Egberima-Ẹkwẹn 17
17
1Ḅụụ-dein nyana ḅụ fị kala fịye iḅi kẹ alalị-alalị na ḅụụ-fụka na simearị warị nẹngịm.
2Aka-tii ḍin fịrịmẹnjịḅọ mḅọ sịḅịdaḅọ tụḅọ tẹ ḅụụ-jịrịma ḍumo kọn-arị ḅọ kẹ sịḅịdaa ḅa; mḅọ ḍaḅọ ḅe nyana koroma aị ḅụ ḅẹ ḍuu fị ḅa.
3Fịnị mie tomi kẹ golu na seleḅa sime-ḅara tọn-ḍikiarị, tẹ tomḅọ ḅioḅẹngbọ mẹ KỊNỊNYANAḄỌ ḅe mie anị tọn-ḍikiarị.
4Si atomi si ḍuko-aị pokiarị, tẹ iruo apụ iruo-aị pokiarị.
5Í igoin-apụ ḍẹrịarị ḅẹḅẹ, ị́ ịn tẹmẹ Tamụnọ ḅe gọlịarị. Tamụnọ fomu-ḅara kẹ ị́ pịrị ḅa ị́ jen-apụ ḅụ paka siye gotẹ tọrụ-ḅẹlẹarị ḅẹḅẹ.
6Taa-awọmẹ tọrụ-ḅẹlẹ na kụn na dogi-ḅo ịna opu ḍapụ-na-iyingiapụ-na pịrịarị; anị ḅara mie awọmẹ sọ ịna ḍapụ-na-iyingiapụ-na ḅụ ḅọrọtẹ tọrụ-ḅẹlẹ na kụn na nyanarị.
7Kịnị kụn kẹ pịrịarị apụ iruo-aị ḍuko-ḍuko-a, tẹ oḅori-sọarị atomi ḍuko ḅo tẹ mịẹye ḅụ sọ ḅẹ gberie sọ ofori.
8Ja atomi kuromarị ọḅụ-fị ḅụụ-gbiripuma aị kọrịarị; in minini wararị mịnẹ anị inetẹ ḅẹẹye-ḅẹẹye mịẹ ḅa.
9Í ḅiiarị ị́ mịẹarị ye kịnị ḅụụ-ḅẹlẹ ḅẹḅẹ, wẹrịso ịn pịrị in si kẹ ị́ mịẹ sakị. Tomḅọ mịẹ asi kẹ ḅioḅọrọma-a mẹ ikia kan-arị.
10Sịḅịḅio nyanaḅọ mẹ gbọrụ ḍiki-ịganị ḅụ ḍawọ ḅoarị ye sakị sọnọa si kẹ oḅori-ḅọ fomu tẹrẹmẹ ọ̀ ḍawọarị ye nẹngịm.
11Fị mbasị-oku-mẹnjịḅọ kịka tẹ ḅo si-sịḅịḅio-sụarị apụ ma gbaịn ḅa, anie sakị mamgba ḅụụ-fụka dogi-ḅo tomi pịrịarị apụ ma.
12Tomi ḅara-ḅio awọmẹ pụkọ-ọkị tẹ tuu na bịama iḅi oḅori-ḅọ tẹ ori apantu amịẹaị mịẹarị ḅọ na bịama nẹngịm.
13Í siye kẹ iḅiye gbẹarị ḅẹḅẹ, gbala-gbala siye ị́ warị ḅio paka-so ḅịa.
14Ye-nụnụa minji dasịẹma-ye tarị siiarị anga kịkam; anị dasịẹma tẹrẹmẹ anị ḅo si ḅaka sakị la.
15Ḅẹrẹ-pẹlẹ mịẹ ofori ḅọ ḅara sima, anịanịa si-sịḅịḅio-sụaḅọ ḅe ḅẹ tẹ ọ̀ ḅẹrẹ-ḅarasii-a ḅara kẹ so ma — maaịn ma KỊNỊNYANAḄỌ ḅe ḅioḅumarị.
16Oḅori-ḅọ ye ḍawọ gotẹ famarị igbigi gbọrụ iḅi sọ kẹ ọ̀ mịẹ-a, inweni-mgba nimi na-iḅi ye sọ ò nimi-a ẹrẹsị.
17Ikiapụ sakị mamgba ịn nyana ḅẹlẹma ḍie-pakamarị. Ndẹẹ mịnapụ sime pịrị ye ịn sọ tẹ ḅụụ-fụka da-a kụma?
18Inweni-mgba nimi na-iḅi kalịye sọ nimi-a ḅọ mẹ anie jụmọ fị-saa ḅẹ onyo-sẹịn ḅarịye.
19Si mịẹ na ḅụụ-fụka dogi-ḅo na kịkarị. Ị́ sakị mamgba opu ma ḅụụ-bomarị ḅẹḅẹ, ị́ ḅụụ-fụka sịn ḅụụ pịrịarị.
20Ḅẹḅọ-ḅẹḅọ tẹ siye kuroma tẹ pịkị ẹkwẹn pakamarị ḅọ, inetẹ iḅiye nwẹn-sịn ye ḍọkị-ẹrị ḅịa — opu fa ngẹrị.
21Ḍaḅọ tẹ oḅori-sọarị tụḅọ nyana ḅọ ḅẹ, sime mḅọ pịrị ye anie ḅioḅẹngbọ si na kururu na.
22Ḅioḅẹngbọ feke-feke ḅara sime mẹ anị oju iḅimarị. Sakị mamgba jụụ sime mẹ, anị sarasarama fị dogi-ḅoarị.
23Ḅara fịafịa-a ḅẹrẹkọn-apụ ma ḅọị-anga ọḅụ-fịarị anị tẹso karakara ḅẹrẹ ḅarị kọn-a.
24Sịḅịḅio nyanaḅọ mẹ kuromarị mḅọ nimi ḅara kẹ ye mịẹ, kụma oḅori-ḅọ mẹ gbọrụ anga tọn ḅara amịna mịẹ mịẹ-a.
25Oḅori-sọarị tụḅọ ḅe ḅioḅẹngbọ si dogi-ḅo ḍaḅọ pịrịarị, pịkị akụ-tẹmẹ ḅụ ḅo tiye-ì-gbo kẹ iyingiḅọ pịrịarị.
26Anị kura-a, ḅara-fịafịaḅọ siri-ḍiyeye fama mẹ. Karakara ḅẹrẹkọn ḅarị ofori, mịẹye-ofori apụ fomu-ḅara da tẹ ḅẹḅẹ.
27Amịna ḅụụ nimi wararị ḅọ sakị mamgba ẹkwẹn-ẹkwẹn-a. Yaụ-simearị apụ anie karakaramatẹ ye ḅio sime-ḅara nimi apụ. 28Arịmgba ḅẹ kunoma ḅụ, oḅori-ḅọ ḅe sọ kịnị kuroma ḅa ò ye-nimi tẹ sịḅịḅio nyana wararị, ọ̀ nwẹnị yaụ-sime tẹ amịna ḅịḅị-ọlọ wararị ḅẹ kụma.
Currently Selected:
Egberima-Ẹkwẹn 17: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria