Ayịzaya 45
45
KỊNỊNYANAḄỌ Ḅe Sayịrọsị Sẹlẹ Pakam
1KỊNỊNYANAḄỌ ḅe Sayịrọsị sẹlẹ pakama-ḅo tẹẹ, ori ama-daa!
Ori ọ̀ tọn tẹ ọ̀ sịẹ-sịẹ ma nẹngịma ḅa;
ori ọ̀ kẹ fịrịmarị, ò mu amadapụ kụrọ siin ịna aḅara;
KỊNỊNYANAḄỌ ḅe opu ama ma ḅẹ ogigo
aḅọkọ ma finji ọ̀ pịrị ḅa.
KỊNỊNYANAḄỌ Sayịrọsị ḅẹẹarị:
2Yẹrị ḅarana í etela tẹlẹma ḅa,
tẹ tụndụ ma na gele-akiri ma na ḅaa lẹsẹrẹma ḅa.
Àrị ojo ogigo-aḅọkọ ma kan-sara tẹ
anị ḅẹ ikulele ẹngbẹsẹ aị ma anyịma kọsịma ḅa.
3Kanakana ḅọị ayọ ḅụ arị ngọ tan-tan ị́ pịrị ḅa;
anịtẹso í nimi ḅa mịnẹ yẹrị anie KỊNỊNYANAḄỌ ḅee,
tẹ Izirẹlịapụ tẹkẹarị Tamụnọ ḅe ẹrẹ kẹ ị́ sịn tẹẹ.
4Arị ị́ tọn pakamarị ị́ ḅarasụa ị́ fịrịmẹnjịḅọ Izirẹlị pịrị,
yẹrị sẹlẹ ọkị tẹ apụ ma.
Arị opu kụn kẹ ị́ pịrị tẹẹ,
karakaraye ị́ ì nimi-a sọ.
5Yẹrị anie KỊNỊNYANAḄỌ ḅee, jen tamụnọ ofori.
Àrị ị́ nyana na-iḅi ịnyọ kẹ ị́ pịrị ḅa,
karakaraye ị́ ì nimi-a sọ.
6À miemẹ mịẹarị, ḅẹḅọ-ḅẹḅọ tomikiri gbọrụ
ịkọlị ḅụ ọkị mu osi ịkọlị la
nimi ḅẹ ḅara mịnẹ yẹrị anie KỊNỊNYANAḄỌ ḅe,
tẹ jen tamụnọ ofori.
7Yẹrị bele na kanakana na pakamarị;
Yẹrị boma na opu ḅụụ-fụka na ọkị-ḅoarị.
Yẹrị, KỊNỊNYANAḄỌ ḅe, ma mamgba mịẹarị.
8Àrị owu-ḅara-iḅi kẹ So-tọrụ ḅụ fịrịma ḅa eene ọkụ;
kiri mẹ finji tẹ anị daa-ọkị
tẹ omoni ḅara-ḅio paka-ḅo na tomḅọ la
kiri kẹ mḅọ pịrị na paka ḅa.
Yẹrị, KỊNỊNYANAḄỌ ḅe mịẹ tẹ miemẹ paka ḅa.
Tẹmẹ Aị Ma Na Tomi Mịẹarị Aị Ma Na Nyanaḅọ
9 #
Ayị 29.16; Rom 9.20 Jen ene aram-ḅẹlẹ anị tẹmẹḅọ na ye-nụnụa tẹ,
ja aḅaịn-aḅẹlẹ mamgba na kịka wararị ye mẹ?
Ọgbọịn-lịka anị kẹ ye-tẹmẹḅọ gbela-gbela, ò tiye mịẹarị?
Aḅaịn-ḅẹlẹ ḍuko-sụasụa, mịnẹ anị tẹmẹḅọ ḅara-ḍịn-a ḅoto?
10Amịna ḍaḅọ-na-iyingiḅọ-na ḅẹẹ-ḅẹẹ ḅọ emi,
“Ó tiegotẹ mị-ḅara kẹ ị̀ wẹrị?”
11KỊNỊNYANAḄỌ ḅe, Izirẹlị tẹkẹarị Fịafịa Ḅọ ḅe,
ḅaa paka ḅẹ ye tọn wẹrịarị ḅọ ḅe ḅẹẹarị,
“Ị́ kụrọ nyana-a ḅẹrẹ kẹ ì gbela
ị̀ awọmẹ gboloma ye ḅụ,
anịanịa à mịẹ na-iḅi ye ḍuko ị̀ pịrị!
12Yẹrị anie kiri mẹ tẹmẹḅọ ḅe
tẹ tomḅọ tẹmẹm ori anị yọ anga.
Ị̀ kụrọ ḅụ à So mẹ finjima saram;
Yẹrị ḅẹrẹtọn ịrụa mẹ na, akalụ mẹ na, lolia ma na pịrịarị.
13Yẹrị ḅarana Sayịrọsị jikemam ọ̀ kọrịnama kọrịị
tẹ à tọn wẹrị ye mẹ mịẹ tẹ ye kẹ kura ḅụ wẹrịị.
Ọ̀ mẹnjị ḅọrọ ye muarị etela mamgba à mịẹ gono-gonoma ḅa.
Ò siin ị̀ ama Jeruselemu nama ḅa,
tẹ kun-ḅara ḅio sime atomi ma mịẹ tẹ ini
ịna asịḅị atomi sọ ḅa.
Gbọrụḅọ sọ ori ọkọ, anịanịa ọḅụ kẹ ọ̀ pịrị fị-a
mịnẹ ò miemẹ mịẹẹ.”
Kụrọmamgba nyana KỊNỊNYANAḄỌ ḅe ọkọ ḅẹẹm.
14KỊNỊNYANAḄỌ ḅe Izirẹlị ḅẹẹarị:
Ijiputi na Sudanị na ngọ ma ị́ aị sọ ḅa,
tẹ sẹba ḅẹ gele-geletẹ owiapụ ma í omoniapụ sọ ḅa;
ini ikoli kẹ ini ịkasị tẹ ini í ḍuka-ḅo ḅa.
Ịn sịḅị-tuu tẹ ḍuko finji ḅa:
Tamụnọ ọmịnị na emii — ori kịngẹ Tamụnọọ.
15Izirẹlịapụ tẹkẹarị Tamụnọ ḅe tẹ amịna atomi ḅọrọmarị ḅọ ḅe,
anie amịna ḅụụ kikimarị Tamụnọọ.
16Oru-afụḅara mịẹarị apụ mamgba ḅụụ-jịrị ḅa; inimgba tọrụ-tuu ḅa.
17Kụma KỊNỊNYANAḄỌ ḅe Izirẹlị ḅọrọma tẹ,
anịsakị árị owu-ḅara-iḅi mẹ sime mu ḅẹẹ-sakị ḅẹẹ-sakị la ḅa;
gbala-gbala arị atomi ḅarị jen kẹ tọrụ-tuu ḅịa.
18KỊNỊNYANAḄỌ ḅe So ma tẹmẹm
ori anie Tamụnọ ḅẹẹ!
Ori kiri mẹ sime ḅẹ ḅara tọn tẹ anị mịẹm
ori anị mịẹ tẹ anị kụrọ sịẹ tẹ sime alamarị.
Ori anị mịẹ tẹ anị gberie-sọ anị ḅụ ofori ḅara sime-a,
kụma kịnị sime tẹ anga ḅẹ yọ.
Ori anie ḅẹẹarị ḅọ: Yẹrị anie KỊNỊNYANAḄỌ ḅee,
anịsakị jen tamụnọ ofori.
19Amụ à ḅọị anga ẹkwẹn-a
anịanịa à mịẹ ḅẹ ye kikima.
Amụ arị Izirẹlịapụ ma ḅara ḅii-a,
mịnẹ ịn kịnị ofori yọ mẹ ḅụ ị̀ ḍọkị.
Yẹrị anie KỊNỊNYANAḄỌ ḅee, tẹ karakara mẹ ḍukoarị;
à mịẹ tẹ kịnị kuraye nimiarị.
Tomikiri Mẹ Nyanaḅọ Ḅe Na Babịlọnị Ḅe Oru-afụḅara Ma Na
20KỊNỊNYANAḄỌ ḅe mẹẹ:
Ó ḅo kobirii, sịẹ-sịẹ ma ḅẹ atomi;
tẹ tomikiri mẹ daarị kụrọ mẹ ḅịkị ye ḅụ fịị-a so apụ,
ọ́ ḅẹrẹkọn mẹ ḅoo!
Tomi ma ịn sịn kẹ kịra oru-afụḅara ma dogi
mẹnjịma-mẹnjịmarị
tẹ inetẹ ịn ḅọrọma ḅịa atamụnọ ma tẹkẹarị
arị atomi ma in nimi gberie-sọ ofori!
21Ó ḅo ọmịna ḅịḅị ḍuko ḅẹrẹ-siri ḅụ;
yee ḅẹrẹ pakịrịarị apụ ma jụmọ-jụmọ na ḅẹrẹ-ḅiya.
Iḅere-iḅerea kụra ḅio ḅụ paka ḅẹ ye ḍuko ḅọ tụḅọ?
Yẹrị-yaa, KỊNỊNYANAḄỌ ḅe, amịna atomi
ḅọrọmarị Tamụnọ ḅe?
Jen tamụnọ ofori.
22Mịọkụ ọ́ pịkị ị̀ daa, tẹ ḅọrọmaa,
bebe tomikiri mẹ kana-koro ḅẹ atomi!
Yẹrị kịngẹ anie Tamụnọ tẹ emi ḅọ.
23 #
Rom 14.11; Flp 2.10,11 À minini kịnị pịrị ye mẹ karakaram
tẹ anị ḍima ḅịa.
Yẹrị sime-ḅara ḅụ à mininiarị tẹmẹ-la ḅara ḅụ:
Ḅẹḅọ-ḅẹḅọ ḅo tẹ ị̀ tọrọkọ kparakị ḅa
tẹ ye karị ḅa mịnẹ mḅọ amadaḅọ kụn kẹ ị̀ pịrị ḅa.
24Ịn ḅẹẹ ḅa mịnẹ ị̀ ḅụ ngẹrị ḅụ mie kịnị
owu-ḅara-iḅi na ịnyọ na ḍọkị nyana ḅarịye;
kụma ì ḍiki-ḅioḅuarị apụ mamgba tọrụsiẹrị ḅụ tọrụ-tuu ḅa.
25Yẹrị, KỊNỊNYANAḄỌ ḅe, Jekọbụ furo-ḅẹ-apụ mamgba pụkọ-pakamaḅo,
tẹ ini ì tokini ḅa.
Currently Selected:
Ayịzaya 45: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria