Egberima-Ẹkwẹn 6
6
Ja Ḅeri Nụnụ Ẹkwẹn
1Ị̀ tụḅọ, ị́ jụmọ fị saa ḅẹ onyo-sẹịn tẹ ḅoto? 2Ị́ kọn ẹkwẹn ḅo í kun sịẹma tẹ ḅoto, tẹ í minini jụmọ pịrị ye ḅẹ ḍiein ḅio í koro tẹ ḅoto? 3Ị̀ tụḅọ, ọkọ ḅẹḅẹ, ị́ anị tomḅọ ḅe kụrọ ḅara-ḅio sọ tẹẹ; kụma mie ị́ mịẹ tẹ anị ḅio paka-ḅo ḅarị ḅara: mangị ọ̀ dama-mu tẹ ọ̀ tẹkẹẹ, tẹ ori ị́ ḅụụ ḅara-siin. 4Mono ḍọkị ma, anịanịa gbọrụ anga sime tẹ ịnyọsara. 5Ḍiein mẹ ḅio pụkọ-pakaḅoo, feni anịanịa tụḅara piri-deeḅọ ḅara-ḅio gụnụ paka-ḅo ḅo ḅara.
6Ḅụụ-sarasara-a atomi mu mẹnẹ kẹ ịna ḍumo kọn-kọn ḅara ḅụ ye ḍawọ gbẹm. 7Ini ma ịn sịḅịdaḅọ nyana-a, alaḅọ anịanịa ḅẹrẹtọnḅọ sọ, 8kụma ịrụ akụra ḅụ mie ịn fịye kobiri ḅụụ wẹrịmarị, ḅụụ-tẹlẹma oḅoku sakị pịrị ḅụ. 9Tọ sakị na gbasịye ḅụụ-sarasara-a tomḅọ mẹ nwẹn kẹ iḅila ọgọnọ ḅọlọlọ sime ḅẹ? Ọ̀ saakị ḅẹ sakị ḅọrọ tọ sakị? 10#Egb 24.33,34Ọ̀ ḅẹẹarị, “À paa boowa kala-sakị kẹ tọrụ-gbaịn-finji ḅa. Arị ị̀ aḅara iko tẹ kẹlẹ ịnyọsara ḅa.” 11Kụma ọ̀ paa monoarị ogbo mie igoin ḅo owu kẹ ọ̀ paka ḅarịye, owuna-aị kẹ mu furuarị ḅọ kịka ḅara.
12Gberie ḅụ sọ ofori, si-sịḅịḅio-sụa atomi mẹnjịma ḅọrọ-ḅọrọtẹ iruo-aị iruo-aị ḍukoarị. 13Ịn tọrụ-anjị iwoma-iwoma tẹ tọnma ḅara kẹ oḅori kẹ ị́ sịn ḅẹ aị ḍukoarị, 14arị asakị mamgba in si-aị tẹlẹma wẹrịarị ịna pengetẹ akuroma ḅụ, anga mamgba ḅụ kamụ na owu na pakama-ḅo ḅẹ ḅara. 15Miemẹ ẹrẹsị, opu ḅụụ-fụka ḅo ịn la ḅa ḅiotọn-a ḅara ḅụ, tẹ ye ịn la tẹ ịn fịị-fịị ḅara sime ḅa. 16KỊNỊNYANAḄỌ ḅe ḍiki-ḅioḅuarị sonio aị emi,
Ori opuma ḍiki-ḅioḅuarị sọnọma aị emi: 17ḅụụ-gelemarị tọrụngbọ, iruo-ḅẹlẹ, mịẹye-ofori apụ ḅaarị aḅara, 18kẹ kịnị mbasị ḅẹ aị kuromarị ḅioḅẹngbọ, na fọnya-fọnya mangị mu siye mịẹarị aḅụọ na, 19iruo ḅẹrẹ-kiri-simeḅọ, tẹ iruo-aị iruo-aị tan-sara kpolimarị ḅọ, na mịẹ tẹ mịnapụ kamụ-kamụ-sọarị ḅọ na.
Sẹfị Gboloma Ḅeri Nụnụ Ẹkwẹn
20Ị̀ tụḅọ, ị́ ḍa ḍuko ị́ pịrịarị mịẹ ḅẹ ye mịẹẹ, tẹ í iyingi kẹ í toluma tẹ ye mẹ kẹ ḅioḅọrọma ma. 21Sakị mamgba ịna ẹkwẹn ma kẹ ị́ ḅụụ ḅio koko, í ḅioḅẹngbọ ḅụ arị ịkasị wẹrị. 22Í ye-muarị sakị ḅụ ịna toluma ye mẹ ị́ tọrọkọ sụn ḅa, ḍin ḅụ arị í kikima tẹ ye ị́ la ḅịa, anịsakị eneḅaka ḅụ arị ḅẹrẹ kẹ í toluma ḅa. 23Ini ị́ ḅẹẹarị mịẹ ḅẹ aị ma, ḅịyarị bele sọ wararị; ị́ mịẹ-irima tẹ ịn kẹ ị́ da karakarama ye mẹ inetẹ ị́ anga ḅẹ ḅara kẹ í toluma ḅa. 24Anị ị́ wẹrị ḅelema ḅa si ereme ḅụ, pịkị akụnakụna ẹrẹḅọ kẹ kịnị toluma famarị ẹkwẹn ma ḅụ. 25Ḍụkụ tẹ ḍiki-tọrụ ḅụ ịna iḅi mẹ í toluma fama ma; ḍụkụ tẹ ịn tọrụngbọ-tọrụngbọ kẹ ị́ da-mu ḍiein ḅio suu ma. 26Tomḅọ inetẹ fịturu-kpo la ḅẹ ye kẹ ama-mẹnjị-ẹrẹḅọ nyana ḅa, kụma sẹfị ḅụ mḅọ nyana-ye nyana-ye ḅọrọ tẹ faa ḅa.
27Í inetẹ kọrị fịnị kẹ í ekpe oḅolo tẹ kẹ mẹnjị tẹ ị́ akapa dọkị ḅịa? 28Í inetẹ kọrịarị anyịmgbọ ọgọnọ sịẹ mẹnjị tẹ ị́ aḅụọ dọkị ḅịa? 29Anị gbọrụ ḅara mẹ mie jụmọ ta na gbọrụ iḅila ọgọnọ mono mẹ siye dogi-ḅo la ḅara. Anị mịẹ ḅọ mịẹ ḅọ ḅụụ-fụka da ḅa. 30Kịnị ḅuru-pọkọtarị gotẹ fịye furu fị ḅọ ḍiki-sima-sima-a; 31anịsọ ini ò kun-kun, sọnọma akiri ọ̀ nwẹn anị gbẹẹ ḅa gbarị-a ḅara; ọ̀ ḅara sime-ye sime-ye ọ̀ pakama-ḅo fama ḅa. 32Kụma sẹfị si mịẹ ḅọ mẹ, mḅọ kuroma nyana-a. Mḅọ mịẹarị ye anie amịna ḅụụ ḅaa guluguluma. 33Ini mḅọ kẹ kụn-nyana-a ḅara mịẹ tẹ mḅọ fomu kọsịma ḅa; mḅọ tọrụ-tuu gbamaso ḅa. 34Diḅọ nwẹn-sịn ḅọ mẹ, gbala-gbala afana ịganị mḅọ ḅụ saakị anị sakị nẹngị sakị ofori. Ọ̀ fịarị gbẹẹfị mẹ kunoma nyana-a. 35Ori igbigi gbẹẹ-ye ọkị ḅịa; ị́ tan sara ọ̀ pịrị ḍiepịrịye tẹ ori ịganị deinma ḅẹ ye ofori.
Currently Selected:
Egberima-Ẹkwẹn 6: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria