Lẹvitikọsị 18
18
Owiḅọ Na Ẹrẹḅọ Na Gboloma Mẹ Ḅẹ Tọn-tọn-aị
1KỊNỊNYANAḄỌ ḅe nwẹnị Mozizi ḅẹẹ: 2Izirẹlịapụ ma ḅẹẹ, “Yẹrị anie KỊNỊNYANAḄỌ ọmịna Tamụnọ ḅee. 3Ọmịnị Ijiputi ama ḅụ ịn mịẹ ḅara mịẹ ma, ọmịnị anga sime anga mẹ, anịsakị ọ́ pịkị Kenanị ama mẹ tẹ arị ọmịnị ọkị-ḅo koromarị ama mẹ ḅụ ịn mịẹarị ḅara mịẹ ma. Ọmịnị ịna kẹẹtẹ oloko ma ḍiki mẹnjị ma. 4Kụrọ ḅara ḅụ emi ḅọ ḅara ḅụ ọmịnị à tọn aị mịẹ ḅa, tẹ ì oloko kẹẹ-koro wararị aị ma koko tẹ arị ḍiki mẹnjị ḅa. Yẹrị anie KỊNỊNYANAḄỌ ọmịna Tamụnọ ḅee. 5#Neh 9.29; Izi 18.9; 20.11-13; Luk 10.28; Rom 10.5; Gal 3.12Ọmịnị anịẹrẹsị ì oloko kẹẹ-koro wararị aị ma na, kụrọ ḅara ḅụ emi ḅọ ḅara kẹ à tọn aị ma na koko ḅa, arị aị ma tẹ tomḅọ arị mịẹ ḅụ ḅọrọ tẹ ḍumo ḅarị aị ma.
Yẹrị anie KỊNỊNYANAḄỌ ḅee.”
6“Ọmịna aḅụụ gbọrụḅọ-sọ mḅọ na kpeki wararị mịnaḅọ paụma tẹ mḅọ na gboloma ma. Yẹrị anie KỊNỊNYANAḄỌ ḅee.”
7“Ị́ ḍa paụma ma, anie í iyingi paụma tẹ árị na gboloma ḅụ. Árị anie í iyingi; á paụma tẹ arị na gboloma ma.”
8 #
Lẹv 20.11; Dit 22.30; 27.20 “Ị́ ḍa ta paụma tẹ árị na gboloma ma. Anie mẹ anie ị́ ḍa ḅe paụ mẹ.”
9 #
Lẹv 20.17; Dit 27.22 “Ị́ ịyịmbara, anịanịa ị́ na gbọrụ ḍaḅọ iyi ẹrẹḅọtụḅọ, anịanịa gbọrụ iyingiḅọ iyi ẹrẹḅọtụḅọ paụma tẹ mḅọ na gboloma ma — ama ọgọnọ iyi ḅọ-o, jen sịẹ ḅụ iyi ḅọ sọ.”
10“Í taa-ẹrẹḅọtụḅọ paụma tẹ árị na gboloma ma; kẹ gotẹ ọkọ ḅẹẹarị, anị ḅụụ-jịrị dogi-ḅo ị́ warị pịrị ḅa.”
11“Ị́ ḍa ta iyi ẹrẹḅọtụḅọ paụma tẹ arị na gboloma ma; ị́ ḍa árị iyim, árị ị́ ịyịmbara ḅẹ sakị.”
12 #
Lẹv 20.19,20 “Ị́ ḍa ịyịmbara paụma tẹ árị na gboloma ma; árị ma anie ị́ ḍa na kpeki mịnaḅọ.”
13“Í iyingi ịyịmbara paụma tẹ arị na gboloma ma; árị ma anie í iyingi na kpeki mịnaḅọ.”
14“Ị́ ḍa iyimbere paụma ma. Anie mẹ fiearị ye, ọ̀ ta na gboloma ma; árị anie ị́ ḍa ḅe ịyịmbara.”
15 #
Lẹv 20.12
“Í owiḅọtụḅọ ta, anie ị́ fụanḅọ ma, paụma tẹ árị na gboloma ma; árị anie í owiḅọtụḅọ ta. Á paụma ma.”
16 #
Lẹv 20.21
“Í iyimbere ta paụma tẹ arị na gboloma ma; árị ma anie í iyimbere ḅe paụ.”
17 #
Lẹv 20.14; Dit 27.23 “Gbọrụ ẹrẹḅọ paụma tẹ árị na gboloma tẹ pịkị árị ẹrẹḅọtụḅọ anịanịa á taa-ẹrẹḅọtụḅọ na gboloma ma; ini anie ị́ na kpeki eremịna-amịnapụ. Anie mẹ anie si-sịḅịḅio.”
18“Ị́ ta ịyịmbara ọkị tẹ á kẹ ịyịmbara afanaḅọ mịẹ tẹ árị na gboloma ma, ị́ ta ma paa ḍumo wararị ogbo.”
19 #
Lẹv 20.18
“Ẹrẹḅọ pile wararị tẹ amụ fịafịa-a ogbo á ḍọkụma-mu tẹ árị na gboloma ma.”
20 #
Lẹv 20.10
“Ị́ na kpeki tẹ angarị ḅo ta na gboloma tẹ árị na ị́ ḅụụ pilema ma. 21#Lẹv 20.1-5Ị́ awọmẹ ḅụ, gbọrụḅọ-sọ pịrị pakama tẹ ịn kẹ agba mịẹ Molẹkị nwẹn-sịn oru ḅe pịrị tẹ mị-ḅara ḅụ ị́ Tamụnọ ḅe ẹrẹ mịẹ-sima ma.”
22 #
Lẹv 20.13
“Ẹrẹḅọ na gboloma ḅara kẹ í pembe owiḅọ na mịẹ ma; aniemẹ anie tọn-tọnye.”
23 #
Pks 22.19; Lẹv 20.15,16; Dit 27.21 “Piri-ḅio-ḅẹ gbọrụ nama sọ na gboloma tẹ anị na ị́ ḅụụ pilema ma; anịanịa ẹrẹḅọ amịna ḅụụ kẹ piri-ḅio-ḅẹ nama pịrị tẹ anị na gboloma; aniemẹ mịẹ-mịẹ-a kịrị ye.”
24“Ọ́ mịna aị ma ḅụ ḅẹẹye-ḅẹẹye sọ kẹ ọmịna aḅụụ pilema ma, kẹ gotẹ ọkọ ḅẹẹarị, mịna aị mamgba ḅụ mie ọmịna tọrọkọ à kẹ wakị ngumarị opu asịẹ ma kẹ ịna ḅụụ pilema aị. 25Tẹ ama mẹ nwẹnị ḅo pilema, anie mịẹtẹ àrị anị ḅẹ iri-mịẹye mẹ fomum, tẹ ama mẹ anị ḅio anga apụ ma ọsụ pakamam. 26Kụma ọmịnị ì oloko ma na à tọn aị ma na kokoo tẹ mịna tọn-tọn-aị ma ḅẹ gberie-sọ mịẹ ma, ị́yẹrị ama ḅẹ ḅọ-o, anịanịa igoniḅọ tẹ ọmịna ogbo-ḅio angarị ḅọ sọ. 27Kẹ gotẹ ọkọ ḅẹẹarị, ama mẹ ḅẹ atomi ma mịna tọn-tọn-aị mamgba mịẹm, inima tẹ ọmịna tọrọkọ tarị sime-sime apụ ma. Anie mịẹtẹ ama mẹ ḅo pilemam. 28Ọmịnị sọ ọkọ mịẹ ḅẹḅẹ, ama mẹ ḅofa ọmịnị ọsụ pakama, ọmịnị anị pilema sakị; anị wẹrịtẹ opu sịẹ mẹ tẹ ọmịna tọrọkọ tarị sime-sime ye mẹ ọsụ pakama ḅara. 29Kẹ gotẹ ọkọ ḅẹẹarị, ḅẹḅọ-ḅẹḅọ tẹ mịna tọn-tọn-aị ma ḅụ ḅẹẹye-ḅẹẹye mịẹ ḅarị ḅọ, mḅọ atomi ogbo-ḅio ḅụ ini mḅọ pẹlẹ-siin ḅa.”
30“Mie ḅụ ọmịnị à tọn ọ́ pịrị aị ma kokoo. Mịna tọn-tọn ama-anganga-aḅara ma, gbala-gbala ọmịnị anị ḅẹ gberie-sọ kẹ mịẹ-mịẹye sọma ma, arị aị ma tẹ ọmịna tọrọkọ ịn kẹ mịẹ-mịẹye sọma aị ma. Gbala-gbala arị ḅụ ọmịnị ọmịna aḅụụ pilema ma. Yẹrị anie KỊNỊNYANAḄỌ ọmịna Tamụnọ ḅee.”
Currently Selected:
Lẹvitikọsị 18: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
