Romu 1
1
1Pọlụ, Kịrayịsị Jizọsị fịrịmẹnjịḅọ ḅe, anie Tamụnọ sẹlẹ-ọkịm mịnẹ ori Iḅi-Oku mẹ ḍuko wasama ḅẹ ḅọ ḅe, mie mị ḍiri mẹ kẹẹ tẹ kẹ ọ́ fịrịma ye.
2Iḅere-iḅerea kụra-ḅio mie Tamụnọ, ịkịankoroapụ ma, ḅụụ ḅọrọ tẹ mị Iḅi-Oku mẹ minini tomi pịrị tẹ ini anị kẹ fịafịa ḍiri mẹ ḅio kẹẹ koroma ye. 3Mị Iḅi-Oku mẹ, Wanyanaḅọ Jizọsị Kịrayịsị ọ̀ Tụḅọ ḅe gbolomayee, anie tomḅọ ḅara ḅụ Devidi furo paka-ḅo ḅọ ḅe; 4kụma Tamụnọ kịka fịafịa sime-ḅara ḅụ, Tamụnọ fịị ḅụ ọ̀ saakịma tẹ opu kụrọ ḅụ ḍie-pakama tẹ mịnẹ ori Tamụnọ Tụḅọọ. 5Ori ḅe ḅụ anie, anị Tamụnọ ḅụụ-ḅẹlẹ ḅara ḅụ, à Kịrayịsị fịrịmẹnjịḅọ sọ ye, tẹ mu ama sịẹ, sịẹ ḅụ simearị atomi mamgba mịẹtẹ ịn Kịrayịsị minini tẹ pịkị ọ̀ ḅịḅị poki ḅẹ ḅara. 6Ọmịnị Romu ḅụ simearị tẹ Tamụnọ sịn tẹ mịnẹ ó ḅo sime Jizọsị Kịrayịsị pịrị ḅẹ apụ ma sọ anị ḅụ emi.
7Ọkọẹrẹsị à mị ḍiri mẹ kẹẹ tẹ kẹ ọmịnị Romu ḅụ, Tamụnọ ḅẹlẹmarị tẹ, sịn tẹ mịnẹ ó ḅo ori atomi sọ ḅẹ apụ mamgba fịrịmarị.
Yee Tamụnọ, wamịna Ḍaḅọ ḅe na Wanyanaḅọ Jizọsị Kịrayịsị na ḍiki-ḅụụjịrị na dein na sime ọ́ pịrị.
Ịmịẹtẹ Ḅẹ Tẹkẹ
8Tarị ye, à Jizọsị Kịrayịsị ẹrẹ ḅụ ọmịnị-mgba gotẹ ịmịẹtẹ kẹ ị̀ Tamụnọ ḅẹẹm, bebe tomikiri mẹ ọmịna minini mẹ gbolomaye naa tẹ mẹ ẹrẹsị. 9Àrị ì ḅioḅẹngbọ mẹmgba kẹ fịrịmẹnjị pịrịarị Tamụnọ ḅe, ọ̀ Tụḅọ ḅe Iḅi Oku mẹ ḍuko wasama ḅụ, nimi wararị tẹ ḍuko ḅa mịnẹ à karakara ye ḍukoarị. Tamụnọ nimi wararị mịnẹ 10à tẹkẹ sakị, tẹkẹ sakị àrị ọ́ kẹ ḅiokoromarị. À Tamụnọ tẹkẹarị mịnẹ ọ̀ ḅụụ-ḅẹlẹ ḅara ḅụ ọ̀ paa mịẹtẹ ala-a sakị ḅụ à ḅo ọmịnị na ẹrịya. 11À kpọma ḅii lamarị mịnẹ à ḅo tẹ ọmịnị na tẹmẹ boma ḍiema tẹ ọ́ mịẹ kụrọma. 12À fiearị ye anie, wa ḅarasụa tẹ jụmọ-jụmọ minini mịẹ kụrọma ḅẹ ḅara, ì nye ọmịna nye mịẹ kụrọma, ọmịna nye pịkị ì nye mịẹ kụrọma. 13#Fịr 19.21Ị̀ amịnapụ, ọ́ kẹ ḅiokoroma ḅa mịnẹ tọnwa asakị à ḅo ọmịnị ẹrị mẹ tọn fama kụma gberie ḅo ị̀ dasịẹma tẹ. À ḅiim arị ọmịna ḅụụ sọ kịnị pịkị Tamụnọ pịrị, Ja asịẹ ogboku à mịẹtẹ ḅara. 14Anị sime-ḅara, à kọrị kịnị mamgba pịrị ḅẹ ye emi, tọrụ finjitẹ apụ-o, tọrụ finji-a apụ-o; ḍiri ẹrị apụ-o, ḍiri ẹrị-a apụ-o. 15Anie mie Iḅi Oku mẹ ḍuko ọmịnị Romu ḅụ sime apụ sọ pịrị mẹ gotẹ ì ḅio-sẹsẹmarị ye.
Iḅi Oku Mẹ Nyana Kụrọ
16 #
Mak 8.38
À kpọma iḅi-oku mẹ ḅụ ḅiokpọ nyana lama wararị; anị anie Tamụnọ kẹ minini nyana apụ mamgba ḅọrọmarị kụrọ mẹ, tarị apụ, Juu-ḅẹ-apụ, na pịkị Ja asịẹ ḅẹ apụ sọ. 17#Hab 2.4Kẹ gotẹ ọkọ ḍukoarị, iḅi-oku mẹ anie ḍie-pakamarị Tamụnọ mịẹtẹ tomi ori na ḅẹrẹ famarị ḅara; minini nyana ḅụ mie anị saakịarị ye, pịkị mu kunomarị ye. Anie pịkị fịafịa ḍiri mẹ ḅẹẹ ḅara, “Minini ḅụ ḅọrọ tẹ Tamụnọ na ḅẹrẹ-fama tẹ ḅọ mẹ anie ḍumo ḅarị ḅọ.”
Tomḅọ Ḅẹrẹ-ḅarasii
18Tamụnọ owi ịganị So-ḅio koro ḅo tomi ma si sime-ḅara na, mbasị na, tẹ mịẹtẹ kịnị Tamụnọ karakara mẹ nimi-a aị ma ọgọnọ gbana tẹ anị ḍie-paka tẹ. 19Tamụnọ gotẹ fomu-ḅara kẹ ịn pịrịarị ye anie, tomi ọ̀ ḅụụ nimi na-iḅi ye goyegoye giregire ịn pịrị wararị; Tamụnọ ḅarana anị mịẹ giregirema ịn pịrịm. 20Tamụnọ bịan tomikiri mẹ tẹmẹ kụra-ḅio, kịnị tọrụngbọ kẹ ẹrị-a tẹ ọ̀ ḅụ simearị iḅi aị ma na, ò sime gbamaso kụrọ mẹ na ọ̀ Tamụnọ-sime-ḅara mẹ na, tomi nwẹn ẹrị giregiremarị. Tamụnọ tẹmẹ-aị ma ḅụ anie tomi ḅọrọ tẹ arị lekiriarị ye. Mie ḅụ arị atomi ma ịn ḅarị gotẹ so ye nyana-a gbala-gbala! 21#Ẹfi 4.17,18Ịn Tamụnọ nimi wararị kụma sime ọ̀ pịrị kụn mẹ ịn kẹ ọ̀ pịrị-a, ịn pịkị ịmịẹtẹ kẹ ọ̀ ḅẹẹ-a. Anie nakara ịna akuroma papaa ye sọ fama tẹ, kanakana pịkị ịna oḅori aḅioḅẹngbọ ma sọ ḅin tẹ. 22Ini mẹẹ in ye nimim, kụma ini oḅori atomii; 23#Dit 4.16-18in ḍumo gbamaso Tamụnọ ḅe tẹkẹ ḅẹ nakara, ini ịn kẹ fị-fị atomi na, feni na, nama na, ikiriarị aị na kịkama kịra aị rẹ anie ịn tẹkẹarị.
24Mie ḅụ Tamụnọ arị atomi ma ḍiki-tọrụsin sịḅị-ngụngụnma aị pịrị tẹ ini ịna aḅioḅẹngbọ sọlịma aị, sọlịma aị mịẹarị, tẹ ḅụụ-jịrịma amịẹaị anie ịn kẹ jụmọ-jụmọ na mịẹarị. 25Iruo aị anie ịn kẹ Tamụnọ gboloma karakara mẹ ḍima tẹ ye; Tamụnọ tẹmẹ-aị anie ịn tẹkẹ tẹ pịkị fịrịmẹnjị pịrịarị, tẹ nwẹnị ori mịna aị ma tẹmẹḅọ ḅe rẹ tẹkẹ-a anie ịn tokini gbamaso ḅẹ ḅọ ḅee! Amẹnị.
26In miemẹ mịẹarị ẹrẹsị Tamụnọ ịn wẹrịso tẹ kẹ ḅụụ-jịrịma amịẹaị sọlịma pịrị tẹ. Ereme sọ mịẹ mịẹ-a ḅara kẹ ịna pembema ereme na gbolomarị. 27Anị gbọrụ ḅara ḅụ owiapụ so ereme na mịẹ-mịẹ ḅara kẹ jụmọ-jụmọ na mịẹ ḅẹ tẹ ḅalaḅalarị. Owiapụ ịna pembema owiapụ na ḅụụ-jịrịma aị mịẹarị, tẹ mịẹ na-iḅi-a tẹ ịn mịẹarị aị ma nwẹnị ịn da na-iḅi fomu-ḅara dogi-ḅo ịn pịrịarị.
28Ọkọ sime atomi ma karakara ḅara kẹ Tamụnọ ḅe nimi ḅẹ ḅii-a ẹrẹsị ori ịn wẹrịso ịna ḅụrụtẹ aḅioḅẹngbọ ma pịrị tẹ, ịn ḅarị kuraye nimi tẹ mịẹ-a. 29Si-sịḅịḅio-sụa ḅara na, si-amịẹaị na, opu-pọkọḅẹngbọ na, ngoro-ngoro-amịẹaị na, ịna ḅụụ ḅin wararị; afana na, kịnị-ḅa na, owu kẹ kịnị paka na, oḅori-kẹ-kịnịsịn na, ḍiki-ḅioḅu na sọ ịna ḅụụ sọ ḅin wararị. Ịn kịnị kẹ ọḅụ mẹnjị 30tẹ jụmọ-jụmọ ḅụụ siye ḍukoarị, ịn Tamụnọ ḅẹlẹma-a, ịn kịnị mịẹ simearị, ini opu amịẹaị mịẹarị, ḅụụ-bomarị; siye mịẹ ḅẹ aḅọkọ ḅọkọ kuroma ḅo ịna ḅụụ kụrọ tẹịnm; ḍapụ-na-iyingiapụ-na ḅịḅị poki poki-a apụ, 31ịna tẹmẹ ḅioḅẹngbọ pụụn tẹ; in minini kịnị pịrị aị sọ ịn mịẹ mịẹ-a, tẹ ịn pịkị iḅi-yemịẹ-ḅara, anịanịa ọkụrụkụrụ nyana ja atomi pịrị pịrị-a. 32In nimi wararị mịnẹ Tamụnọ Oloko mẹ ḅẹẹm mị ḍumo ḅara mẹ kọn apụ, kọn apụ fịị na-iḅim. Anịsọ ịn paa ma amịẹaị ma mịẹ ma-muarị, tẹ pịkị ọkọ mịẹarị jen-apụ mịẹ kụrọmarị.
Currently Selected:
Romu 1: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
