Egberima-Ẹkwẹn 16
16
1Ẹbịsịya wa inetẹ wa mịẹ ḅẹ aị tọn ḅa, kụma kunoma ḅịḅị mẹ, Tamụnọ nyanam.
2Ẹbịsịya í kuroma ḅa ị́ mịẹarị ye kuram, kụma KỊNỊNYANAḄỌ ḅe í gotẹ mịẹarị aị ma kọn-arị.
3KỊNỊNYANAḄỌ ḅe tẹkẹ tẹ ori ị́ tọn-arị aị ma boma, anịsakị ị́ arị mịẹarị sakị arị ḅo bebe aị sọ tẹẹ.
4KỊNỊNYANAḄỌ ḅe ọ̀ tẹmẹ ye goyegoye kẹ kunoma ḅẹ ye tọn wararị; tẹ si-sịḅịḅio-sụa apụ ma kunoma anie fịị gulugulu.
5KỊNỊNYANAḄỌ ḅe opu ẹkwẹn kọn-arị ḅọ goḅọ-goḅọ ḍiki-ḅioḅuarị; gbala-gbala ọ̀ ḍụkụ tẹ fomu-ḅara ịn gbarị ḅịa.
6Sịḅị-tuu tẹ pịkị ḅioḅẹngbọ kẹ ḅụụ ḅụ gbana na-iḅi ḅara simee, tẹ Tamụnọ í si-wẹrịso ḅa. KỊNỊNYANAḄỌ ḅe ḅịḅị pokii, anịsakị gbọrụ siye sọ ị́ ḅụụ paka ḅịa.
7Ị́ mịẹ ye KỊNỊNYANAḄỌ ḅe ḅụụ-ḅẹlẹarị ḅẹḅẹ, í inetẹ mịẹ tẹ si kẹ ị́ tọn-arị apụ í ikiapụ sọ ḅa.
8Kịnị mingirima-a ḅara kẹ nyana ḅo ḅo-a kalịye mẹ iḅi mingirima ḅọkọ ḅụ nyana ḅo tọnwa aị nẹngịm.
9Ẹbịsịya ị́ ị́ mịẹ ḅẹ aị tọn sara ḅa, kụma Tamụnọ mie mịẹ aị ma datụkụma ḅarịye.
10Amadaḅọ ḅe Tamụnọ kẹ ọ̀ pịrị kụrọ mie ọ̀ kẹ ẹkwẹn-arị; ori tọn pẹlẹ tẹ ye mẹ sakị mamgba kuram.
11KỊNỊNYANAḄỌ ḅe ḅiiarị mịnẹ ye-tọnye goyegoye mingirima anị ḅụ mịẹ ma, tẹ dẹrịye goyegoye anị la na-iḅi ḅịḅị la.
12Amadapụ inetẹ siye daa-ọkị ḅịa, karakara mịẹ anie ama-da kọrịnama mẹ mịẹ tẹ anị sịẹarị ẹrẹsị.
13Amadaḅọ ḅiiarị ọ̀ karakara mẹ naa, tẹ ori iḅi ḅara kẹ anị ḍukoarị ḅọ na mịẹ ḅa.
14Ye-nimi tomḅọ ḅụụkụrọma tẹ amadaḅọ ḅe ḅioḅẹlẹma ḅa; amadaḅọ ḅe ịganị-ịganị, ẹbịsịya gbọrụḅọ fịị ḅa.
15Amadaḅọ kẹ kịnị tọn-arị iḅi mẹ kịkarị ye anie kụra aya-ḅịḅị ḅụ eene ọkị-ḅoarị oḅuto — anịanga ḍumo emi.
16Nimi na ḍawọye na nyana kpọma iḅi golu na seleḅa na nyana nẹngịm.
17Ini tẹ iḅi wararị apụ ma ịn ḅọrọ ye-muarị etela ḅụ in siye kọkọrọarị; mie ḅụ í muarị anga ẹbịị — anị í ḍumo ḅọrọma ḅa.
18Ḅụụ-gelema tomḅọ ḅọrọma mu gulugulu fịị ḅio suu-suum, tẹ opu ẹkwẹn tomḅọ ḅịkịma gbereima koroma-koromam.
19Ḅụụ-iderima tẹ igoin tẹ koro-sime iḅi Opu ẹkwẹn-kọn-apụ ma ḅẹ gbọrụḅọ-sọ tẹ ịn fọịn ḅo-aị ma ḅụ ḍiekiri nyana nẹngịm.
20Ịn kẹ í toluma tẹ ye mẹ kẹ ye-sịn, anịsakị ye ị́ na iḅi ḅa; KỊNỊNYANAḄỌ kẹ ḅiokpọmaa, anịsakị í ḅioḅẹlẹ ḅa.
21Ye-nimi wararị tẹ tomḅọ-la tẹ ḅọ mẹ mḅọ kẹ yefieye naarị ḅara mie ịn kẹ mḅọ nimiarị. Ori ẹkwẹn ḅụụ-ḅẹlẹma la ḅara anie ọ̀ pịkị kẹ tomi fẹ-fẹ ḅụụ pịrị ḅakarị ḅara.
22Ye-nimiapụ ḅụ nimi anie ḍumo ngụngụḅa, kụma ḅụụ-kọsị tẹ ye kẹ apantu amẹẹ ma toluma mẹ anie sakị fama mịẹ.
23Sịḅịḅio nyana apụ ma in kuroma tẹrẹmẹ mie ini ẹkwẹn-arị; ọkọ ẹrẹsị in ḍukoarị ye mẹ nwẹnị kịnị fẹ ịna ḅụụ pịrị ḅakarị.
24Dein tẹ iḅi ẹkwẹn ma ḅẹm na kịkarị — ḅịḅị-ḅio ḅẹlẹarị, pịkị ḍumo iḅimarị.
25 #
Egb 14.12
Í kuromarị karakara etela nwẹn ḅẹẹ ye mẹ, ẹbịsịya ị́ ḅọrọma mu fịị ḅio suu ḅa.
26Kọrịnama-kọrịḅọ ḅe ọ̀ fị ḅẹ ye gotẹ kụrọma namakọrị tọrọkọ-tọrọkọ muarị, ọ̀ fị furo ḅinma ḅẹ ḅara.
27Si atomi in ye kẹ jen-apụ lama ḅẹ aḅọkọ ḍọkịarị; ịn kọn-arị ẹkwẹn ma ngẹrị ḅụ sọ si kọrị pakarị, fịnị ọkụ.
28Si-sịḅịḅio-sụa atomi mie ọḅụ-ẹkwẹn kẹ ama-kan-arị; ịn ḅụụ-fụka dogi-ḅo tẹ ikiapụ kan-arị.
29Kụrọ-kụrọ amịẹaị mịẹarị apụ oḅori kẹ ịna ikiapụ sịn tẹ ịn ḅọrọma mu ḅụụ-fụka ḅio suuarị.
30Aka-fanga tẹ si-tọrụ kẹ í ḍikiarị apụ ma ẹbịị; ịn gbọrụ siye kuroma ị́ pịrị tẹẹ.
31Nangwọ ḍumo anie sime karakaraye-mịẹapụ pịrị gbẹẹ-ye mẹ, iḅulu anie ebube nyana amada-sun.
32Ye-inema iḅi opu kụrọ nyana nẹngịm. Ị́ ị́ ḅụụ-ọlọ sịẹma mẹ iḅi ḅẹrẹtọn bebe opu ama-ama pịrị nẹngịm.
33Tomi apịan-sụarị ịn Tamụnọ ḅiiarị ye nimi ḅẹ ḅara; kụma Tamụnọ mie ḅarana ye sime ḅẹ ḅara tọn-arị.
Currently Selected:
Egberima-Ẹkwẹn 16: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria