Jọsụwa 18
18
Kiri Mẹ Ḅẹ Kirikọn Anga Mẹ Ḅẹ Ḍie Ḅara Mẹ
1Anịtẹso bebe Izirẹlịapụ ma tomina-ogbo mẹ nwẹnị ḅo kobiri Silo ḅụ, ama mẹ ịna tọrọkọ ḅụ sịḅị-tuu tẹso, tẹ nwẹnị ịn kobiri ḅarị Akpụrụ-warị nama anịanga ḅụ. 2Anịanga Izirẹlịapụ ma ogbo-ḅio ḅụ sọnọma afuro simem inima tẹ amụ ịn sime anga tọn pịrị-a apụ. 3Anieḅụ Jọsụwa nwẹnị Izirẹlịapụ ma ḅẹẹ, “Ó koru mu tọ-sakị la tẹrẹmẹ mu ama mẹ tẹ KỊNỊNYANAḄỌ ọmịna aḍapụ ma Tamụnọ ḅe kẹ ọ́ pịrị ama mẹ ọkị nyana ḅẹ? 4Furo-furo ḅụ ọ́ tẹra owiapụ, tẹra owiapụ pakama-ḅoo, anịsakị arị ịn fịrịma pakama tẹ ini inetẹ ama mẹ mẹnjị iwo na ideri na ḅa, tẹ kẹ ịna sime anga sọma ḅẹ ḅara kẹ anị sime-ḅara kẹ ḍiri ḅio kẹẹ tẹ anị kẹ ị̀ ḍọkụma-ḅo. 5Ini anị kẹ sọnọma akiri ḍiya ḅa, Juda ò ye-yọ nyana ma muarị suku-jụ ḅụ, anịsakị Josẹfụ warị mẹ ịna ye-yọ nyana ḅa ọgọnọ-jụ ḅụ. 6Anịsakị sọnọma akpo ḅụ mie ọmịnị ama mẹ sime ḅara ḍuko ḅarịye, tẹ anị sime-ḅara mẹ ọkị-ḅo ị̀ pịrị ḅarị ye mịanga, anịsakị á mịanga KỊNỊNYANAḄỌ wamịna Tamụnọ ḅe tọrọkọ apịan sụa-sụa ọ́ pịrị ḅa. 7Livayị furo-ḅẹ-apụ ma gbọrụ ḍiekiri sọ nyana-a ọmịna ogbo-ḅio ḅụ, kẹ gotẹ ọkọ ḅẹẹarị, KỊNỊNYANAḄỌ ḅe agbamịẹ mẹ anie ịn nyana ye; anịsakị Jodanị mẹ ọgọnọ pakịrị ịrụa-saakịarị-anga da-mu ḅụ Gadi na, Rubẹnị na, Manasẹ furo mẹ kẹ maa anga ḍiya ḅẹ gbọrụ pakịrị ịna sime anga ọkị tẹ, aniemẹ tẹ Mozizi, KỊNỊNYANAḄỌ ḅe fịrịmẹnjịḅọ ḅe kẹ ịn pịrị ye mẹ.”
8Anieḅụ tomi ma ịna mu anga mum; anịsakị Jọsụwa tọn inima tẹ ye mẹ mu apụ ma pịrịm ini ama mẹ sime-ḅara mẹ kẹ ḍiri ḅio kẹẹ, tẹ ḅẹẹm, “Ọ́ mẹnjị iwo-na-ideri-na tẹ ama mẹ sime-ḅara kẹ ḍiri ḅio kẹẹ, tẹ pịkị sin ị̀ ḍọkụma-ḅo; anịsakị à mịanga Silo ḅụ KỊNỊNYANAḄỌ ḅe tọrọkọ apịan sụa, sụa ọ́ pịrị ḅa.” 9Anieḅụ tomi ma mum, tẹ nwẹnị ama mẹ ḅio mẹnjị iwo na ideri na, tẹ ama mẹ sime-ḅara mẹ kẹ ḍiri ḅio kẹẹ ama-ama ma kẹ sọnọma akpo ḍie ḅara ḅụ, anịtẹso ịn Silo ịna sime anga ḅụ Jọsụwa ḍọkụma-ḅom. 10Jọsụwa nwẹnị apịan sụa-sụa ịn pịrị Silo, KỊNỊNYANAḄỌ ḅe tọrọkọ ḅụ, anịjụ mie Izirẹlịapụ ma Jọsụwa ọrụḅọ-ọrụḅọ ḍiekiri kẹ ịn pịrị ye.
Ịn Kẹ Benijamịnị Pịrị Ye-yọ Mẹ
11Benijamịnị furo mẹ ḅẹ afuro ma wẹrịtẹ sime ḅara ḅẹ apịan sụa mẹ saakịm, tẹ kẹ anị pịrị ye-yọ mẹ nwẹnị Juda furo mẹ na, Josẹfụ furo mẹ na ogboku koro. 12Ọgọnọ-jụ pakịrị ḅụ ịna oke mẹ Jodanị mẹ ḅụ saakịm; anịtẹso anị iwo Jeriko ọgọnọ-jụ ḅẹ akaka mẹ mum, tẹ ịrụa-ideriarị-anga da-mu ḅụ iwo tụndụ ọgọnọ ḅẹ opu sịẹ mẹ tolu-ḅọrọm, tẹ anị nwẹnị Bẹtevẹnị Ịkpa mẹ ḅụ kunoma. 13Anịjụ ḅụ oke mẹ nwẹnị ọkọ wẹrị suku-jụ da mu ḅara ḅụ Lọzị muarị pakịrị ḅọrọ mu Lọzị (Bẹtẹlị sọ anị ẹrẹ) akaka la, tẹrẹmẹ oke mẹ nwẹnị ideri Atarọtị-ada mu tụndụ mẹ tẹ lẹgịtẹ Bẹtị-horoni suku-jụ ḅụ simearị ye mẹ ọgọnọ-jụ ḅụ.
14Anịtẹso oke mẹ jen pakịrị da-mum, ịrụa mẹ tuuideriarị pakịrị ḅụ tụndụ mẹ tẹ suku-jụ simearị ye mẹ ḅụ pịkị suku-jụ-pakịrị da-mu Bẹtị-horoni na dama-dama ḅụ; tẹ anị Kiriyati-balị (anie Kiriyati-jeharimụ) sime Juda pịrị opu ama mẹ ḅụ kunomam. Miemẹ ịrụa-ideriarị-anga mẹ mịẹm. 15Anịsakị suku-jụ-pakịrị mẹ Kiriyati-jeharimụ ama akaka ḅụ saakịm; tẹ oke mẹ nwẹnị anịanga ḅụ so Ẹfụrọnị ḅụ so mu Nẹfitoha ḅẹ ngụngụḅa aminji ma la. 16Anịtẹrẹmẹ oke mẹ nwẹnị ideri tụndụ mẹ tẹ ḍiki mu Inọmụ owiḅọtụḅọ ḅe Tụndụ Ogboku mẹ tẹ Rifomu Tụndụ Ogboku mẹ ḅẹ ọgọnọ-jụ kunoma mẹ ḅẹ agara mẹ la; nwẹnị anịtẹrẹmẹ Inọmụ Tụndụ Ogboku mẹ ḅụ ideri Jebusayịtị apụ ma suku-jụ ḅẹ akaka ḅụ ideri Ẹnị-rogẹlị da-mu. 17Anịtẹso anị nwẹnị anda ọgọnọ-jụ pakịrị pịrị anga ḅụ Ẹnị-Sẹmẹsị mu, tẹ anịjụ ḅụ so Gẹlịlọtị tẹ Adumimu ḅẹ kpọlị iwo anga mẹ na dama-dama wararị ye mẹ la; anịtẹrẹmẹ anị ideri-mu Bohanị, Rubẹnị owiḅọtụḅọ ḅe Ḍụḅarị mẹ lam, 18tẹ ḅọrọ Betaba akaka ḅẹ ọgọnọ-jụ muarị kụma anị ideri-mu Ịkpa ḅio ḅẹ Ele mẹ la wararị; 19anịtẹrẹmẹ oke mẹ ọkọ wẹrị ḅọrọ mu Bẹtị-hogila akaka ḅẹ ọgọnọ-jụ mẹ lam; tẹ oke mẹ nwẹnị Fụn Tọrụ ọgọnọ-jụ ḅẹ opu ọpọ mẹ ḅụ kunoma, Jodanị mẹ ḅẹ suku-jụ mẹ ḅẹ kunoma ḅụ. 20Ịrụa-saakịarị-anga ḅụ Jodanị mẹ anị ḅẹ oke mẹ mịẹm. Miemẹ anie Benijamịnị furo mẹ ḅẹ sime anga, anị ḅẹ afuro wẹrịtẹ sime-ḅara, gbọrụ oke ḅụ mu jen oke la tẹ ikelema-koro.
21Benijamịnị furo mẹ ịna afuro ma wẹrịtẹ sime ḅara ḅụ mịọkụ nyana opu ama ma anie, Jeriko na, Bẹtị-hogila na, Ẹmẹkị-kẹzịzị na. 22Bẹtị-araba na, Zemaremu na, Bẹtẹlị na, 23Avimu na, Para na, Ọfara na, 24Kẹfaramọnị na, Ofini na, Geba na — oyi maa opu ama finji na arịḅẹ kala-ama ma na kẹ arị ḅụ sụa. 25Gibiyọnị na, Rama na, Birọtị na, 26Mizipa na, Kẹfira na, Moza na, 27Rẹkẹmụ na, Ipili na, Tarala na, 28Zela na, Halẹfu na, Jebusi (anie Jeruselemu) na, Gibiya na, Kiriyati-jeharimụ na — ngei opu ama fa jei na, arị ḅẹ kala-ama ma na kẹ arị ḅụ sụa. Miemẹ anie Benijamịnị furo mẹ ḅẹ sime anga mẹ, anị ḅẹ afuro ma wẹrịtẹ sime-ḅara ḅụ.
Currently Selected:
Jọsụwa 18: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria