Egberima-Ẹkwẹn 5
5
Sẹfị Gotẹ Kọn Ḅeri Nụnụ Ẹkwẹn
1Ị̀ tụḅọ, ḅeri-tokoloma tẹ ì nimi na yefieye lekiri na pokii. 2Anị sakị ị́ kpaịn ḍumo kọn-kọn ḅara nimi tẹ ị́ ẹkwẹn ma mịẹ tẹ kịnị nimi ḅa mịnẹ í ye-nimim. 3Jụmọ ta ḅịḅị-apakịrị ma ḅẹm ḅẹlẹ ḅara ḅẹlẹ ḅa, tẹ á ḅịḅị-nọnjị mẹ pịkị olivu-olo sịnịnị ḅara sịnịnị ḅa, 4kụma anị ḅẹ kunoma, á koroma-so ị́ pịrị ḅarịye, kururu na fụka-ye na. 5Árị ị́ kẹ fị ḅio su ḅa; á mẹnjịarị etela mẹ anie fị etela. 6Á ḅọrọ mu ḍumo la-laa etela ḅụ sime-sime-a, kụma árị ikele-ikele tẹ etela mẹ gbarịarị tẹ pakarị ye sọ lekiri-a.
7Ị̀ awọmẹ, ọmịnị ì pokii mịọkụ, tẹ gbala-gbala à ḍukoarị ye kẹ ḅioḅọrọma ma. 8Ọkọ sime ẹrẹḅọ ḅụ ọ́ ḅụụ wẹrị ḅelemaa! Á ḅọkọ anga sọ ó kpeki ma! 9Ọmịnị ọkọ mịẹ-mịẹ, osi-apụ ọmịnị tarị nyana sime mangịma mẹ ọkị ḅa, tẹ ọmịnị kpọ-a tẹ fịị ḅa, ọkụrụkụrụ nyana kịnị pịrị-pịrị-a atomi aḅara-ḅio. 10Inn, kịnị-tọrụ-nimia apụ ị́ ngọ mamgba ọkị ḅa, tẹ kọrịnama kọrị pịrị ye mẹ sime jen tomḅọ pịrị ḅa. 11Ị́ ị́ fị-iḅila ọgọnọ sime tẹ iningi ḅa, ḅuru-ḅa ḅụ í oju ḅụ mgbe-mgbe kiri kọn ḅa, 12anịsakị ị́ ḅẹẹ ḅa, “Tiye ẹrẹsị gbala-gbala à ye ḍawọ ḅii-a? Tiye ẹrẹsị gbala-gbala à gbọrụḅọ-sọ ị̀ datụkụma ḅii-a? 13À ye kẹ ì tolumarị apụ ma poki ḍụkụ-a. Arị ịn kẹ ye-sịn-a. 14Tẹ arị ị̀ ḅụụ ḍọkị ẹrịm ḅiotọn-a ḅara ḅụ mịnẹ ama-karakara-ogbo ḅụ ị̀ tọrụ-tuu tẹ.”
15Sime í soku-ḅẹ taḅọ ngẹrị pịrịị, pịkị árị ngẹrị ḅẹlẹmaa. 16Ị́ jen-apụ tapụ na iyi awọmẹ gbọrụ iḅi sọ kẹ ị́ mịẹ ḅịa. 17Ị́ awọmẹ mie ḍụḅa paka-ḅo tẹ ḅarasụa ị́ pịrị ḅarịye, kịnị-tọrụ-nimia apụ-a. 18Mie ḅụ ị́ ta na ḅioḅẹlẹ ḅụ koro-simee, tẹ ḅụụkụrọma tẹ kala-sakị í sime ẹrẹḅọ ma ḅụ í ḍereku nyana-a — 19iḅitẹ ḅụụ-ḅẹlẹma ḅara simearị ḅọ ma, tụḅụra ọkụ. Yee árị iḅi mẹ tẹ ị́ tọrụ sọarị ye mẹ sakị mamgba í ḅioḅẹlẹma; yee árị á ḅẹlẹma kẹ onu ḅara kẹ í gbori. 20Ị̀ tụḅọ, tiye ẹrẹsị ị́ ị́ ḅẹlẹma kẹ jen ẹrẹḅọ pịrị ḅii ḅẹ? Tiye ẹrẹsị jụmọ ta iḅi ị́ tọrụ-ḅaama ḅẹ? 21KỊNỊNYANAḄỌ ḅe ị́ mịẹarị ye mịẹarị ye ẹrịarị. Í mu anga mu anga ori ị́ ẹbịarị. 22Si-sịḅịḅio-sụa tomḅọ ḅe asi ma ọnya sọ wararị. Ò si ḅụ ḅẹ ịgbọ tolu mẹ ò kun sịẹmarị. 23Ò gotẹ fịarị ye, anie ọ̀ ḅụụ-ọlọ nyana-a. Ò kiki ofori ḅara kẹ sọarị oḅori mẹ mie ọ̀ kẹ ḍuḅu muarị.
Currently Selected:
Egberima-Ẹkwẹn 5: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria