Egberima-Ẹkwẹn 24
24
19
1Si atomi mọnị ma, pịkị ḅụụkụrọma tẹ ini na ikia-sọ ma. 2In kuromarị aị mamgba ḅụụ-fụka dogi-ḅo aị famam ịn ḅịḅị finji sakị goyegoye ye gbọrụḅọ laarị.
20
3Warị pakamarị apụ nimi na yefieye naa na mie ịn kẹ suku-saakịarị. 4Ye-ḍawọ ḍin simearị anga ḅio mamgba yelatẹ iḅi aị mie ịn kẹ arị ḅirima fama wararị.
21
5Ḅo ye-nimi ḅọ sọ mẹ iḅi oju ḅẹ kụrọ-kọn nẹngịm; inn, ye-ḍawọ-ḍịịn kụrọ nyana ịnyọ nyana nẹngịm. 6Kunoma, ẹrị mịnẹ ị́ iḅiọkụ ye tọn karakarama tẹrẹmẹ ị́ paka ọmụ mum, ị́ pịkị iḅi datụkụma ẹkwẹn nyana lamam, anị ḅọkọ ḅụ mie ị́ ḅọrọ tẹ owu-ḅara-iḅi nyana ḅarịye.
22
7Nimi ẹkwẹn ma arị pokolo ḅakam apantu ḅe anị fiearị ye naa ḅụ. Ọ̀ nyana tẹ ḍuko ḅẹ ye ofori kịnị kụrọ nyana tẹ aḅẹrẹ ḅụ ẹkwẹn-arị sakị.
23
8Ị́ sakị mamgba ị́ mịẹ ḅẹ si-aị tọn-arị ḅẹḅẹ, ị́ ḅụụ-fụka dogi-ḅoḅo ḅọ kẹ ẹrẹ fị ḅa. 9Oḅori-ḅọ sụa ḅo kuroma tẹ si-a ye ofori. Tomi jen-apụ ḍiki-sima ngẹrị kẹ mịẹ-mịẹ sọma tẹ mịẹarị ḅọ ḍiki-ḅioḅuarị.
24
10Ye ḅo tọrụ ḅalaḅalama ḅara sime tẹso ị́ ḅụụ-lọkọarị ḅẹḅẹ, karakarama tẹ ị́ ḅụụ ịnyọ ofori.
25
11Mịẹ si ofori tẹ ịn kẹ ḅaa ḅẹ muarị ḅọ pụkọ-pakamaḅo ḅụ sakị fama ma. 12Ẹbịsịya ị́ ḅẹẹ ḅa anị kẹ í gboloma anga ofori, kụma Tamụnọ í kuromarị aị nimi tẹ arị kọn-arị. Ori ị́ ẹbịarị; Ò nimi wararị. Tẹ ị́ mịẹarị ye mie ò ḍiki tẹ ị́ gbẹẹ ḅarịye.
26
13Tụḅọ, ḅẹm taḅaa; anị iḅi wararị. Tẹ ḅẹm mẹ siin ḅoarị-ḅoarị anị ị́ ḅẹlẹ ọgọnọ ḅẹlẹarị ḅara mẹ, 14ẹbịsịya í nimi lama ḅa mịnẹ nimi sọ ọkọ kẹ iḅi tẹmẹ mẹ pịrị wararị. Nimi nyana tẹ tọrọkọ-jụ mẹ iḅi ị́ pịrị.
27
15Si-sịḅịḅio-sụa apụ ma ḍikima ma, anie ẹbị tẹ kịnị mingirima-mingirima-a tomḅọ ḅe aị furu, anịanịa ọ̀ warị ọkị tẹ kẹ amịna nye mịẹarị apụ ma. 16Kịnị mingirima-mingirima-a tomḅọ ḅe ọ̀ ḅịkị sakị goyegoye ọ̀ pịkị saakị sịẹarị; kụma si-sịḅịḅio-sụapụ ma opu ḅụụ-fụka ịn ḅaa gulugulumarị.
28
17Si kẹ ị́ tọn-arị ḅọ ḅe opu ḅụụ-fụka ḅio sọ-sọ ḅioḅẹlẹma; ḍereku ma ọ̀ pụmbụ sakị. 18KỊNỊNYANAḄỌ ḅe nimi ḅa ị́ ọ̀ ḅụụ-fụka mẹ ḍikiḍiki tẹ ḅioḅẹlẹarị ḅẹḅẹ, tẹ anị ọ̀ ḅụụ-ḅẹlẹ ḅịa; anị tẹso, ẹbịsịya ọ̀ ḅarị fomu-ḅara kẹ ọ̀ pịrị ḅịa.
29
19Ḍụkụ tẹ si-mịẹapụ mịẹarị ye í lokolokoma ma, pịkị ịn mọnị ma. 20Si-sịḅịḅio-sụarị ḅọ mẹ iḅi nyana-a tọrọkọ-jụ — mḅọ kẹ tọrụ-ḅaama ḅẹ gberie sọ ofori.
30
21Ị̀ tụḅọ, KỊNỊNYANAḄỌ ḅe ḍiki-ḅalafaa, pịkị amadaḅọ ḅe kụn. Kọngọ kụrọma ịn pịrịarị apụ na gbọrụ mịẹ sọ nyana ma; 22ọkọ sime atomi ma tọrụ-gbaịn-finji ḅụ ịn faa ḅa. Í nimi ḅẹ, opu ḅụụ-fụka tẹ Tamụnọ, anịanịa amadaḅọ ḅe, inetẹ mịẹ tẹ ḅo ịn la ḅẹ ye?
Ja nimi Ẹkwẹn
23Ye-nimi atomi mịna aị ma sọ ḍukom. Anị kura-a ḅẹrẹkọnḅọ ḅẹrẹ kẹ ḅioḅẹngbọ ḅụ sụa wẹrị mẹ. 24Ọ́ nwẹnị ḅẹrẹ-pẹlẹ siye mịẹ ḅọ ḅara iḅima ḅẹḅẹ, ḅẹḅọ-ḅẹḅọ ó wori tẹ ó ḍiki-ḅioḅu ḅa. 25Fomu-ḅara kẹ siye mịẹ ḅọ pịrịarị ḅẹrẹkọn-apụ ma, anị sime-ḅara sime-ḅara sọ, in lolo tẹ ḍereku ḅa, iḅi ereso ḅụ.
26Tomḅọ jụmọ mingirima-a ḅara kẹ ḅẹrẹ pakịrị mẹ anie ikia karakara elekima.
27Tarị ị́ ḍụọ tẹlẹmaa, tẹ ye ḍiḅii, tẹrẹmẹ ẹrẹḅọ sime tẹ warị pakamaa; anịsakị í nimi tẹ mịnẹ ị́ ḅọrọ tẹ ị́ fị ḅẹ ye nyana ḅẹ ḅọkọ paka tẹẹ.
28Ḅẹrẹ ḍuko gbọrụḅọ-sọ ọgọnọ gbana ma í gotẹ ọkọ mịẹ ḅẹ iḅiye ofori ḅara ḅụ, anịanịa ọ̀ ḅụ etemi-na-sịḅị-na ofori ye ḍuko. 29Ḅẹẹ ma, “Ọ̀ kẹ ị̀ mịẹ gbọrụ ḅara mẹ mie à kẹ ọ̀ mịẹ ḅarịye! Arị ori na gbasị ḅa!”
30À mẹnjị kọrịnama-ḅụụ-lọkọ nyana wararị apantu ḅe aḍụọ ḅio ḅọrọm. 31Nangị asịn na osuka na sikima arị ḅio jen ofori. Ḍụḅarị onu tẹ ịn kẹ arị gbọrụ ye mẹ sọ ḅịkị-koro tẹẹ. 32À miemẹ ḍiki tẹ kẹ kuroma ḅụ suu tẹ anị ḅụ ye ḍawọm. 33#Egb 6.10,11Sịngẹ tẹ mono í ḅiiarị ḅẹḅẹ, ị́ aḅara iko tẹ kẹlẹ ịnyọsara-a, 34kụma í monoarị ogbo igoin ḅo owu kẹ ị́ paka ḅa, owuna-aị kẹ furu ḅẹ ḅo ḅọ ọkụ.
Currently Selected:
Egberima-Ẹkwẹn 24: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria