Romu Suku-saakị Ẹkwẹn
Suku-saakị Ẹkwẹn
Pọlụ kẹẹ tẹ kẹ Romu ḅẹ apụ fịrịma ḍiri mẹ anie kẹ mịẹ tẹ tomi ma ḅụụ-tẹlẹma ò mu Romu ḅẹ sọsị mẹ la ḅẹ ye pịrị. Ori tọn ḅara anie ọ̀ kẹlẹ anịanga Kịrayịsị ḍukamẹnjịapụ ma ogboku sime tẹ kọrịnama kọrị ḅa, anịtẹso ini ḅarasụa ọ̀ pịrị tẹ ò so Sipeni mu ḅa. Ò ḍiri mẹ kẹẹ tẹ kẹ Kịrayịsị ḍukamẹnjịapụ mininiye mẹ fieye ḍuko-finji tẹ pịkị anị kẹ Kịrayịsị ḍukamẹnjịapụ ḍumo kọn ḅara gboloma ḅara na ḍuko ḅẹm. Ḍiri mẹ gbala-gbala ye so-a ḅara kẹ Pọlụ oku mẹ nyana wararị.
Ọ̀ sịn-ḅịḅị kẹ Romu ḅẹ apụ ma pịrị tẹ pịkị tẹkẹ ịn pịrị tẹso, Pọlụ ò gotẹ ḍiri mẹ kẹẹarị ye ḍukom: “Iḅi-Oku mẹ Tamụnọ wẹrịtẹ kịnị kẹ ọ̀ ḅụụ kura ḅara wẹrịarị ḅara mịẹfinjiarị: minini ḅụ mie anị ḅọrọ ḅoarị, sukuyọ-saakị ḅụ mu kunoma la.” (1.17)
Anịtẹso Pọlụ mị ḅẹrẹ-sịḅị mẹ ḍuko wasamam. Tomi mamgba, Juu-ḅẹ-apụ na Ja asịẹ ḅẹ apụ na, Tamụnọ na kura ḅụ sime mẹ ḅiiarị, kẹ gotẹ ọkọ ḍukoarị, kịnị mamgba gbọrụ ḅara kẹ si kụrọ suku-ḅio emi. Jizọsị Kịrayịsị ḅụ minini nyana ḅụ mie kịnị ḅọrọ tẹ Tamụnọ na kura ḅara simearị ye. Anie ḅọrọ tẹso, Pọlụ ḍuko giregiremarị ye anie ịwọ ḍumo tẹ Kịrayịsị na gbọrụ ḅụ sime mẹ, anie ịwọ sime-ḅara tẹ tomḅọ Tamụnọ na simearị ḅara mẹ dogi-ḅoarị ye mẹ. Minini ḅọ mẹ Tamụnọ na dein ḅụ sime tẹ, mḅọ pịkị Tamụnọ Tẹmẹ ḅe ḅụ ḅọrọtẹ si na fịị na kụrọ ḅụ paka-ḅo tẹ.
Sọnọ karama ḅẹrẹ-sịḅị mẹ ḅụ ọkị mu nine karama ye mẹ la ḅụ Pọlụ pịkị Tamụnọ Oloko mẹ gotẹ sụa ye na Tamụnọ Tẹmẹ ḅe minini ḅọ mẹ ḍumo ḅụ nyana kụrọ na gbolomaye ḍukoarị. Anịtẹso fịrịmẹnjịḅọ ḅe Juu-ḅẹ-apụ na Ja asịẹ ḅẹ apụ na Tamụnọ wẹrịtẹ ye tọn koroma tomi pịrị ḅara mẹ ḅụ nyana kiri ḅẹ ḅii-ḅịḅị mẹ na ikiriarị. Ḍuko gbaịn ḅụ ọ̀ ḅẹẹarị mịnẹ Juu-ḅẹ-apụ ma Jizọsị sịkị ye mẹ Tamụnọ tọn koroma ye ḅụ emi kẹ tomi mamgba ọkị-ḅo tẹ in Jizọsị Kịrayịsị ḅụ ḅọrọ tẹ Tamụnọ ḍiki-ḅụụjịrị mẹ lama ḅẹ ḅara, tẹ ò minini wararị mịnẹ Juu-ḅẹ-apụ ma sakị mamgba kẹ Jizọsị sịkị ḅịa. Kunoma ḅụ Pọlụ kẹẹarị kẹ Kịrayịsị ḍukamẹnjịḅọ ḍumo mẹ kọn ḅẹ ḅara, karakaramatẹ, ḅẹlẹma etela mẹ gbolomaye ja apụ na gboloma ḅụ. Nama kọrị Tamụnọ pịrị, Kịrayịsị ḍukamẹnjịḅọ nyana tẹ mịẹ sịẹ na jụmọ-jụmọ na pịrị ḅẹ ye, na pịkị tomḅọ tẹmẹ ḅioḅẹngbọ gboloma gbela aị na, mie ori ọkị tẹ arị gboloma aị kẹẹarị. Tomḅọ ḅii-ḅịḅị kẹ tomḅọ pịrị na Tamụnọ tokini ẹkwẹn kọn na mie ọ̀ kẹ gbaịn ye.
Ḍiri Mẹ Ḅio Simearị-aị
Suku-saakị na ḅẹrẹ-sịḅị na 1.1-17
Tomḅọ ḅọrọma ḅiiarị 1.18—3.20
Tamụnọ wẹrịtẹ kịnị ḅọrọmarị ḅara 3.21—4.25
Ịwọ ḍumo mẹ Kịrayịsị ḅụ 5.1—8.39
Izirẹlị nyana kiri Tamụnọ ye tọn ḅara mẹ ḅụ 9.1—11.36
Kịrayịsị ḍukamẹnjịḅọ ḍumo-kọn ḅara 12.1—15.13
Kunoma na ḅii-aḅịḅị na 15.14—16.27
Currently Selected:
Romu Suku-saakị Ẹkwẹn: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria