Matiyo 22
22
Jizọsị Ere-Ịya-Alalị Ḅẹ Egberi Gbaam
(Luk 14.15-24)
1Jizọsị sin ja egberi gbaa-gbaa tẹ kẹ ẹkwẹn tomi ma pịrịm. 2“Tamụnọ Ama-da sakị mẹ mie anị kịkarị ye. Gbọrụ sakị, gbọrụ amadaḅọ, ọ̀ tụḅọ gotẹ ere-ịya-alalị tẹlẹmam. 3Ọ̀ nwẹnị ọ̀ fịrịmẹnjịapụ fịrịma in mu alalị mẹ ḅo ḅẹ tẹ ịn sịn apụ ma ḅẹẹ tẹ in ḅo, kụma in ḅo ḅẹ ḅii-a. 4Mie ḅụ ọ̀ pịkị ja fịrịmẹnjịapụ fịrịma tẹ, in mị oku mẹ kẹ ịn sịn tẹ apụ ma dama-mum: ‘Ị̀ alalị mẹ tẹlẹma tẹ mịọkụ; nambulo ma na tim-tim tẹ opu anama ma na ịn ḅaa tẹ kẹ fịye mẹ mịẹ tẹ, ye goyegoye tẹlẹma fama tẹ. Ọmịnị alalị mẹ ḅoo.’ 5Kụma ọ̀ sịn tẹ apụ ma sịn-ḅịḅị mẹ kẹ ye-sịn-a tẹ ịna amịẹaị mịẹ ḅẹ tẹ ja anga mum; gbọrụḅọ ḍụọ mum, osi-ḅọ ò ye dẹrịarị warị mum, 6tẹ osi apụ fịrịmẹnjịapụ ma kun fomu tẹ ịn ḅaam. 7Amadaḅọ ḅe nwẹnị ịganị lama; mie ḅụ ori ori ọmụapụ fịrịma mu arị kịnị-ḅaapụ ma ḅaa tẹ ịna ama dọkịmam. 8Anịtẹso ọ̀ nwẹnị ọ̀ fịrịmẹnjịapụ sịn tẹ ịn ḅẹẹ, ‘Ị̀ ere-ịya-alalị mẹ tẹlẹma tẹ, kụma à sịn apụ ma anị ḅo gbẹẹ-a. 9Mịọkụ ó mu tẹ opu etela ma ḅụ ọmịnị ẹrịapụ, ẹrịapụ sịn alalị mẹ ḅoo.’ 10Mie ḅụ fịrịmẹnjịapụ ma mẹnjị paka mu tẹ etela ma ḅụ ini inetẹ ẹrị apụ, ẹrị apụ sịn ḅom, iḅi-apụ-o, si-apụ-o gbọrụ ḅara; tẹ tomi nwẹnị ere-ịya warị mẹ ḅin.
11“Amadaḅọ ḅe ḅo apụ ma ḍiki ḅẹ mu sakị, ori ere-ịya kapa sụa-a ḅọ ẹrịm. 12Amadaḅọ ḅe nwẹnị ò gbela, ‘Ikiaḅọ, ndẹẹ í ere-ịya kapa sụa-a ḅara kẹ mịanga sọ-ḅo ḅara? Kụma tomḅọ ḅe ḅịḅị fie-a.’ 13#Mat 8.12; 25.30; Luk 13.28Anịtẹso amadaḅọ ḅe ḍuko fịrịmẹnjịapụ ma pịrịm, ‘Ọmịnị ọ̀ ḅara na ọ̀ ḅụọ na fịnaa, tẹ ọ̀ kẹ gbin pakamaa, tẹ ọ̀ kanakana mẹ ḅio sime. Anịanga ori owu tẹ pịkị aka farị ḅa.’ ”
14Tẹ Jizọsị ẹkwẹn gbaịn ḅụ ḅẹẹm, “Ịn sịn apụ tọnwa apụ, kụma boowa apụ mie ịn sẹlẹ-ọkị ye.”
In Ama-Igbigi Oso Gbolomaye Kẹ Jizọsị Ḅiim
(Mak 12.13-17; Luk 20.20-26)
15Farịsiiapụ ma nwẹnị mẹnjị so tẹ ḅẹrẹ-ḅiya, mịnẹ ịn kịrị-kịrị ḅii-aḅịḅị kẹ Jizọsị ḅii tẹ ọ̀ ḅịḅị paka ḅarịye ḅụ ye kẹ ori ọlọ ḅa. 16Anịtẹso ịn nwẹnị in ḍukamẹnjịapụ ḅẹ jen-apụ na Ẹrọdị pakịrị ḅẹ apụ na kẹ ọ̀ fịrịma. Ịn nwẹnị ọ̀ ḅẹẹ, “Ye-tolumaḅọ, wa nimim mịnẹ ị́yẹrị anie karakara mẹ ḍukoarị ḅọ. Tamụnọ tọn tomḅọ pịrị ye mẹ ḅẹ karakara mẹ mie í tolumarị ye, tomi kuromarị ye bala-a ḅara, gbala í tomḅọ la kiri ḍiki ye mịẹ-a ẹrẹsị. 17Ọkọẹrẹsị, ḍuko wa pịrịị, ndẹẹ í kuromarị ye? Ama oso igbigi kẹ Romu Tomikiri mẹ daarị ḅọ ḅe pịrị mẹ anị wamịna Oloko na kura mụnọọ, kura-a?”
18Anịtẹso, Jizọsị ịn nyana si kuroma mẹ lekiri tẹ ịn ḅẹẹm, “Ọmịnị mịẹ tomi ḍie atomii! Ó tiegotẹ ị̀ da-mu ḅụụ-fụka ḅio suu ḅẹ ḅọkọ ḍọkịarị? 19Ọmịnị ọ́ kẹ ama-oso-igbigi mẹ gbẹẹ-gbẹẹ igbigi mẹ kẹ ì ḍie!”
Ịn nwẹnị igbigi mẹ ọkị-ḅo ọ̀ pịrị, 20tẹ ọ̀ nwẹnị in gbela, “Tụḅọ tọrụkuḅu na, ẹrẹ na, igbigi mẹ ọgọnọ emi?”
21Ịn nwẹnị pakịrị, “Romu Tomikiri mẹ daarị ḅọ ḅe tọrụkuḅu na, ẹrẹ na.”
Mie ḅụ Jizọsị ịn ḅẹẹm, “Ọkọ ḅẹḅẹ iḅim, ó sime Romu Tomikiri mẹ daarị ḅọ ḅe pịrị ye kẹ Romu Tomikiri mẹ daarịḅọ ḅe pịrịị, pịkị sime Tamụnọ pịrị ye mẹ kẹ Tamụnọ pịrị.”
22In miemẹ naa sakị ịna ḅụụ-buam, tẹ ịn nwẹnị ò kuroma mẹnjị so.
In Fị-ḅụ-saakị Gbolomaye Kẹ Jizọsị Ḅiim
(Mak 12.18-27; Luk 20.27-40)
23 #
Fịr 23.8
Anị gbọrụ ene mẹ ḅụ Sadusiiapụ ma ḅẹ apụ Jizọsị dama-ḅo tẹ ḅẹẹm mịnẹ fị-ḅụ-saakị ofori. 24#Dit 25.5Ini mẹẹ, “Ye-tolumaḅọ, Mozizi ḅẹẹm, mịnẹ tomḅọ ẹrẹḅọ sime tẹ amụ árị na tụḅọ iyi-a tẹ fị-fịị, mḅọ iyimbere árị na sime tẹ awọ iyi tẹ kẹ fịị tẹ ḅọ ḅe ẹrẹ gotẹ. 25Mị ama sọnọma mịnapụ simem. Ọkpara ḅe ẹrẹḅọ sime tẹ árị na amụ iyi-a ogbo fịị tẹ, ẹrẹḅọ ma koroma ori iyimbere pịrịm. 26Anị gbọrụ ḅara mẹ mie anị paka maaịn karama ḅọ ḅe sọ pịrị ḅara, pịkị tẹrẹị karamaḅọ ḅe sọ, ọkị mu ini sọnọma apụ mamgba la. 27Arịmgba ḅẹ kunoma ḅụ ẹrẹḅọ ma fịịm. 28Anị ḅo fị-ḅụ-saakị ḍumo mẹ la sakị, ẹrẹḅọ ma á tụḅọ taḅọ sọ ḅẹ? Inimgba á sime famam.”
29Jizọsị nwẹnị ịn pakịrị, “Ó nimi la-a ḅara ḍikii! Anị gotẹ ọkọ mịẹarị, ọ́ Fịafịa Ḍiri mẹ na Tamụnọ kụrọ mẹ na nimi-a. 30Kẹ gotẹ ọkọ ḅẹẹarị, fịtẹ-apụ ma saakị tẹ ḅẹḅẹ in So-ḅio ḅẹ enjẹlị apụ na kịka ḅa, tẹ ịn ḅarị owiḅọ na ẹrẹḅọ na sime ḅẹrẹ nimi ḅịa. 31Fịtẹ-apụ ma saakị gbolomaye ḅụ, jen sakị Fịafịa Ḍiri mẹ ḅio Tamụnọ ḍuko ọ́ pịrị tẹ ye mẹ amụ ó go-a? Ori mẹẹ, 32#Pks 3.6‘Yẹrị anie Ebira-amụ na Ayịzịkị na pịkị Jekọbụ na sịḅị-tuu pịrị Tamụnọ ḅee.’ Ori anie ḍumo wararị apụ Tamụnọ, fịtẹ-apụ Tamụnọ-a.”
33Tomi ogbo-ogbo ma miemẹ naa sakị, ini ò tolumaye mẹ ḅụ ḅụụ-bua nyanam.
In Oloko Ma Ḅụ Kụrọ-tẹịn Ye Kẹ Jizọsị Gbelam
(Mak 12.28-34; Luk 10.25-28)
34Farịsiiapụ ma naam mịnẹ Jizọsị mịẹtẹ Sadusiiapụ ma ḅarị ḍuko ḅẹ ye nyana-a ḅẹ sakị, ịn kobirim, 35tẹ ịna ḅụ ḅẹ gbọrụḅọ, Oloko mẹ tolumarịḅọ, gbọrụ ḅii-ḅịḅị kẹ Jizọsị tuu koroma ḅẹ ḍọkịm. 36Ọ̀ gbelam, “Ye-tolumaḅọ, ndẹẹ Oloko mẹ tọn koroma aị ma ḅụ tẹịn ye?”
37 #
Dit 6.5
Jizọsị nwẹnị pakịrị, “ ‘KỊNỊNYANAḄỌ, ị́ Tamụnọ ḅe ḅẹlẹma, í ḅioḅẹngbọ mẹmgba ḅụ, ị́ tẹmẹ mẹmgba ḅụ, pịkị í kuroma mẹmgba ḅụ.’ 38Miemẹ anie ḍụḅatẹịn, tẹ pịkị kụrọ nyana tẹịn tẹ Oloko mẹ tọn koroma ye. 39#Lẹv 19.18Maaịn karama kiri ḅụ kụrọ nyana tẹịn ye mẹ na anị na kịkarị: ‘Ị́ ị́ ḅụụ ḅẹlẹma ḅara kẹ ị́ na kpeki tẹ angarị ḅọ ḅẹlẹmaa.’ 40#Luk 10.25-28Bebe Mozizi Oloko mẹ na ịkịankoro apụ ma toluma aị ma na mịna maaịn ma tẹ Oloko mẹ tọn koroma aị ma ḅụ sịrẹrẹ wararị.”
In Mẹsaya Gbolomaye Kẹ Jizọsị Ḅiim
(Mak 12.35-37; Luk 20.41-44)
41Farịsiiapụ ma ḅẹ apụ kobiri wararị ogbo, Jizọsị ịn gbelam, 42“Ndẹẹ Mẹsaya ḅe gboloma ye ḅụ ó kuromarị ye? Tụḅọ furo ọ̀ paka?”
Ịn nwẹnị pakịrị, “Devidi furo ọ̀ pakam.”
43Jizọsị nwẹnị gbela, “Ọkọ kụma, ndẹẹ Tẹmẹ ḅe Devidi kuroma jike tẹ ọ̀ ‘KỊNỊNYANAḄỌ’ kẹ ọ̀ sịn ḅara?” Devidi ḅẹẹm,
44 #
Dev 110.1
“KỊNỊNYANAḄỌ ḅe ị̀ Nyanaḅọ ḅe ḅẹẹm:
‘Ị̀ ama-ḅara anga lẹgị-sime
nwenii àrị ị́ na fịya-a apụ ma kẹ ị́ aḅụọ suku-ḅio suu.’ ”
45Devidi nwẹnị KỊNỊNYANAḄỌ kẹ ọ̀ sịn-arị kụma, ndẹẹ Mẹsaya ḅe inetẹ Devidi furo paka-ḅo ḅọ sọ ḅẹ ḅara?
46Gbọrụḅọ-sọ inetẹ gbọrụ pakịrị-ḅịḅị sọ kẹ Jizọsị pịrị-a, tẹ anị ene ḅụ saakị tọrọkọ mu gbọrụḅọ-sọ ḅarị pịkị ḅiokpọ tẹ ja ḅii-aḅịḅị kẹ ò ḅii-a.
Currently Selected:
Matiyo 22: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria