Lẹvitikọsị 19
19
Fịafịa Na Karakara Mịẹ Na Gboloma Oloko Ma
1KỊNỊNYANAḄỌ ḅe nwẹnị pịkị Mozizi ḅẹẹ, 2#Lẹv 11.44,45; 1 Pit 1.16“Izirẹlịapụ ma tomina-ogbo mẹmgba ḅẹẹ, ó fịafịa ḅara simee, gbala Yẹrị KỊNỊNYANAḄỌ ọmịna Tamụnọ ḅe à fịafịa wararị ẹrẹsị. 3#Pks 20.12; Dit 5.16; Pks 20.8; Dit 5.12Ọmịna aḅụụ tomḅọ nwẹn-sịn tomḅọ amịna iyingiḅọ na, amịna ḍaḅọ na mangịma ḅa, tẹ ị̀ Ịnyọsara-Ene ma koko ḅa. Yẹrị anie KỊNỊNYANAḄỌ ọmịna Tamụnọ ḅee.”
4 #
Lẹv 26.1;
Pks 20.23; 34.17; Dit 17.2-5 “Ó sunsin oru-atamụnọ pịrị ma, pịkị ḅara kẹ tẹmẹ oru-atamụnọ tẹmẹ ọmịna aḅụụ pịrị ma. Yẹrị anie KỊNỊNYANAḄỌ ọmịna Tamụnọ ḅee.”
5“Ó dein-pịrị-agba mịẹ KỊNỊNYANAḄỌ ḅe pịrịarị sakị, ọmịnị anị mịẹ ḅa, mịẹtẹ KỊNỊNYANAḄỌ ḅe ọ́ mịẹ agba mẹ ọkị ḅarị ḅara. 6Anị gbọrụ ene mẹ ḅụ ini anị fị ḅa, anịanịa, anị ḅẹ ene-ḅaa anịsakị anị ḅụ kirikọntẹ sime nwenii tẹrẹị karama ene la ye mẹ ọ́ fịnị kẹ anị dọkịma ḅa. 7Gbala-gbala tẹ tẹrẹị karama ene mẹ ḅụ ini anị fị-fị, agba mẹ ḅarị ọkị ḅịa. 8Anịsakị anị fịm nwẹn ḅẹẹ ḅọ ḅẹẹ ḅọ, amịna mịẹ-irima mẹ dogi ḅa, gbala mḅọ KỊNỊNYANAḄỌ ḅe fịafịa ye mịẹ sima papaaye mịẹ tẹ ẹrẹsị anịsakị anị tomḅọ mẹ ini mḅọ pẹlẹ-siin ḅa mḅọ atomi ogbo-ḅio ḅụ.”
9 #
Lẹv 27.15; Dit 24.19-22 “Ọmịnị ọmịna kiri mẹ ḅẹ fịye soku-ḅẹ sakị, ó soku mu gbọrsịḅị ọmịna ḍụọ agara ma la, anịanịa pịkị mu ḅara kọnma aị kolokolo ma, ó fịye mẹ soku ḅọrọma tẹso. 10Ọmịnị ọmịna girepu nwẹn-sịn sịnmgbọlụ ḅẹ ḍụọ soku sakị, ọmịnị arịmgba kaịn fama ma. Siin-koro asịnmgbọlụ ma sọ ó kolokolo ọkị ma ọmịna ḍụọ ḅio. Ọmịnị arị wẹrịso igoin-apụ ma na, igoniapụ ma na pịrịị. Yẹrị anie KỊNỊNYANAḄỌ ọmịna Tamụnọ ḅee.”
11 #
Pks 20.15; Dit 5.19;
Pks 20.16; Dit 5.20 “Ó furu ma, anịanịa kịnị inoma, anịanịa iruo kọn. 12#Pks 20.7; Dit 5.11; Mat 5.33Ị̀ ẹrẹ ḅụ iruo ḅara kẹ ye minini tẹ mị ḅara ḅụ ị́ Tamụnọ ḅe ẹrẹ mẹ sima ma. Yẹrị anie KỊNỊNYANAḄỌ ḅee.”
13 #
Dit 24.14,15 “Ị́ ị́ na kpeki tẹ angarị ḅọ ponoma, anịanịa, kụrọ ḅara kẹ mḅọ nye ọkị ma. Ọkọ fịrịmẹnjịḅọ gbẹẹ-ye bebe ene kẹ ị́ ḅara ḅụ sime nwenii mu ene-ḅaa dede-ḅio lama. 14#Dit 27.18Ye karị ḅeri-iningiḅọ pịrị ma, pịkị kịnị-ḅịkịmaye kẹ tọrụngbọ-pụụntẹḅọ tọrọkọ koroma ma. Ọmịnị ị̀ mangịmaa; yẹrị anie KỊNỊNYANAḄỌ ḅee.”
15 #
Pks 23.6-8; Dit 16.19 “Ḅẹrẹkọn kiri ḅụ ị́ karakara ḅẹrẹ kọn ḅa, ị́ aḍụa kọn igoinḅọ ḅe pịrị, anịanịa ị́yẹrị ẹrẹsị kẹ opu tomḅọ ḅe ḅẹẹ ma, kụma karakara ḅụ mie ị́ ḅẹrẹ kọn ị́ na kpeki tẹ angarị ḅọ pịrị ḅarịye. 16Ị́ atomi ogbo-ḅio ḅụ mẹnjị-mẹnjị iwo na, ideri na tẹ iruo aị kẹ kịnị ḍuko-sima ma ḅọrọma ị́ na kpeki tẹ angarị ḅọ ḍumo gbolomaye ḅụ siye anga sịẹma. Yẹrị anie KỊNỊNYANAḄỌ ḅee.”
17 #
Mat 18.15
“Ó ḅioḅẹngbọ, ḅioḅẹngbọ kẹ ọmịna mịnaḅọ ḍiki-ḅioḅu ma, kụma ọmịnị, ọmịnị na kpeki tẹ angarị ḅọ na ḅịḅị-ọkịyaa, anieofori ó ḅofa mḅọ gotẹ si mịẹ. 18#Mat 5.43; 19.19; 22.39; Mak 12.31; Luk 10.27; Rom 13.9; Gal 5.14; Jem 2.8Ọ́ gbẹẹfị ḅii ma, ọ́ pịkị si ḅioḅẹngbọ sụa ọmịna atomi pịrị ma; kụma ọmịnị ọmịna aḅụụ ḅẹlẹma ḅara kẹ ọmịnị na kpeki tẹ angarị ḅọ ḅẹlẹmaa. Yẹrị anie KỊNỊNYANAḄỌ ḅee.”
19 #
Dit 22.9-11
“Ọmịnị ị̀ oloko kẹẹ-koro wararị aị ma koko ḅa. Ọ́ ḍụkụ tẹ ọmịna opu anama ma gbọrụ ḅara sime nama mu jen kiri nama kpọlị ma (Kẹ tọnma — ejimina mu oḅori kpọlị). Ọmịna ḍụọ ḅio ọ́ kịrị-kịrị maa asịnmgbọlị kẹ gbọrụ ḍụọ ḅio ḍiḅi ma, ọ́ pịkị kịrị-kịrị aḅịtẹ maa atọrụ kẹ gbọrụ kapa gbin ma.”
20“Gbọrụ owiḅọ nwẹnị omoni-ẹrẹḅọ tẹ ini ọlọ jen owiḅọ pịrị wararị tẹ amụ ịn pịrị pakama tẹ amịna sịḅị nyana-a omoni-ẹrẹḅọ na gboloma gboloma, ịn kịnị fịrịma tẹ anị sọkịrị tẹ gbela nimi ḅa. Ini ịn ḅaa ma, gbala arị á sịḅị nyana-a ẹrẹsị. 21Kụma ori amịna ḅụụ gotẹ ḅẹrẹ-ḅarasii agbamịẹ gbọrụ ejimina ọkị-ḅo KỊNỊNYANAḄỌ ḅe pịrị ḅa Kobiri Akpụrụ-warị mẹ ḅẹ ḅọkọ mẹ ḅụ. 22Agbamịẹḅọ ḅe nwẹnị ḅẹrẹ-ḅarasii agbamịẹ ejimina ḅe kẹ KỊNỊNYANAḄỌ ḅe tọrọkọ ḅụ ò si mẹ tẹ ọ̀ mịẹ tẹ ye mẹ gotẹ si-wẹrịso pịrị ḅẹrẹ fama ọ̀ pịrị ḅa, anịsakị ọ̀ nwẹnị si mẹ tẹ ọ̀ mịẹ tẹ ye mẹ ḅụ si-wẹrịso pịrị nyana ḅa.”
23“Ó ḅo Kenanị ama mẹ la tẹ ọ́ fị ḅẹ mgbọlụ sụa fị asịn ḅara, ḅara mamgba ḍiḅi fama tẹso, ọmịna aḅụụ arịḅẹ asịnmgbọlụ ma tọn-tọn-aị sọ ḅa, tẹra kụra ḅụ ọmịnị arị fị nyana-a. 24Ini akụra karama kụra mẹ ḅụ arịḅẹ asịnmgbọlụ mamgba fịafịa aị sọ, tẹ tokini agbamịẹye sọ KỊNỊNYANAḄỌ ḅe pịrị ḅa. 25Kụma sọnọ akụra karama kụra ḅụ ọmịnị inetẹ arịḅẹ asịnmgbọlụ fị ḅa, mịẹtẹ arị iḅiọkụ tọnwa ḅara kẹ sịnmgbọlụ sụa ọ́ pịrị ḅarị ḅara Yẹrị anie KỊNỊNYANAḄỌ ọmịna Tamụnọ ḅee.”
26 #
Suk 9.4; Lẹv 7.26,27; 17.10-14; Dit 12.16,23; 15.23;
Dit 18.10
“Ọmịnị ọmbie kẹ gbọrụ meni sọ na sụa pẹị ma. Ó ḍiri kọrị, anịanịa majịkị amịẹaị mịẹ ma. 27#Lẹv 21.5; Dit 14.1Ọmịnị ọmịna fụḅara kẹngẹ anịanịa, ọmịna mpọrị agara ma sẹịn ma. 28Ọ́ ḍụẹịn ḍuu gotẹ ọmịna oju-kiri puu, anịanịa akaka-anda kẹ ọmịna oju ḅụ sụa ma, yẹrị anie KỊNỊNYANAḄỌ ḅee.”
29 #
Dit 23.17
“Ọmịnị ọmịna eremịna-awọmẹ mịẹ iderima tẹ ịn sẹfị-apụ sọ ma, anieofori ama mẹ ḅofa sẹfị ama sọ, tẹ si-sịḅịḅio ḅo anị ḅio ḅin. 30#Lẹv 26.2Ọmịnị ị̀ Ịnyọsara-Ene ma koko tẹ ị̀ Fịafịa Yọ mẹ mangịma ḅa. Yẹrị anie KỊNỊNYANAḄỌ ḅee.”
31 #
Dit 18.11; 1 Sam 28.3; 2 Ama 23.4; Ayị 8.19 “Ó vuunma pịkị fụḅara-ḍiki-ḅịrịapụ, anịanịa majịkị-mịẹapụ ḍọkị pakama-ḅo, tẹ ịna aḅụụ ọmịna aḅụụ pilema ma. Yẹrị anie KỊNỊNYANAḄỌ ọmịna Tamụnọ ḅee.”
32“Sịḅị iḅulu ḅịyatẹ apụ ma tọrọkọ ọ́ saakị sịẹsimee, tẹ omongiḅọ tọrụ kụn, anịsakị ọmịnị ọmịna Tamụnọ ḅe mangịma ḅa.
Yẹrị anie KỊNỊNYANAḄỌ ḅee.”
33 #
Pks 22.21; Dit 24.17,18; 27.19 “Igoniḅọ ḅo ọmịna ama ḅio anga sakị, ó siye kẹ mḅọ mịẹ ma. 34Igoniḅọ ḅe tẹ ọmịnị na angarị ḅọ ḅẹ ọmịna ogbo-ḅio ḅụ ama-kuḅu ḅẹ ḅọ sime-ḅara sime ḅa, anịsakị ọmịnị ọmịna aḅụụ ḅẹlẹma ḅara kẹ mḅọ ḅẹlẹma ḅa kẹ gotẹ ọkọ ḅẹẹarị, ọmịnị sọ igoniapụ sọ simem Ijiputi ama mẹ ḅio. Yẹrị anie KỊNỊNYANAḄỌ ọmịna Tamụnọ ḅee.”
35 #
Dit 25.13-16; Egb 20.10; Izi 45.10 “Ọ́ gbọrụ siye sọ mịẹ ma ye nangwọ-laa-ḅara na iku-laa-ḅara na anịanịa ḅaka-laa-ḅara na tọn kiri ḅụ. 36Ọ́ karakara ye-tọn ḍigi na, karakara iku-laa-ḅara tọn ye na, karakara ḅaka-laa-ḅara tọn ye na nyanaa. Yẹrị anie KỊNỊNYANAḄỌ ọmịna Tamụnọ ḅe tẹ Ijiputi ama mẹ ḅio ó pakama-ḅo ḅọ ḅee. 37Anịsakị ọmịnị ì oloko kẹẹ-koro wararị aị mamgba na, kụrọ ḅara-ḅio emi ḅọ ḅara kẹ à tọn aị mamgba na kẹ elekima sụa tẹ arị mịẹ ḅa.
Yẹrị anie KỊNỊNYANAḄỌ ḅee.”
Currently Selected:
Lẹvitikọsị 19: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
