Egberima-Ẹkwẹn 30
30
Agọ Kọn Ẹkwẹn Ma
1Ma ma anie Agọ, Jake owiḅọtụḅọ ḅe kọn tẹmẹ-la ẹkwẹn ma:
Tamụnọ ị̀ na oforii, Tamụnọ ị̀ na oforii,
tẹ à ḅarasụa nyana-a.
2À nama kịka tomḅọ nẹngị lamam;
À tomḅọ nyana-nyana sịḅịḅio nyana-a.
3Gbala-gbala gbọrụ nimi sọ amụ à ḍawọ ḅo-a,
tẹ Tamụnọ gboloma ye tẹ à nimi gberie-sọ ofori.
4Jen sakị tụḅọ So-ḅio ḅẹ aị ḍawọ ḍịn tẹ?
Jen sakị tụḅọ amịna ḅara-ḅio fẹrụ mẹ kuun-sịẹma tẹ?
Anịanịa ḅịtẹ ankịsị kẹ minji kobiri kpọọ tẹ?
Anịanịa kiri mẹ mu daasịẹ ḅẹ anga tọn tẹ?
Mḅọ ḅọrọ tụḅọ, í nimi wararị ḅẹḅẹ?
Mḅọ tụḅọ ḅọrọ tụḅọ?
5Tamụnọ minini ye goyegoye ọ̀ mịẹarị. Ori ekpeke sime-ḅara kẹ gbaịn-ḅọrọma gotẹ ọ̀ ḍọkịarị apụ mamgba gbaịn-arị.
6Ị́ ọkịarị mịnẹ ò gberie ḍukom, tẹ ori ọkọ sime ye ḍuko-a ḅẹḅẹ, ori í ḍiki-ịganị tẹ mịẹ tẹ kịnị nimi ḅa mịnẹ ị́yẹrị iruoḅọ.
Ja Egberi
7Tamụnọ, arị ị́ ḅara ḅiiarị mịnẹ ị́ mịẹ tẹ à ye ḅụ maaịn nyana tẹrẹmẹ à fịị: 8iruo ḅụ ị̀ wẹrị ḅelemaa, tẹ ḍụkụ tẹ arị ngọ-kọn ma, pịkị igoin ma. Mie ḅụ à fị na-iḅi fịye kịngẹ kẹ ị̀ pịrịị.
9À nyana ọkọ nẹngịma kụma, ẹbịsịya à ḅẹẹ ḅa arị ị́ kẹ mịẹ ḅẹ ye ofori. Kụma arị igoin kụma ẹbịsịya à furu tẹ ị̀ Tamụnọ tọrụ-tuu ḅa.
10Gbala-gbala fịrịmẹnjịḅọ mịẹ tẹ iḅi-a ye ḍuko ma, ọ̀ nyanaḅọ tọrọkọ. Ori í wori tẹ ị́ anị gotẹ tọrụsiẹrị ḅa.
11Japụ emi tẹ ịna aḍapụ woriarị, pịkị ịna iyingiapụ kẹ ịn mịẹ iḅi in nimim nwẹn ḅẹẹ ye ḍie-pakama-a.
12Japụ emi tẹ kuromarị ịn kpaịn wararị, ini ini inetẹ ḅẹ ḅara kẹ ḅụrụ-kọsị wararị ogbo.
13Japụ emi tẹ kuromarị ini iḅi lama wararị ye; yei, in kuromarị ini iḅim ḅẹ ḅara mẹ ḍiki ya!
14Japụ emi tẹ kụrọ-kụrọ ḅara kẹ igoin-apụ na mịẹḅẹ-ọkụ-ofori apụ na mịẹ tẹ ini inomarị; anị ḅara mie ịn mịẹ-mịẹ tẹ kẹ angarị.
15Anwo maa eremịna-awọmẹ iyim, tẹ ini maa apụ ma gbọrụ ẹrẹ fịm, “Kẹ ị̀ pịrịị”
Ye ḅụ ḅẹ inia aị emi tẹ ye pọkọ-tata-a aị:
16Ḍuḅu na, tụḅọ iyi-a ẹrẹḅọ na,
samụnọtẹ-kiri na pịkị orumo na.
17Ḅẹḅọ-ḅẹḅọ tẹ amịna ḍaḅọ kẹ kpọọtiarị, anịanịa iyingiḅọ ḍiki-simarị ḅọ árị omongi sakị ḅụ, ẹdẹlẹ amẹẹ mḅọ pẹị, anịanịa piri-ḅio-ḅẹ opu afeni mḅọ atọrụngbọ gbọn pakama-ḅo na-iḅim.
18Inia aị emi tẹ ḅọị ḅakam ẹrẹsị àrị inetẹ arị fiearị ye naa ḅo-a:
19So-tọrụ fiin-arị igo,
ịkụ ọgọnọ mẹnjịarị oronwi,
abajị ḅio amịna muarị yọ ḍọkị nimiarị onwi-arụ,
na owiḅọ na ẹrẹḅọ na ḅo jụmọ-jụmọ ḅẹlẹmarị ḅara na.
20Mie si ẹrẹḅọ mịẹ-mịẹ ḅara: á sẹfị tẹ minji ḅiri famatẹ so ọkụma á ḅẹẹarị, “Kụma á mịẹ gbọrụ siye sọ ofori-o!”
21Inia aị emi tẹ tomikiri ḅẹ apụ inetẹ daa ḅịa aị: 22Ḅo amadaḅọ sọarị omoniḅọ,
oḅori-ḅọ tẹ ọ̀ fị ḅẹ ḅii-ye ḅii-ye nyana wararị ḅọ,
23kịnị ḍiki-ḅioḅuarị ẹrẹḅọ tẹ owiḅọ ẹrị sime ḅọ, na fịrịmẹnjị-ẹrẹḅọtụḅọ tẹ á warị-nyana-ẹrẹḅọ kiri ọkị ḅọ na.
24Inia anama emi tomikiri mẹ ḅụ, karakaraye ini ịrụ wararị sọ, ịn kpọma aka nimi lama wararị: 25Mẹnẹ amẹẹ: ini ịnyọ nyana-a, kụma ịrụa kụra ḅụ ịn fịaị kobiri ḅụụ-wẹrịmarị.
26Ḍụḅarị ḅio ịḅụkụ sokuarị kala anama: kụrọ sọ ịn kụrọ-a kụma ini ịkụ ma ogboku warị nama ḅụụ pịrịarị.
27Igurube amẹẹ: ini amadaḅọ nyana-a, kụma ini ọrụtọn ḅara mẹnjịarị.
28Ologboingboin amẹẹ: í inetẹ ị́ ḅara-ḅio gberie ọlọ wẹrị ḅa, kụma í inetẹ ịn ḍọkị-ẹrị ḅa amadapụ awarị ḅio.
29Inia aị emii, tẹ ḍiki tọrụ ḅẹlẹmarị aị, arị mẹnjịarị sakị ḅụ: 30ọkụkụ amẹẹ tẹ nama mamgba ogboku kụrọ tẹịn tẹ gberie-sọ ḍiki-ḅalafafa-a nama ma na, 31oḅori amẹẹ na, owi-ọḅọkọ amẹẹ na, pịkị amadapụ tẹ ebube nyana ḅara kẹ ịna atomi tọrọkọ ḅụ mẹnjịarị apụ na. 32Í oḅori-sọ lamatẹ pịkị opu ẹkwẹn kọn-kọn tẹ siye kuromaḅo-ḅom ḅẹḅẹ, ḅarị mịẹ ma tẹ kuroma nyana-a! 33Ị́ ndo-minji ḍarịma-ḍarịmaa, ị́ bọta nyana ḅa. Ị́ jụmọ nini ḅakụ-ḅakụ, pulo paka ḅa. Ị́ mịẹ tẹ ịganị paka-paka, ị́ ḅụụ-fụka kẹ ị́ ḅụụ pịrị ḅa.
Currently Selected:
Egberima-Ẹkwẹn 30: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria