị. Bebe Ijipt mị ḅie mgba ịnyanya sime gbọrị eje anịkanịka chịnmgbọlụ ḅarị ofori-ẹ.
16Anị amanyanaḅọ ḅe be mun Moziz ḅe na Erọn ḅe na chịn se nwọse ini ḅẹye-ẹ, “À siye seni Nyanaḅọ ọ́mịna Tamụnọ Ḅe na ómine na mịẹsam. 17Mịọkụ mị gbọrị sịkị mị ḅụ pa siḅụ-ḅarasin ị̀ pịrị, se Nyanaḅọ ọ́mịna Tamụnọ Ḅe tẹkẹ ị̀ pịrị ọ̀ pa mị opu fomuḅara mị dekisin ị̀ ḅụḅụ.” 18Moziz ḅe ori amanyanaḅọ ḅe wẹrịso se Nyanaḅọ Ḅe tẹkẹmẹ. 19Anị Nyanaḅọ Ḅe ịrụapakapaka anga fọrụ mị ḍinma se anịḅo ịrụa-tukorokoro anga ḅụ kụrọ-saḅakoro-fọrụ nwọ sọye-ẹ, anị igurube ma dekichịẹma se àrị ofuro mun Suẹz Ẹgẹdẹ mị ḅie saramẹ. Ijipt mị ḅie mgba gbọrị igurube sọnị kọnkẹ. 20Ọkụma Nyanaḅọ Ḅe ọ̀ mịẹmẹ amanyanaḅọ ḅe ori ininachịn, ọ̀ pịkị ḍụkụkẹ Izrẹlapụma ini so.
Kanakana
21Nyanaḅọ Ḅe anịeso nwọse Moziz ḅe ḅẹmẹ, “Ị́ ḅara dekichịẹma so mị da, anịsịkị opu kanakana kpo Ijipt ama mị gbẹịnḅịa.” 22Moziz ḅe ori ọ̀ ḅarama dekichịẹma so mị damẹ, se tẹrẹ-a ḍin ḅụ bebe Ijipt ama mị mgba opu kanakana kpo anị gbẹịnmẹ. 23Ijipt apụma ini ineda jụmḅọ jụmḅọ ọrịkẹ, anị sịkị mị ḅụ nụḅọ warị koroma paka gbọrịḅọ sọnị ofori-ẹ. Ọkụma Izrẹlapụma ini anga nyọ mị enekuḅu omi-ẹ.
24Amanyanaḅọ ḅe ò Moziz ḅe chịn se nwọse ọ̀ ḅẹmẹ, “Ó somun Nyanaḅọ Ḅe tẹkẹḅịa; ọ́mịna eremeni ma na pịkị awọma sọnị ini munḅịa. Ọkụma ọ́mịna ananama na, oḅorima na pịkị nambuloma na àrị mịanga simeḅịa.”
25Moziz ḅe nwọse ọ̀ pẹkẹrẹmẹ, “Anịọkụma ị́rị́ wa se agbama na pịkị dọkịma agbama na mịẹ Nyanaḅọ mịna Tamụnọ Ḅe pịrịḅịa namama seni wa pịrịḅịa. 26Ẹn-ẹn, mịna namama wa ọkị se chụa munḅịa; gbọrị wu sọnị wa kọma-ẹkẹ. Mine ḅarana wa se mun Nyanaḅọ, mịna Tamụnọ Ḅe tẹkẹḅịa namama sẹlẹḅịa. Wa mun anịanga laka simeogbo, se agbamịẹ Nyanaḅọ Ḅe pịrịḅịa namama ma wa àrị nemi-ẹkẹ.”
27Nyanaḅọ Ḅe ọ̀ mịẹmẹ amanyanaḅọ ḅe ọ̀ pa ininachịnmẹ, se ọ̀ pịkị ḍụkụkẹ ini so. 28Ọ̀ nwọse Moziz ḅe ḅẹmẹ, “Ị̀ tọrọkọ nwẹngị ḅụ sikima! Ḅerenima à pịkị jịn sịkị se ị́ ọrị! Àrị ị́ ọrị ḅịa ene ị́ fịḅịa!”
29Moziz ḅe nwọse ọ̀ ḅẹmẹ, “Ị́ karakaraye nwọ ḍuko mẹ.” “Ị́ ḅarị jịn sịkị se ị̀ ọrịẹkẹ.”
Currently Selected:
Pakaso 10: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
