Egberima-Ẹkwẹn 29
29
1Kịnị ị́ daa-karakarama sakị goyegoye ị́ kọngọ kụrọmarị ḅẹḅẹ, gbọrụ ene ḅụ ị́ gbọrsịḅị gbẹẹ kọsị tẹ ḅarị saakị paka-ḅo ḅịa.
2Karakara mịẹarị ḅẹrẹtọnḅọ kẹ ì ḍie, tẹ à ḅioḅẹlẹarị apụ kẹ í ḍie ḅa. Si-sịḅịḅio-sụarị ḅẹrẹtọnḅọ kẹ ì ḍie, tẹ à kururu fịịarị apụ kẹ í ḍie ḅa.
3Í nimi kẹ ye-sịn-arị ḅẹḅẹ ị́ ḍa ị́ kẹ ḅụụ-tọn ḅa. Igbigi fama sẹfị-ereme pịrị mẹ anie oḅori fa.
4Karakara ḅẹrẹkọn amadaḅọ ḅe ḅụ ḅẹrẹ wararị sakị ḅụ sịẹ mẹ kụrọ sịẹsime ḅa, kụma igbigi kịngẹ mie ọ̀ ḅụ ḅẹrẹ ye sọarị sakị ḅụ ori ama mẹ fama ḅa.
5Ị́ ẹkwẹn ḅụ í ikiapụ furumarị ḅẹḅẹ, ị́ ḍiein tuu ị́ ḅụ pịrịarị.
6Si-apụ ịna asi in kun sịẹmarị sakị kịnị mingirima-mingirima-a apụ ḅioḅẹlẹ ma mẹnjị ma-ḅọrọarị.
7Iḅi tomḅọ igoin-apụ la akiri nimi wararị, kụma si-sịḅịḅio-sụapụ inetẹ ọkọ sime aị fiearị ye naa ḅịa.
8Ja atomi kẹ gberie-sọ sịn-a apụ inetẹ bebe ama mẹ fiema ḅa. Ye-nimiapụ mie mịẹ tẹ ye mamgba yaụarị.
9Sịḅịḅio nyanaḅọ ḅe oḅori-ḅọ kẹ ḅẹrẹ-siri muarị sakị, oḅori-ḅọ ḅe ḍẹrị kịngẹ mie ọ̀ ḍẹrịarị, tẹ oloku-oloku tẹ ò woriarị.
10Ọmbie ọsụma pọkọ-tarị apụ ḅẹḅọ-ḅẹḅọ tẹ kịnị mingirima-mingirima-a ḅọ ḍiki-ḅioḅuarị, kụma karakaraye-mịẹapụ ọkọ sime tomḅọ ḍumo gbaịn ḅọrọmarị.
11Apantu atomi ịganị pakamarị, kụma sịḅịḅio-nyana apụ inema tẹ anị dasịẹmarị.
12Gbọrụ ḅẹrẹtọn ḅọ kịnị ḅo ḍuko ọ̀ pịrị iruo aị kẹ ye-sịn-arị ḅẹḅẹ, ọ̀ fịrịmẹnjị-opuapụ mamgba ḅo iruo apụ sọ ḅa.
13Igoin wararị tomḅọ na ò ponomarị ḅọ na gberie nyana gboloma wararị — KỊNỊNYANAḄỌ ḅe tọrụngbọ kẹ ini maa apụ ma pịrị wararị.
14Amadaḅọ igoinḅọ ḅe la kiri ịgbanị ọ̀ pịrịarị ḅẹḅẹ, ọ̀ ḅẹrẹtọn alama ḅa.
15Daa-karakarama na fomuye na awọmẹ mịẹ iḅimarị. Tụḅọ ò ḅio tọnye-tọnye mịẹarị ḅẹḅẹ, ori ò iyingi ḅụụ-jịrịma ḅa.
16Si-atomi ḅẹrẹtọn kụrọ ḅụ emi sakị ḅụ si-amịẹaị ḅakarị. Kụma karakaraye-mịẹapụ ma ḍumo-sime tẹ ọkọ sime atomi ma ḅịkị-koro ẹrị ḅa.
17Ị́ tụḅọ siye mịẹ tẹ ḅẹḅẹ, ò fomuu, anịsakị sakị mamgba ị́ ọ̀ kẹ ḅụụ-tọn tẹẹ. Gbala-gbala ò gotẹ ị́ ḅụụ-jịrịma ḅarịye paka ḅịa.
18Tamụnọ datụkụma-a sịẹ anie ọrụtọn-a sịẹ, Ḅioḅẹlẹ arị tomḅọ anie Tamụnọ oloko kokoarị ḅọ.
19Í inetẹ ẹkwẹn ọ̀ pịrị ḅụ ngẹrị ị́ fịrịmẹnjịḅọ daa-karakarama ḅịa. Í fiearị ye ọ̀ naa ḅa, kụma ẹbịsịya ọ̀ kẹ ye-sịn ḅịa.
20Ḅiokpọ sime oḅori-ḅọ pịrị kuroma-a tẹ ẹkwẹn-arị ḅọ nẹngịm.
21Ị́ kala-sakị ḅụ ị́ fịrịmẹnjịḅọ ḅii-ye ḅii-ye kẹ ọ̀ pịrị tọrọkọ-tọrọkọ muarị ḅẹḅẹ, gbọrụ ene ḅụ ọ̀ gbọrsịḅị ị̀ nyana ye nyana ye ọkị ò nye sọma ḅa.
22Owi ḅioḅẹngbọ nyana apụ kpọma tọnwa kamụ na ḅụụ-fụka na dogi-ḅoarị.
23Opu ẹkwẹn ị́ ḅịkị dogi-ḅo ḅa, kụma ị́ ḅụụ-lẹgịmarị ḅẹḅẹ, tomi kụn kẹ ị́ pịrị ḅa.
24Furuḅọ na sọ tẹ furuarị ḅọ anie ori na fịya-a tẹịn ḅọ. Ḅẹrẹ-siri ọ̀ karakara mẹ ḍuko-ḍuko in fomu-ḅara kẹ ọ̀ pịrị ḅa, tẹ Tamụnọ ò wori ḅa ò ḍuko-a ḅẹḅẹ.
25Anị siye dogi-ḅo ị́ pịrị ḅa ị́ ja atomi ị́ ḅụụ ḅụ kuromarị aị ḅala ḅakarị ḅẹḅẹ, kụma ị́ KỊNỊNYANAḄỌ kẹ ḅiokpọmarị ḅẹḅẹ, ị́ la ḅẹ ye ofori.
26Ọrụḅọ-ọrụḅọ ḅẹrẹtọnḅọ ḅe iḅi kuroma ḅiiarị, kụma KỊNỊNYANAḄỌ ḅe ḅara ngẹrị mie í inetẹ karakara ḅẹrẹkọn nyana ḅarịye.
27Karakaraye-mịẹapụ ma si-sịḅịḅio-sụapụ ma ḍiki-ḅioḅuarị, tẹ si-sịḅịḅio-sụapụ ma pịkị karakaraye-mịẹapụ ma ḍiki-ḅioḅuarị.
Currently Selected:
Egberima-Ẹkwẹn 29: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria