Mayịka 2
2
Igoinḅọ Ponoma Apụ Ẹrị-ẹrị Ye
1Tọ-ḅara la sule-ḅịḅị sime inima tẹ si-sịḅịḅio-sụapụ ma pịrị!
Inima tẹ ḍin mono-a, tẹ ịna iḅila ọgọnọ si tọn ja apụ pịrịarị apụ ma?!
Ene-ḅaa ḅẹ dede-ḅio ḅụ, ịn nwẹnị ịn tọn ye mẹ mịẹ;
kụrọ ịna aḅara emi ẹrẹsị.
2Ḍụọ ịna aḅụụ ḅẹlẹ-ḅẹlẹ, ini arị kọrị ọkịm;
warị ịna aḅụụ ḅẹlẹ-ḅẹlẹ, ini arị ọkịm;
gberie-sọ kpaịn sime tomḅọ mẹ pịrị-a
mḅọ ere-furo-o, mḅọ nyana aị-o.
3Anịẹrẹsị mie KỊNỊNYANAḄỌ ḅe ḍuko yee,
“Ḍikii, à fịị na fa na ọkị-ḅo ọmịna ọgọnọ gbana ḅẹ tọn-arị
ọmịnị inetẹ anị ḅụ mangị-so ḅịa.
Anị kọngọ sụa iku dogiye sọ ọ́ pịrị ḅa,
tẹ ọ́ ḅarị ḅara finji-finji mẹnjị ḅịa.
4Anị ene mẹ ḅụ, tomi ọmịna
fị-na-fa-na elekima mẹ
kẹ ịlụkụ sọma gbaa ḅa,
tẹ ọ́ la ye mẹ kẹ nwẹn sime ḅio-lọkọ nume-su ḅa;
Wa la tẹ kọn ye ofori!
KỊNỊNYANAḄỌ ḅe wamịna ama ọkị tẹ,
tẹ anị kẹ inima tẹ wa kuun-ọkị apụ ma pịrị tẹ.”
5Anieḅụ sakị mẹ ḅo laa tẹ ini ama mẹ
pịkịma KỊNỊNYANAḄỌ ḅe atomi pịrị ḅẹ sakị,
ọmịna aḅụụ ḍiekiri nyana ḅọ ḅarị paka ḅịa.
6Izirẹlị ḅẹ ịkịankoroapụ ma nwẹnị Mayịka ḅẹẹ,
“Ḅarị mịna aị ma ẹkwẹn-ẹkwẹn wa pịrị ma;
Tamụnọ wamịna aḅụụ jịrịma ḅịa.
7Ị́ sịịnm KỊNỊNYANAḄỌ Izirẹlịapụ ma wori wararị?
KỊNỊNYANAḄỌ ḅe ò ḅarị inetẹ ye-inema-a?
Ọ̀ karakara-ḅara-ḅụ nwẹn sime aị mịẹ ḅẹ?
Ori iḅi ẹkwẹn kọn inima tẹ kura-aị mịẹarị apụ ma pịrị-a?”
8KỊNỊNYANAḄỌ ḅe nwẹnị pakịrị,
Sakị ḅụra tẹrẹmẹ, kịnị na fịya-a apụ owu kẹ
ị̀ atomi paka-paka ḅara kẹ ọ́ saakị tẹ owu kẹ
ị̀ atomi pakam.
Owu ḅụ pịkịma ama ḅo apụ ḅiotọn-arị ye ḅarị ịn la ḅịa,
kụma ọmịnị anịjụ emi, tẹ ịna oḅukulo ịna ọgọnọ ḅẹ
akapa siin-ọkị ḅara kẹ ịna kụn siin-ọkị ḅẹ koruarị.
9Ị̀ atomi ma ḅẹ ereme ma, ịna ḅụụ ḅẹlẹma awarị ma ḅụ,
ọmịnị in dee pakamam;
tẹ ịna asambịrịma awọmẹ ma ḅụ ì ebube mẹ saakị siin gbamaso tẹ.
10Ọ́ saakị tẹ soo;
mịanga ọ́ ḅarị jen ḅụụ-dein nyana-a.
Ọmịnị asi mịanga mẹ kẹ ḅaa fama yọ mịẹ tẹ.
11Iruo-iruo oḅori-kẹ-kịnịsịn-arị tomḅọ tẹ ḅẹẹm,
“À tọnwa iru na, fịaị na ịkịan koro ọ́ pịrị ḅa nwẹn ḅẹẹ ḅọ”
mie ịkịankoroḅọ sọ mịna atomi ma pịrị ḅarị ḅọ!
12Tụkụma ḅara ḅụ àrị ọmịnị-mgba kobiri ḅa, yei Jekọbụ warị;
Izirẹlị ḅẹ kirikọn-apụ ma àrị ịn kobiri ḅa;
Àrị ịn koroma gboloma ḅa,
gbọrụ ogbo ḅụ simearị anana koroma ḅara,
anana ogbo amịna iḅi-osuka kiri ḅụ kobiri ḅara,
mie tọnwa tomi pịkị siin ọmịna ama mẹ ḅio ḅin ḅarị ḅara.
13Tamụnọ etela mẹ finji ịn pịrị ḅa,
tẹ omoni-sọ anga mẹ ḅụ etela kẹ ịn ḍie pakama-ḅo ḅa.
Ini opu ama mẹ ḅẹ ogigo-ḅọkọ mẹ kan finji,
tẹ sịḅị nyana ḅara kẹ so ḅa.
Ịna amadaḅọ, KỊNỊNYANAḄỌ ḅe ḅioju,
tọrọkọ tarị ịn pịrị tẹ ịn ḅọrọma pakama ḅa.
Currently Selected:
Mayịka 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria