Kịẹn-aḅịḅị 24
24
1Balamụ ẹrịm mịnẹ Izirẹlị boma mẹ anị KỊNỊNYANAḄỌ ḅe ḅụụ-ḅẹlẹm ḅẹ sakị, ọ̀ ḅarị osi asakị ḅụ ò mu paka ḅẹ ye ḅẹ elekima ḍiki, ḍiki ḅara mẹ mu-a, kụma ori ọ̀ tọrụ kẹ ịkpa mẹ da wẹrịm. 2Balamụ nwẹnị ọ̀ tọrụ saakị tẹ Izirẹlị ẹrị furo-furo ḅụ ini akpụrụ-warị pike, pike tẹ kobiri wararị. Tẹ Tamụnọ Tẹmẹ ḅe nwẹnị ḅo ori ọgọnọ gbana, 3tẹ ọ̀ nwẹnị ori ẹkwẹn saakị kọọn, tẹ ḅẹẹ,
Balamụ, Bẹyọ owiḅọtụḅọ ḅe oku-ḅịḅị mẹ,
oriḅe tẹ tọrụngbọ finji wararị ḅọ ḅe oku-ḅịḅị mẹ,
4ori ḅe tẹ Tamụnọ ẹkwẹn-aḅịḅị naarị ḅọ ḅe oku-ḅịḅị mẹ,
Kụrọmamgba Nyanaḅọ ḅe ịkịan ẹrịarị ḅọ ḅe,
ḅịkị koroarị kụma ori atọrụngbọ finji wararị:
5yei Jekọbụ, ị́ akpụrụ-awarị ma kọn iḅi,
yei Izirẹlị, ị́ akobiri-ogbo ma tọrụ-gbẹ ḅara!
6Gbala tụndụ ogboku tẹ sụụn ala-jụ mu wararị aị sime-ḅara;
gbala tọrụ akaka emi aḍụọ sime-ḅara;
gbala ịn kẹ alosi sịn-arị sịn mẹ tẹ KỊNỊNYANAḄỌ ḅe ḍiḅi ye sime-ḅara;
gbala minji mẹ akaka simearị sida nwẹn sin opu asịn sime-ḅara.
7Minji ori agbakuru ma ḅụ seri ḅa,
tẹ ọ̀ sịnmgbọlị tọnwa minji ḅio sime ḅa.
Ori amadaḅọ gele Egagị nẹngị ḅa,
tẹ ori ama-da saakị gele ḅa.
8Tamụnọ Ijiputi ḅụ ọ̀ pakama-ḅom;
Ori owu-sọ ịn pịrịarị ḅara gbala piri-ḅio-ḅẹ pootẹ-nambulo ọkụ;
ori ori na ọmụ gbin-arị opu asịẹ ma
pẹị-siin fama ḅa,
tẹ ịna mgbe ma kẹ pakịrị, pakịrị anyịma ḅa,
tẹ ịna aḍịẹịn ma kẹ ịn kpịra
kpịra toluma ḅa.
9 #
Suk 49.9;
Suk 12.3
Ori ikom, ori ọkụkụ mono ḅara monom,
na ịyọrọ ọkụkụ mono ḅara na
tụḅọ ò jike saakịma ḅẹ?
Í boma ḅọ goḅọ-goḅọ, boma sime mḅọ pịrịị;
anịsakị wori-nume sime í wori ḅọ goḅọ-goḅọ pịrịị.
10Balakị nwẹnị ịganị nyana Balamụ pịrị, tẹ nwẹnị ori aḅara farị; tẹ Balakị nwẹnị Balamụ ḅẹẹ, “Àrị ị́ sịnm ḅo ị̀ na fịya-a apụ worii, kụma ḍikii, mịna tẹra sakị ma ḅụ boma mie í ịn boma ye. 11Anịẹrẹsị mịọkụ ḍumo-mangị kọn ị́ ama muu. À ḅẹẹm, ‘Piki-pikiye-ofori ḅara ḅụ à kụn kẹ ị́ pịrị ḅa’, kụma KỊNỊNYANAḄỌ ḅe gbẹẹ-ye nyana ḅụ ị́ ọlọ ọḅụ dama tẹẹ.”
12Balamụ nwẹnị Balakị pakịrị, “Í oku-mẹnjịapụ, inima tẹ ị́ kẹ ị̀ fịrịma apụ ma ịn ḍuko ị́ pịrị-a. 13Balakị nwẹnị ọ̀ warị golu na, seleḅa na ḅin wararị ye kẹ ị̀ pịrị sọ, à KỊNỊNYANAḄỌ ḅe ẹkwẹn-ḅịḅị mẹ saḅa, tẹ yẹrị tọn ye iḅiye, anịanịa siye mịẹ ḅịa, KỊNỊNYANAḄỌ ḅe ẹkwẹn ye mẹ anie mie àrị ẹkwẹn ḅarịye?”
Balamụ Koro Kunoma Ịkịan
14Anịsakị mịọkụ ḍikii, à so ị̀ atomi ḍọkụma-muarị; ḅoo, à mịẹtẹ mịna atomi ma kẹ kunoma ene ma ḅụ ị́ atomi mịẹ ḅarịye í nimi ḅa. 15Tẹ ọ̀ nwẹnị ori ẹkwẹn saakị kọn, tẹ ḅẹẹ:
Balamụ, Bẹyọ owiḅọtụḅọ ḅe oku-ḅịḅị mẹ;
oriḅe tẹ tọrụngbọ finji wararị ḅọ ḅe oku-ḅịḅị mẹ;
16oriḅe tẹ Tamụnọ ẹkwẹn-aḅịḅị naarị ḅọ ḅe oku-ḅịḅị mẹ,
tẹ Geletẹịn ḅọ ḅe nimi mẹ lekiri wararị ḅọ,
Kụrọmamgba Nyanaḅọ ḅe ịkịan ẹrịarị ḅọ
ḅịkị koroarị kụma ori atọrụngbọ finji wararị ḅọ.
17Àrị ori ẹrịm, kụma mịọkụ-a;
àrị ò ḍikim, kụma ò kpeki-a;
Jekọbụ ḅụụ ḅụ gbọrụ lolia paka-ḅo ḅa,
anịsakị Izirẹlị ḅụ gbọrụ ama-da mkpara paka-ḅo ḅa;
anị Mohabụ sịḅị gbẹẹ kọsịma ḅa,
tẹ opu amịẹaị na, ye kẹ kịnị lamarị apụ ma
owiapụ-awọmẹ mamgba ḅaa fama ḅa.
18Idọmụ nyana apụ ḅarị paka ḅịa.
Siya sọ arị na fịya-a apụ,
anị nyanapụ ḅarị paka ḅịa,
Izirẹlị paa owu-ḅara-iḅi-ḅi ḅa.
19Jekọbụ ḅụ kụrọ paka tẹ ọ̀ nanga ḅọrọ ḅa,
tẹ opu ama ma ḅẹ kirikọn-apụ ma fịị fama ḅa!
20Anịtẹso ọ̀ nwẹnị tọrụ saakị Amalẹkị ḍiki,
tẹ nwẹnị ori ẹkwẹn saakị kọn, tẹ ḅẹẹ:
Amalẹkị anie opu asịẹ ma ḅụ tọrọkọ tarị sime ye
kụma kunoma ḅụ ò ḅo ḅa, fịị fa ḅụ sọ ḅa.
21Ọ̀ nwẹnị tọrụ saakị Kenayịtị apụ ma ḍiki tẹ ori ẹkwẹn saakị kọn, tẹ ḅẹẹ:
Ọmịnị angarị anga mẹ ye ọ́ la ḅịa,
anịsakị ịkụ ọgọnọ ọmịnị ọmịna awarị nama.
22Anị sime-ḅara, sime-ḅara sọ, Keni gulugulu fatẹ yọ sọ ḅa,
Asọ kun-ḅara kẹ ọmịnị ọkị so sakị.
23Ọ̀ nwẹnị ori ẹkwẹn saakị kọn, tẹ ḅẹẹ:
Ịyaa, tụḅọ ḍumo-sime ḅa, Tamụnọ miemẹ mịẹ sakị?
24Kụma opu onwi-arụ Kitimu ḅụ ḅo ḅa,
tẹ ḅụụ-fụka kẹ Asọ na, Ẹba na pịrị ḅa,
tẹ ini sọ ḅọ fịị gulugulu fa ḅa.
25Anịtẹso Balamụ saakịm, tẹ so ori ama mum, tẹ Balakị sọ so ori anga dam.
Currently Selected:
Kịẹn-aḅịḅị 24: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
