Matiyo 21
21
Jizọsị Owu Ḅara Iḅi-ḅọ Ḅara Kẹ Jeruselemu Sọ-mum
(Mak 11.1-11; Luk 19.28-40; Jọn 12.12-19)
1Jizọsị na ò ḍukamẹnjịapụ ma na sịẹ paka Jeruselemu ẹrị sakị in ḅo Olivu Tụndụ ḅụ, Bẹtịfeji nwẹn-sịn ama la tẹ. Anịanga ḅụ Jizọsị ò ḍukamẹnjịapụ ma ḅẹ maa apụ kẹ tọrọkọ tarị fịrịma, 2tẹ ịn ḅẹẹm, “Ọmịnị ọmịna tọrọkọ-jụ ḅio simearị ama mẹ muu; ọ́ la gbọrụ sakị ọmịnị ẹrị ḅa, gbọrụ yedogi-nama na anị ḅẹ asambịrịma gberie na ori akaka ḅụ, kpọọ wẹrị wararị. Ọmịnị in fima tẹ ịn kẹ ḅo ị̀ pịrịị. 3Tẹ kịnị ye kẹ ó gbela-gbela, ọ́ ḅẹẹ, ‘Sịḅịdaḅọ ḅe in ḅiiarị’, anịtẹso ọ̀ wẹrịso tẹ ọmịnị ịn kẹ so ḅa anị gbọrụ kiri.”
4Miemẹ gotẹ ọkọ paka ye, mịẹtẹ ịkịankoroḅọ ḅe ḍuko ḅọrọma tẹ ye mẹ karakara ye sọ ḅẹ ḅara:
5 #
Zẹk 9.9
“Ḍuko kpọma-ḅẹlẹmarị Jeruselemu ḅẹ apụ ma pịrịị,
Ḍikii, ọmịna amadaḅọ ọ́ ḍọkụma-ḅoarị!
Ori ḅe anie ḅụụ-iderima ḅọọ, tẹ ò yedogi-nama ọgọnọ kpọlị tẹ ḅoarị,
pịkị kala yedogi-nama ọgọnọ, asambịrịma ye ḅe.”
6Mie ḅụ Jizọsị ḍukamẹnjịapụ ma nwẹnị mu tẹ Jizọsị ịn ḅẹẹ ḅara mịẹ: 7ịn nwẹnị yedogi-nama ḅe na asambịrịma ye ḅe na kẹ ḅo, tẹ ịna akapa sin nama ma ọgọnọ dẹẹ, tẹ Jizọsị nwẹnị kpọlị. 8Gbọrụ opu tomina-ogbo ịna ọgọnọ ḅẹ akapa sin tẹ kẹ etela mẹ dẹẹm, anịsakị osi apụ sịn aḅara pẹlẹ tẹ kẹ etela mẹ dẹẹm. 9#Dev 118.25,26Tomina-ogbo-ogbo ma tẹ Jizọsị tọrọkọ tarị apụ ma na, ori ọḅụ ḍuka-mu apụ ma na nwẹnị saakị oloku tẹ ḅẹẹ, “Devidi Tụḅọ ḅe tokinii! Tamụnọ, KỊNỊNYANAḄỌ ḅe ẹrẹ ḅụ ḅoarị ḅọ ḅe bomaa! Ọ́ Tamụnọ tokinii!”
10Jizọsị Jeruselemu ḅio sọ-mu sakị, bebe opu ama mẹ ḍarịm! Tomi ma nwẹnị gbela, “Ḅieḅe ḅọrọ tụḅọ?”
11Tomina-ogbo-ogbo ma nwẹnị pakịrị, “Ḅieḅe anie ịkịankoro Jizọsị ḅe, tẹ Galili ḅẹ ama Nazarẹtị ḅụ sime tẹ ḅo ḅọ ḅee!”
Jizọsị Tamụnọ-warị Mẹ Sọ-mum
(Mak 11.15-19; Luk 19.45-48; Jọn 2.13-22)
12Jizọsị Tamụnọ-warị mẹ sọ-mu tẹ anịanga sime tẹ ye dẹrịarị-apụ na, fẹẹarị-apụ mamgba na dee pakamam. Ọ̀ nwẹnị igbigi ḍima apụ ma adẹbịlẹ ma na, nwẹẹrẹsị dẹrị-apụ ma kẹ lẹgịarị ịkasiye ma na pịkị iḅo, 13#Ayị 56.7; Jer 7.11tẹ ịn ḅẹẹ, “Fịafịa Ḍiri mẹ ḅio anị kẹẹ koro wararị, mịnẹ Tamụnọ ḅẹẹm, ‘Ịn kẹ ị̀ Warị mẹ sịn ḅarịye, tẹkẹ warị.’ Kụma ọmịnị anị kẹ furuapụ ḅọị, ḅọị tẹ paka mu furuarị anga mịẹarị!”
14Tọrụngbọ-pụụntẹ apụ na ekeliapụ na ọ̀ dama-ḅo tẹ ori ịn gwọm Tamụnọ-warị mẹ ḅio. 15Tẹ agbamịẹapụ ma na, Oloko Tolumapụ ma na ọ̀ mịẹ ḅụụ-buama-aị ma ẹrị tẹ, pịkị awọmẹ ma Tamụnọ-warị mẹ ḅio olokuarị, “Devidi Tụḅọ ḅe tokinii”, mẹ naa sakị, ini ịganịm. 16#Dev 8.2Mie ḅụ ịn nwẹnị Jizọsị gbela, “In ḍukoarị ye ị́ naarị?”
Jizọsị nwẹnị pakịrị, “Karakara ye à naarị. Yee àrị ó gbela, jen sakị Fịafịa Ḍiri mẹ ḅio amụ ó go-a? ‘Ị́ ye kẹ awọmẹ na ndoarị kala awọmẹ na toluma tẹ mịnẹ in bebe ḅara kẹ Tamụnọ tokinii.’ ”
17Tẹ Jizọsị nwẹnị tomi ma koroma tẹ Jeruselemu ḅụ so Bẹtani ama mu, tẹ ḍin mẹ kẹ anịanga sime.
Jizọsị Ịla Sịn Worim
(Mak 11.12-14,20-24)
18Ene-ḅaa ḅẹ dede-ḅio ḅụ Jizọsị pịkịma so opu ama mẹ muarị ogbo, ḅuru nwẹnị ọ̀ tarị. 19Etela akaka ḅụ ọ̀ gbọrụ ịla sịn ẹrị tẹ mẹnjị mu anị lam, kụma anị ọgọnọ gbọrụ mgbọlụ sọ ofori, ịnyịnya sikima. Mie ḅụ ọ̀ sịn mẹ ḅẹẹm, “Ị́ ḅarị jen kẹ mgbọlụ sụa ḅịa!” Anị gbọrụ kiri ịla sịn mẹ nwẹnị samụnọ fama.
20Jizọsị ḍukamẹnjịapụ ma miemẹ ẹrị tẹ kpọma ḅụụ-buam. Ịn nwẹnị gbela, “Ndẹẹ ịla sịn mẹ nwẹn kẹ sarasarama samụnọ ḅara?”
21 #
Mat 17.20; 1 Kọr 13.2 Jizọsị nwẹnị pakịrị, “Ó nimi, mịnẹ ó minini nyana wararị tẹ, ḅio-maaịn-tọn-a kụma, ọmịnị inetẹ à kẹ mị ịla sịn mẹ mịẹ ye mẹ mịẹ ḅa. Pịkị miemẹ ngẹrị-a, kụma ọmịnị inetẹ mị tụndụ mẹ ḅẹẹ ḅa, ‘Soku paka-ḅo tẹ ị́ ḅụụ kẹ abajị ḅio gbin suu,’ tẹ anị mịẹ ḅa. 22Ó minini nyana kụma, tẹkẹ ḅụ ó ḅii ye, ḅii ye ọmịna ḅara la ḅa.”
In Jizọsị Gbelam Tụḅọ Kụrọ Kẹ Ọ̀ Pịrị
(Mak 11.27-33; Luk 20.1-8)
23Jizọsị pịkịma Tamụnọ-warị mẹ ḅom; tẹ ò ye-tolumarị ogbo, agbamịẹapụ ma na omongiapụ ma na ḅo ò gbelam, “Ị́ tọ kụrọ nyana tẹ kẹ mịna aị ma mịẹarị? Tụḅọ mị kụrọ mẹ kẹ ị́ pịrị?”
24Jizọsị nwẹnị ịn pakịrị, “Gberie kịngẹ à nwẹn kẹ ó ḅii ḅa, tẹ ọ́ pakịrị ị̀ pịrị-pịrị, à nyana tẹ kẹ mịna aị ma mịẹarị kụrọ mẹ à ḍuko ọ́ pịrị ḅa. 25Jọnị nyana tẹ kẹ minji kẹ kịnị sara kụrọ mẹ tọ-anga ḅo? Tamụnọ ḅara ḅo mụnọọ tomina aḅara ḅo?”
Ịn nwẹnị saakị ini-ini-ini ogboku nụnụa tẹ ḅẹẹ, “Wa tiye ḍuko ḅẹ? Wa ‘Tamụnọ ḅara ḅom pakịrị kụma,’ ọ̀ wa ḅẹẹ ḅa, ‘Ọkọ kụma ó tiegotẹ Jọnị minini-a?’ 26Kụma wa ‘Tomi aḅara ḅom’ ḅẹẹ kụma, wa tomi ma mịẹ ḅarịye gotẹ ḅalafaarị, inimgba mininim mịnẹ Jọnị ḅe ịkịankoroḅọ ẹrẹsị.” 27Mie ḅụ ịn nwẹnị Jizọsị pakịrị, “Wa nimi-a.”
Tẹ ori nwẹnị ịn ḅẹẹ, “Ọkọ ḅẹḅẹ, yẹrị sọ à nyana tẹ kẹ mịna aị ma mịẹarị kụrọ mẹ à ḍuko ọ́ pịrị ḅịa.
Jizọsị Maa Owiapụ-awọmẹ Egberi Gbaam
28“Mịọkụ yee àrị ó gbela, ndẹẹ ó kuromarị ḅara ḅoto? Gbọrụ sakị gbọrụ owiḅọ maa owiapụ-awọmẹ nyanam. Gbọrụ ene ori omongiḅọ ḅe dama-mu tẹ ọ̀ ḅẹẹm, ‘Mu ị̀ kụrọ ḍụọ ḅio kọrịnama kọrịị mịmgba.’ 29Ọ̀ nwẹnị pakịrị, ‘À mu ḅẹ ḅii-a,’ kụma anị sakị mẹ ḅọrọ tẹso, ori ò kuroma ḍima tẹ mum. 30Anịtẹso ḍaḅọ ḅe osi tụḅọ ḅe dama-mu tẹ anị gbọrụ ye mẹ kẹ ọ̀ ḅẹẹm. Ori nwẹnị pakịrị, ‘Inn, ị̀ ḍaḅọ,’ kụma ò mu-a. 31Mịna maa apụ ma ḅụ tụḅọ amịna ḍaḅọ ḅii ḅara mịẹ?”
Ịn nwẹnị pakịrị, “Omongiḅọ ḅee.”
Mie ḅụ Jizọsị ịn ḅẹẹm, “À ḍuko ọ́ pịrịarị: ama-igbigi da apụ ma na, ama-mẹnjị-ereme ma na ọ́ ḅọrọ tẹ tarị mu Tamụnọ Ama-da mẹ suku-ḅio simearị atomi sọ ḅa. 32#Luk 3.12; 7.29,30Kẹ gotẹ ọkọ ḅẹẹarị, Minji-sara Jọnị ḅo tẹ ọ́ ḅọrọ ḅarị karakara etela kẹ ó ḍie sakị ọmịnị ò minini ḍụkụ-a; kụma ini ama-igbigi da apụ ma na ama-mẹnjị-ereme ma na ò mininim. Ọ́ tọrụngbọ kẹ miemẹ ẹrị sakị sọ ọmịnị ọmịna akuroma ḍima tẹ ò minini-a.”
Jizọsị Kụrọ-Ḍụọ Ọkọ-apụ Egberi Gbaam
(Mak 12.1-12; Luk 20.9-19)
33 #
Ayị 5.1,2 Jizọsị ḅẹẹm, “Ó jen egberi pokii. Gbọrụ kiri nyanaḅọ girepu-ḍụọ ḍiḅi tẹ, onu gbori anị ikelema, iru mịẹ otolo soku, tẹ pịkị geletẹ warị nama anị pịrịm. Anịtẹso ori anị kẹ ọkọ-apụ pịrị tẹ so ye mum. 34Sakị ḅo kụrọ mgbọlụ kaịn, kaịn sakị la tẹso, ori ori omoniapụ fịrịma ọkọ-apụ ma dama-mum, mịnẹ ini ịn kaịn aị ma ḅụ ọ̀ la kiri da ḅoo. 35Ḍụọ ọkọ-apụ ma ori omoniapụ ma kun tẹ gbọrụḅọ fomu, osi ḅọ ḅaa, tẹ ḍụḅarị kẹ gbọrụḅọ gbinm. 36Ọ̀ pịkị tarị mu apụ ma kịẹn-ḅịḅị nẹngị apụ kẹ fịrịmam, tẹ ḍụọ mẹ ọkọ-apụ ma nwẹnị anị gbọrụ ḅara mẹ kẹ ini sọ mịẹ. 37Arịmgba ḅẹ kunoma ḅụ ori ọ̀ tụḅọ kẹ fịrịmam. Ọ̀ ḅẹẹm, ‘Piki-pikiye-ofori ḅara ḅụ, ini ị̀ tụḅọ ḅe kẹ ye-sịn ḅa.’ 38Kụma ḍụọ mẹ ọkọ-apụ ma tụḅọ ḅe ẹrị sakị ini ịna aḅụụ ḅẹẹm, ‘Ḅieḅe anie ye mẹ nyanaḅọ tụḅọ ḅe; ó ḅoo, yee wa ọ̀ ḅaa, anịsakị ye mẹ wamịna nye sọ ḅa!’ 39Mie ḅụ ịn nwẹnị kụrọ-ḅara kẹ ori ọlọ, tẹ kụrọ ḍụọ mẹ ḅio ò sukuruma pakama, tẹ ọ̀ ḅaa.”
40Jizọsị nwẹnị gbela, “Anị sime-ḅara ḅụ, kụrọ ḍụọ mẹ nyanaḅọ ḅẹ ḅo sakị ọ̀ tọ-ḅara kẹ ḍụọ mẹ ọkọ-apụ ma mịẹ ḅẹ?”
41Ịn nwẹnị pakịrị, “Piki-pikiye-ofori ḅara ḅụ, ori arị asi atomi ma ḅaa tẹ ḍụọ mẹ kẹ ja apụ, tẹ kụrọ mgbọlụ ma kaịn-kaịn sakị laarị-laarị kaịn tẹ ọ̀ la kiri kẹ ọ̀ pịrị ḅẹ apụ ọkọ ḅa.”
42 #
Dev 118.22,23 Jizọsị nwẹnị ịn gbela, “Fịafịa Ḍiri mẹ ḅio kẹẹ wararị ye mẹ jen ene amụ ó go-a?”
Warị nama apụ ma kẹ mịẹ-mịẹ ye ofori ḅẹẹ tẹ sịkị ḍụḅarị mẹ
ḅo arịmgba ḅụ kụrọ nyana tẹịn ye sọ tẹ.
Miemẹ KỊNỊNYANAḄỌ ḅe kọrị ye
tẹ anị ḍiki kụma, anị kpọma ḅụụ-buamam!
43“À ḍuko ọ́ pịrịarị, Tamụnọ Ama-da mẹ ḅụ simearị aboma ma, ini ọmịna ḅara arị ọkị tẹ kẹ saḅama karakara iḅi sịnmgbọlụ sụa ḅẹ apụ pịrị ḅa. 44Mị ḍụḅarị mẹ ọgọnọ ḅịkị-koro ḅọ koro ḅọ, mḅọ pakịrị-pakịrị puu ḅa; tẹ ḍụḅarị mẹ ḅịkị ponoma ḅọ ponoma ḅọ, anị mḅọ gbẹẹ fọọn sọma ḅa.”
45Agbamịẹapụ ma na, Farịsiiapụ ma na Jizọsị gbaa egberi mẹ naa tẹ nimim mịnẹ in gbolomaye mie ò ḍuko sime ye, 46mie ḅụ ini ò kun ḅẹ ḅọkọ ḍọkịm. Kụma in tomina-ogbo, ogbo ma ḍiki-ḅalafaam, inima Jizọsị kẹ ịkịankoroḅọ ḅara ọkịm ẹrẹsị.
Currently Selected:
Matiyo 21: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria