Egberima-Ẹkwẹn 25
25
Sọlọmọnị Gbaa Egberi Ma Ḅẹ Jaị
1Ma ma anie Sọlọmọnị gbaa egberi ma ḅẹ jaị, Hẹzịkaya, Juda ḅẹ amadaḅọ ḅe ogigo ḅio ḅẹ ḍiri kẹ apụ ma kẹ pakama ḅo aị ma.
2Wa Tamụnọ kụn-arị ò kikimarị aị gotẹ; wa amadapụ kụn-arị in ḍuko finjiarị aị gotẹ.
3Gbala-gbala í inetẹ amadaḅọ ḅe kuromarị aị nimi-a; ò kuromarị aị ma wa saḅa-ḅọrọm, arị kịkarị ye gele-faa So-tọrụ ḅọrọ ye, anịanịa pokolo ideri abajị owolo ḅọrọ ye.
4Seleḅa oḅolo wararị muno ma siin-famaa, anịsakị ḅara-ḍịn ḅọ ḅe anị kẹ iḅiye tẹmẹ pakama-ḅo ḅa. 5Amadaḅọ ḅe akaka ḍuko-toluma si-mịẹapụ mamgba wẹrị ḅelema fama, anịsakị kịnị ọ̀ ḅẹrẹtọn mẹ nimi ḅa mịnẹ anị aḍụa nyana-a.
6 #
Luk 14.8-10
Ị́ amadaḅọ ḅe tọrọkọ sịẹ wararị sakị ori ị́ kẹ opu tomḅọ ọkị ḅẹ ḅara kẹ ye mịẹ ma. 7Kịnị ị́ ḅẹ tẹ í iwoma iḅi ini ị́ ḅẹ tẹ ị́ ị́ sime kiri kẹ ị́ nẹngị ḅọ pịrị nẹngịm.
8Ị́ ẹrị tẹ ye gotẹ fọnya-fọnya mu ogbo-ogbo ma. Ḅẹrẹ mẹ kiri sime jụmọ ọḅụkọ ḅo tẹ ḍuko pakamam mịnẹ í kuraye mịẹ-a ḅẹ kụma, ndẹẹ ị́ mịẹ ḅẹ ọkụ anị sakị mẹ ḅụ?
9Ị́ na kpeki tẹ angarị ḅọ ị́ na ịgbanị-a nyana wararị ḅẹḅẹ, ọ̀ mịẹ siin ọmịnị maa apụ ogboku, tẹ ḅọị aị kẹ ogboku koroma ma. 10Ọkọ-a kụma ḅẹḅọ-ḅẹḅọ nimi ḅa í inetẹ ḅọị ye koko ḅịa, tẹ í inetẹ gbala-gbala anị ḅụụ-jịrị mẹ kẹ ḍumo sime ḅịa.
11Ḍuko na-iḅi ye mẹ ḍuko giregirema mẹ kịkarị ye anie golu sime-ḅara tẹ kẹ seleḅa ḅụ tẹmẹ ye.
12Ye mịẹ-mịẹ ḅara nimi ḅọ ḅeri-nụnụ-ẹkwẹn tẹ kẹ minini tẹ poki ḅarị ḅọ pịrị ye mẹ, yela ḅara-tụngbalị sụa agolu anịanịa iḅi tẹịn golu kẹ mịẹ ḅụụ-ḅirimaye nẹngịm.
13Ḅioḅẹngbọ kẹ ḅụụ ḅụ gbana na-iḅi oku-mẹnjịḅọ mẹ ịwọ ịnyọ kẹ mḅọ kẹ fịrịmarị ḅọ pịrịarị, fịye-soku-sakị ḅẹ kọrịnama ọfịrị sakị ḅụ ḅuu minji ọkụ.
14Gbala-gbala in minini kịnị pịrị aị pịrị-pịrị-a apụ ma kịkarị ye anie oḅuto na fẹrụ na tẹ eene koroma-a aị.
15Ye-inema ḅụ kẹlẹkẹlẹ ẹkwẹn tomḅọ pịrị mẹ inetẹ mịẹ tẹ à ḍụkụ ḅịa ḅẹ tẹịnḅọ sọ ḅara-siin ḅa, tẹ anị pịkị inetẹ ḅẹrẹtọn-apụ aḅioḅẹngbọ sọ ḍima ḅa.
16Gbala-gbala ị́ ḅẹm taḅa la na-iḅi ḅara saḅa-ḅọrọ ma; ẹbịsịya taḅa ḅụrama mẹ mịẹ tẹ ị́ ọsụ ḅa.
17Tọnwa sakị kẹ ị́ na kpeki tẹ angarị ḅọ warị mu ma; ẹbịsịya ị́ ọ̀ pọkọ-tama tẹ ori í ḍiki-ḅioḅu ḅa.
18Tomḅọ mịẹ-a ye kẹ mḅọ sịḅị sịn mẹ, anị okologie, anịanịa mgbele, anịanịa oḅuarị ḍiein kịnị-ḅaaḅa ḅara kẹ tomḅọ ḅaarị.
19Ḅioḅẹngbọ kẹ ḅụụ ḅụ gbana na-iḅi-a ḅọ ḅụ sịrẹrẹ mẹ, tọrụ-ḅalaḅala sakị ḅụ, kịkarị ye anie ḅụụkụrọma tẹ jikearị aka kẹ ye tokuru, anịanịa ekeli wararị ḅụọ kẹ mẹnjị.
20Nume-su ḅioḅẹngbọ sii ḅụra tẹ ḅọ pịrị mẹ kịkarị ye anie oḅoku ene ḅụ ọ̀ ḅụụ kapa siin, anịanịa fụn kẹ ịnọ tọrụ sikiri su.
21 #
Rom 12.20
Ḅuru si kẹ ị́ tọn-arị ḅọ tarịarị ḅẹḅẹ fịye kẹ mḅọ pịrị fị; minji ḅuu mḅọ pọkọ-tarịarị ḅẹḅẹ, minji kẹ mḅọ pịrị ḅuu. 22Ị́ mịẹ tẹ mḅọ ḅụụ-jịrị ḅa, tẹ KỊNỊNYANAḄỌ ḅe ị́ gbẹẹ ḅa.
23Tomḅọ kẹ ọḅụ ẹkwẹn kọn mẹ ịganị dogi-ḅoarị, anie ọgọnọ fẹrụ gbarị-a ḅara kẹ eene dogi-ḅo ḅara pembe ḅara.
24Warị-isun ọgọnọ anga iḅi ẹkwẹn pẹlẹ-pẹlẹ-a ẹrẹḅọ na gbọrụ warị mẹ ḅio anga nẹngịm.
25Kunoma, alatẹ ama ḅụ ḅo iḅi ḅẹrẹ naa kịkarị ye anie, ị́ pọkọ samụnọ tẹ minji ḅuu ị́ tarịarị sakị ḅụ í ḅuuarị oḅoku minji.
26Iḅi tomḅọ tẹ minini tẹ si wararị ḅọ jụ ḅọrọarị ḅọ kẹ í ḅiokoromarị ye anie minji sitẹ ngụngụḅa, anịanịa kịnị-ḅaaḅa ye kẹ sụatẹ suḅe.
27Ḅẹm taḅa ḅụrama iḅi ị́ pịrị-a ḅara anie ḅụụ-kọsị tẹ tokini ḍọkị ḅaka sọ iḅi-a ḅara.
28Ị́ inetẹ ị́ ịganị dasịẹma-a ḅẹḅẹ, anie ḅarasụa nyana-a onu gbori-a ama, finji owu kẹ anị paka ḅẹ apụ pịrị wararị ye.
Currently Selected:
Egberima-Ẹkwẹn 25: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria