Kịẹn-aḅịḅị 23
23
1Balamụ nwẹnị Balakị ḅẹẹ, “Mị yọ ḅụ sọnọma agbamịẹ-anga nama ị̀ pịrịị, pịkị sọnọma owi anambulo na, sọnọma ejimina na ọkị-ḅo ị̀ pịrịị.”
2Balakị, Balamụ kẹ ọ̀ ḅẹẹ ḅara mịẹm; tẹ Balakị na, Balamụ na agbamịẹ-anga ma ḅụ gbọrụ ye, gbọrụ ye ọgọnọ gbọrụ owi-nambulo na, gbọrụ ejimina na kẹ agba mịẹm. 3Tẹ Balamụ nwẹnị Balakị ḅẹẹ, “Ị́ dọkịma-agba mẹ akaka ḅụ sịẹsimee, anịsakị à mẹnjị-so ḅa, ẹbịsịya, KỊNỊNYANAḄỌ ḅe ḅo ị̀ na ẹrịya ḅa, anịsakị ọ̀ kẹ ì ḍie ye, ḍie ye à ḍuko ị́ pịrị ḅa.” Tẹ ọ̀ so kikima-a geletẹ tụndụ ọgọnọ mum. 4Tamụnọ ḅo Balamụ na ẹrịyam tẹ Balamụ nwẹnị ọ̀ ḅẹẹ, “À sọnọma agbamịẹ-anga ma tẹlẹma tẹ anịsakị gberie-gberie ọgọnọ à pịkị gbọrụ owi-nambulo na, gbọrụ ejimina na kẹ agba mịẹ tẹ.”
5KỊNỊNYANAḄỌ ḅe nwẹnị ẹkwẹn ḅịḅị kẹ Balamụ ḅịḅị-ḅio suu, tẹ ḅẹẹ, “Pịkịma-so Balakị dama-mu anịsakị mị-ḅara mie ị́ ẹkwẹn kọn ḅarị ḅara.” 6Tẹ ọ̀ pịkịma-so ọ̀ dama-mum, tẹ ẹrịm ori na Mohabụ ḅẹ sịḅịdapụ mamgba na, ọ̀ dọkịma-agba mẹ akaka ḅụ sịẹsime wararị. 7Tẹ Balamụ nwẹnị ori ẹkwẹn mẹ saakị kọn tẹ ḅẹẹ:
Eramụ ḅụ mie Balakị ì ọkị-ḅo ye,
ịrụa-saakịarị-anga anga ḅẹ tụndụ ma ḅụ.
Mohabụ ḅẹ amadaḅọ ḅe ḅẹẹm:
“Ḅoo, Jekọbụ wori ị̀ pịrịị”,
“inweni-ogbo ḅụ Izirẹlị na tụḅụrụ ẹkwẹn kọn!”
8À tọ-ḅara kẹ inetẹ Tamụnọ amụ wori-a ḅọ wori ḅẹ?
À tọ-ḅara kẹ inweni-ogbo ḅụ ẹkwẹn tụḅụrụma
KỊNỊNYANAḄỌ ḅe amụ ọkọ kẹ mịẹ-a ḅọ pịrị ḅẹ?
9Kẹ gotẹ ọkọ ḅẹẹarị, tụndụ ma sịḅị arị ori ẹrịm,
tụndụ ma ḅụ, à ḍikitẹ ori ẹrịm;
ḍikii ngẹrị angarị tomi kụlọ,
tẹ amịna ḅụụ kẹ sịẹ, sịẹ ma ogbo-ḅio kịẹn suu-a ḅo.
10Tụḅọ inetẹ Jekọbụ fọọn mẹ kịẹn ḅẹ,
anịanịa Izirẹlị ḅẹ ini karama pakịrị mẹ kịẹn?
Yee à dein ḅụ karakaraye-mịẹḅọ kọn fị kọọn,
anịsakị ye ì kunoma ò kunoma sime-ḅara sime!
11Anịtẹso Balakị nwẹnị Balamụ ḅẹẹ, “Í tiye mịẹ ị̀ pịrị tẹ? Àrị ị́ ọkịm, ḅo ị̀ na fịya-a apụ worii; kụma gberie-sọ amụ ị́ mịẹ-a tẹ boma mie ị́ ịn boma ye.”
12Balamụ nwẹnị pakịrị, “À KỊNỊNYANAḄỌ ḅe ḅịḅị poki tẹ ọ̀ kẹ ị̀ ḅịḅị-ḅio suu ẹkwẹn kọn ḅịa.”
Balamụ Maaịn Karama Koro Ịkịan
13Balakị nwẹnị Balamụ ḅẹẹ, “Ḅo ị̀ ḅụụ sọ tẹ wa jen anga mu, í sime tẹ ini ẹrị ḅarị anga; ini aḅụụ kpeki-tẹịn apụ ngẹrị mie ị́ ẹrị ḅarịye, tẹ inimgba ẹrị ḅịa; anị sakị ḅụ anịjụ mẹ ḅụ ịn wori ị̀ pịrịị.” 14Tẹ ọ̀ nwẹnị ori ọkị Zafimu ḅẹ piri-ḅio Pisiga Tụndụ sịḅị ọgọnọ mu, tẹ sọnọma agbamịẹ-anga nama, tẹ agbamịẹ-anga ma gbọrụ ye, gbọrụ ye ọgọnọ gbọrụ owi-nambulo na, gbọrụ anana na kẹ agba mịẹ.
15Balamụ nwẹnị Balakị ḅẹẹ, “Mịanga ị́ dọkịma agba mẹ akaka ḅụ sịẹsimee, yẹrị nwẹnị anịjụ mu KỊNỊNYANAḄỌ ḅe na ẹrịya.”
16KỊNỊNYANAḄỌ ḅe Balamụ na ẹrịyam, tẹ ẹkwẹn ḅịḅị kẹ ọ̀ ḅịḅị ḅio suu, tẹ ḅẹẹm, “Pịkịma-so Balakị dama-muu, anịsakị mị-ḅara mie ị́ ẹkwẹn kọn ḅarị ḅara.” 17Tẹ ori ọ̀ dama-ḅom, tẹ ẹrịm ori na Mohabụ ḅẹ sịḅịdapụ ma na ọ̀ ḅụụ sọ tẹ ọ̀ dọkịma-agba mẹ akaka ḅụ sịẹsime wararị. 18Tẹ Balamụ nwẹnị ori ẹkwẹn saakị kọn, tẹ ḅẹẹ,
Saakịị Balakị, tẹ naa.
Ì pokii, yei Zipọ owiḅọtụḅọ
19Tamụnọ anie tomḅọ-a, mịnẹ ori iruo na-iḅim,
anịanịa tomḅọ iyi tụḅọ, mịnẹ ọ̀ ḅịḅị ḍima na-iḅim,
Jene ò ye ḍuko tẹ amụ anị mịẹ-a?
Anịanịa, ò ye ẹkwẹn tẹ ori anị mịẹ ḅinma ḅịa?
20Ḍikii, bomaa, mie ọ̀ tọn ị̀ pịrị ye:
ò boma tẹ, arị inetẹ anị pekelema ḅịa.
21Jekọbụ ḅụụ amụ ò si-fụḅara ẹrị-a;
Izirẹlị ḅụ amụ ọ̀ ḅụụ-fụka ẹrị-a.
KỊNỊNYANAḄỌ ịna Tamụnọ ḅe ori ini na emii
anịsakị amadaḅọ oloku pọkọ mẹ ịna ogbo-ḅio emii
22Tamụnọ Ijiputi ḅụ ịn pakama-ḅom;
Ori owu sọ ịn pịrịarị ḅara gbala piri-ḅio-ḅẹ pootẹ-nambulo ọkụ.
23Kẹ gotẹ ọkọ ḅẹẹarị, Jekọbụ la-la pileye ofori,
ḅịrịapụ awarị ye ḅii kẹ Izirẹlị mịẹ-mịẹ ye ofori;
mịọkụ Jekọbụ na Izirẹlị na ḅụ ịn ḅẹẹ ḅa,
“Tamụnọ kọrị tẹ ye ẹrị!”
24Ḍikii, gbọrụ tomi kụlọ, ịyọrọ ọkụkụ virikama
saakị ḅara kẹ saakịm,
tẹ ọkụkụ ye mịẹ ḅara kẹ amịna ḅụụ saakị gelemam
ori ò kun pẹị ḅẹ nama mẹ ḅaa-a sime-ogbo
ọ̀ gbene-sime sime-a,
anịsakị ori ọ̀ ḅaa nama ḅe ọmbie ḅuu, ḅuum.
25Balakị nwẹnị Balamụ ḅẹẹ, “Gbala-gbala ḅarị ịn wori, anịanịa ịn boma ma.”
26Kụma Balamụ nwẹnị Balakị pakịrị, “À ḍuko ị́ pịrị-a, KỊNỊNYANAḄỌ ḅe ḅẹẹ ye, ḅẹẹ ye mẹmgba, mie à mịẹ nyana ye?”
Balamụ Tẹrẹị Karama Koro Ịkịan
27Balakị nwẹnị Balamụ ḅẹẹ, “Mịọkụ ḅoo, à pịkị ị́ ọkị jen anga mu ḅa, ẹbịsịya, anị Tamụnọ ḅụụ-ḅẹlẹ ḅa mịnẹ ị́ ịn wori ị̀ pịrị anịjụ ḅụ.” 28Mie ḅụ Balakị, Balamụ ọkị Pẹyọ Tụndụ sịḅị ọgọnọ tẹ sịẹ tẹ ịkpa mẹ ḍikiarị pakịrị anga mum. 29Tẹ Balamụ nwẹnị Balakị ḅẹẹ, “Mịanga ḅụ sọnọma agbamịẹ-anga nama ị̀ pịrịị, tẹ sọnọma owi-nambulo na, sọnọma ejimina na ọkị-ḅo ị̀ pịrịị.” 30Tẹ Balakị, Balamụ ḅẹẹ ḅara mịẹm, tẹ agbamịẹ-anga ma gberie-gberie ọgọnọ gbọrụ owi-nambulo na, gbọrụ ejimina na kẹ agba mịẹm.
Currently Selected:
Kịẹn-aḅịḅị 23: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
