Ayịzaya 46
46
1Mie Babịlọnị ḅẹ oru-atamụnọ ma kunoma mẹ!
Gbọrụ sakị ḅụ in sunsin Bẹlị na Nebo na pịrị simem,
kụma ini arị tan yedogi-anama ọgọnọ gbanatẹ,
arị nwẹnị iku dogiye sọ ịnyọ-pọkọta tẹ anama ma pịrịarị.
2Oru-afụḅara ma inetẹ ịn ḅọrọma ḅịa;
ini in kuun-ọkị so tẹẹ.
Mie Babịlọnị atamụnọ ma kunoma mẹ!
3Jekọbụ furo paka apụ, ọmịnị ì pokii,
ị̀ atomi mamgba ḅụ kirikọn-apụ.
Ini ọmịnị iyi koroma kụra ḅio àrị ó ḍikiḍikiarị.
4Yẹrị ọmịna Tamụnọọ, tẹ pịkị ó ḍikiḍiki
nwenii ọmịnị omongi tẹ ọmịna sịḅị iḅulu ḅịya ḅa.
Yẹrị ọ́ tẹmẹm, à pịkị ó ḍikiḍiki ḅa;
à ḅarasụa ọ́ pịrị tẹ ọ́ pụkọ-pakamaḅo ḅa.
5KỊNỊNYANAḄỌ ḅe ḅẹẹarị, “Ọ́ kẹ ị̀ na pii-pii ḅẹẹ ḅarị ḅọ tụḅọ?
Jụmọ tẹ ị̀ kịkaḅọ emi?”
6Tomi ịna akpa ma finji-finji tẹ golu ọsụma pakama-ḅoarị;
tẹ in ye-tọn-aị ọgọnọ seleḅa tọn-tọn pakama-ḅoarị.
In golu-tẹmẹḅọ ọkọ tẹ ori anị kẹ tamụnọ mịẹarị;
anịtẹso ini iḅo tẹ sunsin anị pịrịarị.
7Ini anị kẹ apana ḅaa tẹ dogiarị;
ini anị kẹ gbọrụ yọ koromarị, tẹ anị yọ anị koro-simearị.
Gbọrụḅọ nwẹnị anị tẹkẹ-tẹkẹ, anị inetẹ pakịrị-a,
anịanịa mḅọ ḅọrọma opu ḅụụ-fụka ḅụ.
8Ó miemẹ kẹ ḅiokoromaa, ọmịnị si-mịẹapụ;
ọmịnị à mịẹ tẹ ye kẹ kuroma ḅụ suu.
9Ọmịnị alatẹ sakị ḅụ paka ye kẹ ḅiokoromaa;
ó minini mịnẹ yẹrị kịngẹ anie Tamụnọọ
tẹ ị̀ kịka jụmọ ofori.
10Sukuyọ-saakị ḅụ à mịẹ sime ye mẹ dogi-ḅo ḅẹ ye ḍukom;
alatẹ sakị ḅụ à ḍuko wẹrịm paka ḅẹ ye mẹ.
À ḅẹẹm mịnẹ à tọn tẹ aị ma gbala-gbala gbarị ḅịa,
anịsakị à mịẹ ḅẹ tẹ kẹ ḅiotọn ye goyegoye à mịẹ ḅa.
11Arị ịrụa mẹ saakịarị pakịrị anga mẹ ḅụ
gbọrụ tomḅọ sịn-arị ò ḅoo;
ori ekule kịka tẹ fiin ḅo jịasịma sịẹ
tẹ yẹrị tọn wẹrịtẹ ye mẹ mịẹ ḅa.
À ḍuko tẹẹ, anị mịẹ ḅa.
12“Ọmịnị ì pokii, kọngọ kụrọma atomi
tẹ kuromarị apụ mịnẹ owu-ḅara-iḅi ala-jụ emi.
13Àrị owu-ḅara-iḅi ene ọkị-ḅo kpekimarị
gbala-gbala anị ala-jụ ofori.
Ì owu-ḅara-iḅi alalị mẹ ala ḅaka ḅịa.
À Jeruselemu ḅọrọma ḅa
tẹ anịanga kụn ọkị-ḅo Izirẹlị pịrị ḅa.”
Currently Selected:
Ayịzaya 46: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria