Kịẹn-aḅịḅị 32
32
Jodanị Mẹ Ḅẹ Ịrụa-saakịarị-anga Ḅẹ Afuro Ma
(Dit 3.12-22)
1Mịọkụ Rubẹnị owiapụ-awọmẹ na, Gadi owiapụ-awọmẹ na gburo-gburo lamatẹ ḅara kẹ opu anama ogbo nyana simem; tẹ ịn ḅo Jaza ama mẹ na, Gilẹdị ama mẹ na ẹrị sakị, ḍikii, ye-yọ mẹ anie sime opu anama pịrị na-iḅi ye-yọ. 2Mie ḅụ Godị owiapụ-awọmẹ ma na, Rubẹnị owiapụ-awọmẹ ma na nwẹnị Mozizi na Ẹlịyeza, agbamịẹḅọ ḅe na, tomina-ogbo mẹ ḅẹ tọrọkọ-tarịapụ ma na dama-ḅo tẹ ịn ḅẹẹ, 3“Atarọtị na, Dibọnị na, Jaza na, Nimira na, Ẹsịbọnị na, Elehale na, Sebamu na, Nebo na, Beyọnị na, 4ama ma tẹ KỊNỊNYANAḄỌ ḅe Izirẹlị ḅẹ tomina-ogbo mẹ tọrọkọ ḅụ ḅaa ama ma anie sime opu anama pịrị na-iḅi ama; anịsakị ị́ afịrịmẹnjịapụ opu anama nyana wararị.” 5Tẹ ịn nwẹnị ḅẹẹ, “Ọmịna ḍiki-tọrụ ḅụ ó wamịna aḅụụ ḅioḅẹlẹ nyanam ḅẹḅẹ, yee mị ama mẹ sime ọmịna afịrịmẹnjịapụ anị nyana pịrị; wa ọkị tẹ kẹ Jodanị mẹ saḅama.”
6Kụma Mozizi nwẹnị Gadi owiapụ-awọmẹ ma na, Rubẹnị owiapụ-awọmẹ ma na pakịrị, “Ọmịnị mịanga lẹgị-sime tẹ ọmịna amịnapụ ọmụ mẹ mu ḅẹ? 7Ó tiegotẹ Izirẹlịapụ ma ḅioḅẹngbọ lọkọma ḅa mẹnjị saḅa mu ama mẹ tẹ KỊNỊNYANAḄỌ ḅe kẹ ịn pịrị tẹ ama mẹ ḅio sọ-mu ḅụ? 8#Kịẹ 13.17-33Mị-ḅara mie ọmịna aḍapụ mịẹ ḅara Kadẹsị-Baniya ḅụ arị ịn fịrịmam mu ama mẹ ẹnyẹ nwẹn ḅẹẹ sakị. 9Kẹ gotẹ ọkọ ḅẹẹarị, ini iwo mu Ẹsịkọlị ḅẹ Tụndụ Ogboku mẹ la tẹ ama mẹ ẹrị sakị, ini Izirẹlịapụ ma ḅioḅẹngbọ lọkọmam mẹnjị ama mẹ tẹ KỊNỊNYANAḄỌ ḅe kẹ ịn pịrị tẹ ama mẹ ḅio sọ-mu ḅụ. 10#Kịẹ 14.26-35Tẹ anị ene mẹ ḅụ, KỊNỊNYANAḄỌ ḅe ịganị kẹngẹmam, tẹ ò ye karị ḅara kẹ ḅẹẹm, 11‘Tụkụma ḅara ḅụ owiapụ ma tẹ Ijiputi ama mẹ ḅio paka-ḅo apụ ma ḅụ si kụra sịḅị ḅụ ḅọrọtẹ apụ ḅụ saakị iwo gbọrụḅọ-sọ ama mẹ tẹ à kẹ Ebira-amụ na, Ayịzịkị na, Jekọbụ na pịrị ḅẹ ye karị ḅara kẹ ḍuko ama mẹ tọrụngbọ kẹ anị ẹrị ḅịa, gbala amụ ịn gbọrsịḅị ì ḍukamẹnjị-a ẹrẹsị; 12Gbọrụḅọ-sọ ofori Kẹlẹbụ, Kẹnịzị ḅẹ Jefune owiḅọtụḅọ ḅe na, Nọnị owiḅọtụḅọ Jọsụwa ḅe na saakị sikima, gbala ịn gbọrsịḅị KỊNỊNYANAḄỌ ḅe ḍukamẹnjị tẹ ẹrẹsị. 13Tẹ KỊNỊNYANAḄỌ ḅe ịganị kẹngẹma Izirẹlị ọgọnọ saram, tẹ ori ịn mịẹtẹ ịn kụra amesi kẹ ịkpa mẹ ḅio ikelekelem, nwenii anị ḅụọ ḅẹ apụ mamgba tẹ KỊNỊNYANAḄỌ ḅe ḍiki-tọrụ ḅụ siye mẹ mịẹ apụ ma fịị famam. 14Anịsakị ḍikii, ọmịnị ọmịna aḍapụ ma kiri ọkị tẹ si-aị si-aị mịẹ apụ sọ tẹẹ, mịẹtẹ KỊNỊNYANAḄỌ ḅe ḅalafama owi-ịganị mẹ paa Izirẹlị da-da paka ḅẹ ḅara. 15Kẹ gotẹ ọkọ ḅẹẹarị, ọmịnị ò ḍukamẹnjị ḅụ ọmịna tọrụ pịkị sin, sin, ọ̀ pịkị sin ịn wẹrịso ḅa ịkpa mẹ ḅio, tẹ ọ́ mịna atomi mamgba ḅaa fama ḅa.’ ”
16Anịtẹso ịn nwẹnị sọma ḅo Mozizi kpeki tẹ ḅẹẹ, “Wa anana ma na oḅori ma na kobiri, kobiri sime ḅarị anga nama anana ma na oḅori ma na pịrị ḅa, tẹ opu ama nama, nama tẹ ḍọkọḍọkọ-awọmẹ ma pịrị ḅa. 17Kụma wa ọmụ-aị ọkị tẹ ḅụụ tẹlẹma Izirẹlịapụ ma tọrọkọ tarị pịrị ḅa, nwenii wa ini ọkị-ḅo ịna sime-yọ ḅụ wẹrị ḅa; anịsakị ama ḅẹ apụ ma gotẹ, wamịna ḍọkọḍọkọ-awọmẹ ma ọmụ kiki ḅara kẹ nama kụrọma wararị opu ama ma ḅio anga ḅa. 18Wa pịkịma wamịna ama ḅo ḅịa nwenii Izirẹlịapụ ma ọrụḅọ-ọrụḅọ amịna sime-anga nyana tẹ anga ḅa. 19Kẹ gotẹ ọkọ ḅẹẹarị, wa ini na Jodanị mẹ ḅẹ osi pakịrị anga mẹ ḅụ ọkị mu ḅụ ḍuu fị gboloma ḅịa; gbala wamịna ḍuu Jodanị mẹ ḅẹ ịrụa-saakịarị-anga ḅụ ḅo wa pịrị tẹ ẹrẹsị.”
20Mie ḅụ Mozizi nwẹnị ịn ḅẹẹ, “Ọ́ nwẹnị miemẹ mịẹ ḅarị ḅẹḅẹ, ọmịnị ọmụ mẹ gotẹ ọmụ-aị ọkị tẹ KỊNỊNYANAḄỌ ḅe tọrọkọ ḅụ ọmụ mẹ mu ḅarị ḅẹḅẹ, 21anịsakị ọmịna aḅụụ ọmụḅọ goḅọ-goḅọ KỊNỊNYANAḄỌ ḅe tọrọkọ ḅụ Jodanị mẹ saḅa-koro ḅa, nwenii mḅọ, mḅọ tọrọkọ ḅụ mḅọ na fịya-a apụ ma dee pakama fama ḅa, 22tẹ ama mẹ KỊNỊNYANAḄỌ ḅe tọrọkọ ḅụ sịḅị-tuu ḅa; anịtẹrẹmẹ, aniemẹ ḅọrọ sakị ọ́ pịkịma-ḅo ḅa, ọ́ nyanatẹ mịẹ KỊNỊNYANAḄỌ ḅe na, Izirẹlị na pịrị na-iḅi ye mịẹ tẹ sịḅị nyana tẹ ḅara ḅụ; anịsakị mị ama mẹ KỊNỊNYANAḄỌ ḅe tọrọkọ ḅụ ọmịna nye sọ ḅa. 23Kụma ọmịnị ọkọ mịẹ ḅịa ḅẹḅẹ, ó si kẹ KỊNỊNYANAḄỌ ḅe mịẹ tẹ, anịsakị piki-pikiye-ofori ḅara ḅụ ó nimii, ọmịna si ọ́ ḍọkị pakama-ḅo ḅa. 24Ọmịnị opu ama nama, nama ọmịna ḍọkọḍọkọ-awọmẹ ma pịrịị, pịkị nama ma kobiri, kobiri sime ḅarị anga nama ịn pịrịị, tẹ ọmịnị ó minini tẹ ye mịẹ.”
25Gadi owiapụ-awọmẹ ma na, Rubẹnị owiapụ-awọmẹ ma na nwẹnị Mozizi ḅẹẹ, “Ị́ afịrịmẹnjịapụ wa nyanaḅọ ḅe tọn ḅara mịẹ ḅa. 26Wamịna ḍọkọḍọkọ-awọmẹ na, wamịna sime-ereme na, wamịna anana na oḅori na ogbo-ogbo ma na, wamịna opu anama mamgba na anịjụ Gilẹdị ḅẹ opu ama ma ḅio sime ḅa; 27kụma ị́ afịrịmẹnjịapụ saḅa-ḅọrọ ḅa, owiḅọ tẹ ḅụụ tẹlẹma ọmụ pịrị wararị ḅọ goḅọ-goḅọ KỊNỊNYANAḄỌ ḅe tọrọkọ ḅụ owu mẹ sọ ḅa wa nyanaḅọ ḅe tọn ḅara ḅụ.”
28 #
Jọs 1.12-15
Mie ḅụ Mozizi ịn gbolomaye ḅụ tọn Ẹlịyeza agbamịẹḅọ ḅẹ na, Jọsụwa Nọnị owiḅọtụḅọ ḅe na, pịkị Izirẹlị ḅẹ ḍa awarị-warị asịḅịdapụ ma na pịrịm: 29Mozizi ịn ḅẹẹm, “Gadi owiapụ-awọmẹ ma na, Rubẹnị owiapụ-awọmẹ ma na, owiḅọ goḅọ-goḅọ tẹ ḅụụ tẹlẹma tẹ KỊNỊNYANAḄỌ ḅe tọrọkọ ḅụ owu mẹ sọ ḅa, tẹ ọmịnị na Jodanị mẹ saḅa, tẹ mịẹtẹ ama mẹ ọmịna tọrọkọ sịḅị-tuu ḅẹḅẹ anịrẹ ó Gilẹdị ama mẹ kẹ ịn pịrị tẹ ini anị ọkị nyana ḅa. 30Kụma ịn ḅụụ tẹlẹma owu pịrị-a ḅara kẹ ọmịnị na saḅa ḅịa ḅẹḅẹ, ọmịna ogbo-ḅio ḅụ mie ịn ye nyana ḅarịye Kenanị ḅẹ ama mẹ ḅio.”
31Gadi owiapụ-awọmẹ ma na, Rubẹnị owiapụ-awọmẹ ma na nwẹnị pakịrị, “KỊNỊNYANAḄỌ ḅe kẹ ị́ afịrịmẹnjịapụ ḅẹẹ tẹ ḅara, anị ḅara mie wa mịẹ ḅarị ḅara. 32KỊNỊNYANAḄỌ ḅe tọrọkọ ḅụ wa ḅụụ tẹlẹma ọmụ pịrị ḅara kẹ saḅa-ḅọrọ Kenanị ḅẹ ama mẹ ḅio sọ-mu ḅa, tẹ wa nyana ḅẹ sime-anga mẹ paa wamịnị na anị sime-ḅara sime ḅa Jodanị mẹ saḅa anga ḅụ.”
33Mozizi nwẹnị Siyọnị, Amọrayịtị apụ ma amadaḅọ ḅe ama-da iri mẹ na, Ogu, Basani ḅẹ amadaḅọ ḅe ama-da iri mẹ na, arị ḅẹ opu ama ma na, kala-ama ma na, bebe opu asịẹ ma ikelema-koro kẹ Gadi owiapụ-awọmẹ na, Rubẹnị owiapụ-awọmẹ na, Josẹfụ owiḅọtụḅọ Manasẹ furo mẹ kẹ maa anga ḍiya ḅẹ gbọrụ anga na pịrị. 34Gadi owiapụ-awọmẹ ma nwẹnị ọmụ kiki ḅara kẹ Dibọnị na, Atarọtị na, Arowa na, 35Atịrọtị-Sofanị na, Jaza na, Jọgụbeya na 36Bẹtị-nimira na, Bẹtị-eranị na nama pịkị nama ḍikiḍiki anga nama. 37Rubẹnị owiapụ-awọmẹ ma nwẹnị Hẹsịbọnị na, Elehale na, Kiriyatahịmu na, 38Nebo na, Balị-mehọni (Mị ẹrẹ mẹ ịn ḍimam) na, sibima na namam; ịn ja ẹrẹ kẹ opu ama ma tẹ ịn nama aị ma sịnm. 39Anịsakị Manasẹ owiḅọtụḅọ Mekiri owiapụ-awọmẹ ma Gilẹdị mum tẹ anị ọkịm, tẹ Amọrayịtị apụ ma tẹ anị ḅio sime apụ ma dee-siinm. 40Tẹ Mozizi Gilẹdị kẹ Mekiri, Manasẹ owiḅọtụḅọ ḅe pịrịm, tẹ ori anị ḅio koro tẹ angam. 41Manasẹ owiḅọtụḅọ Jeya mu ịna kala-ama ma ọkịm tẹ ịn sịnm, Avivọtị-Jeya. 42Noba pịkị mu Kinatị na anị ḅẹ kala-ama ma na ọkịm tẹ ori ẹrẹ kẹ anị kurom, Noba.
Currently Selected:
Kịẹn-aḅịḅị 32: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
