Ayịzaya 44
44
KỊNỊNYANAḄỌ Ḅe Kịngẹ Anie Tamụnọ Ḅee
1KỊNỊNYANAḄỌ ḅe mẹẹ:
Mịọkụ poki, Izirẹlị, ị̀ fịrịmẹnjịḅọ, yẹrị
sẹlẹ ọkị apụ, Jekọbụ furo paka apụ.
2Yẹrị anie KỊNỊNYANAḄỌ tẹ ọ́ tẹmẹ ḅọ ḅe;
í iyi kụra-ḅio à ḅarasụa ị́ pịrịarị.
Ḅalafa ma, ị́yẹrị ị̀ fịrịmẹnjịḅọọ,
à sẹlẹ ọkị tẹ ḅẹlẹmarịapụ.
3À minji kẹ kpakịkịtẹ kiri mẹ pịrị ḅa
tẹ samụnọ kiri mẹ ḅụ okolo puu-puu ḅọrọ ḅa.
À ḅaka ḅara kẹ ị̀ Tẹmẹ kẹ ị́ awọmẹ ma aḅụụ ḅio su ḅa,
tẹ ì bomaa, ḅo ị́ furo-ḅẹ-apụ ọgọnọ gbana ḅa.
4In brebrema so-paka ḅarị ḅara minji ḅo-ḅo laarị osuka ọkụ,
in wilo nwẹn-sịn asịn tẹ mẹnjịarị minji akaka ḍiḅi-aị kịka ḅa.
5“Gbọrụḅọ-gbọrụḅọ ḅẹẹ ḅa, ‘Yẹrị KỊNỊNYANAḄỌ ḅe nyee.’
In ḅo Izirẹlịapụ ma ḅụ sọ ḅa.
Ọrụḅọ-ọrụḅọ KỊNỊNYANAḄỌ ḅe ẹrẹ kẹ amịna
ḅara-kọngọ kẹẹ ḅa, elekima ḅara ḅụ
tẹ ori Tamụnọ atomi ma ḅẹ gbọrụḅọ kẹ amịna ḅụụ sịn ḅa.”
6 #
Ayị 48.12; Mịẹ 1.17; 2.8; 22.13 KỊNỊNYANAḄỌ, ḅẹrẹtọn Izirẹlị pịrị, pịkị à gbaịn-arị ḅọ ḅe,
Kụrọmamgba nyana KỊNỊNYANAḄỌ ḅe ḅẹẹm:
Yẹrị anie Tarị, pịkị Kunoma, kpọkpọ gbọrụ Tamụnọ ḅẹ;
jen tamụnọ ofori, kụma yẹrịị.
7Inetẹ à kọrị ye kọrị ḅẹ jụmọ emi?
Tẹ paka tẹ ye mamgba ḍuko tẹrẹmẹ arị paka ḅọ tụḅọ,
sukuyọ-saakị ọkị mu kunoma la?
8Ọ́ ḅalafa ma, ị̀ atomi!
Ó nimi wararị mịnẹ elemu sakị kụra ḅio ọkị-ḅo mịọkụ la
paka ḅẹ ye mamgba à ḍuko wẹrịm,
ọmịnị mie ị̀ ḅẹrẹ-kiri sime apụ.
Jen tamụnọ emi?
Kụrọ nyana lama wararị tamụnọ tẹ gbala-gbala
amụ àrị ẹrẹ naa-a ḅọ emi?
Ịkịankoroḅọ Ḅe Tomḅọ Ḅara Kẹ Tẹmẹ Aị Tẹkẹ Mịẹ-simarị
9Oru-afụḅara mịẹarị apụ mamgba papaa apụ, tẹ ịn kẹ ye sịn lamarị atamụnọ ma mịẹ ḅụ sọ-a ḅara ḅakam. Mịna atamụnọ ma tẹkẹarị apụ ma tọrụngbọ-pụụntẹ, gberie-sọ nimi-a apụ ịna atọrụ-tuu ḅa. 10Ye fụḅara tẹmẹ tẹ sunsin anị pịrị mẹ gbọrụ iḅi sọ nyana-a! 11Sunsin arị pịrịarị-ḅọ pịrịarị-ḅọ iderima ḅa. Oru-afụḅara mịẹarị apụ ma tomi nwẹn ḅẹẹ sakị, ịn mịẹ ḅaka ḅẹ jen ye ofori. Yee ịn ḅẹrẹkọn ḅo — ịn tẹmẹ-naịn-naịn ḅa tẹ pịkị tọrụ-tuu ḅa.
12Tẹmẹḅọ ḅe ikulele ikiḅa ọkị tẹ kẹ fịnị ḅio fọịarị. Ọ̀ kụrọtẹ ḅara-kọngọ mẹ amana kẹ anị ḅakụ ḅo ye sọmarị. Ọ̀ kọrịnama mẹ kọrịarị sakị ḅuru ọ̀ tarịarị, minji sọ, tẹ ịnyọ ọ̀ taarị.
13Akanịḅọ ḅe sịn mẹ tọn pakama-ḅoarị. Ọ̀ tarị ye ọgọnọ tọrụ kẹ anị sime na-iḅi ḅara mị pakamarị ori ọ̀ namakọrịaị kẹ anị kara tomḅọ kịkamarị, tọrụ-gbẹtẹ tomḅọ kịkaye, kẹ ọ̀ warị ḅio koroma ḅẹm. 14Ẹbịsịya sida sịn-arị sịn, anịanịa oku sịn, anịanịa Sayịpẹrẹsị nwẹn-sịn asịn mie ọ̀ pẹlẹ-gbin ye opu piri mẹ ḅio tẹ kẹ anị mịẹ. Anịanịa ọ̀ lọrẹlị nwẹn-sịn sịn mẹ ḍiḅi tẹ koru tẹ eene mịẹ tẹ anị so-paka ḅa. 15Tomḅọ sịn ọkị tẹ anị ḅẹ gbọrụ pakịrị kẹ fịnị-tọnọarị, tẹ gbọrụ pakịrị kẹ oru-fụḅara mịẹarị. Ọ̀ gbọrụ pakịrị kẹ fịnị-sụkama tẹ anị kọrị tẹ ò temi tẹ kẹ ori oju ọfịrịmarị, pịkị kẹ fịturu fọịarị; ori asi pakịrị kẹ tamụnọ mịẹ tẹ sunsin anị pịrịarị. 16Sịn mẹ ḅẹ jaị ọ̀ kẹ fịnị tọnọarị, ọ̀ nama fọị pẹị tẹ anị ọ̀ ḅụụ na iḅiarị. Ọ̀ fịnị mẹ temi-temi tẹ ḅẹẹarị, “Anị kpọma iḅi tẹ ọfịrịarị ḅara ḍiki! Iḅi ḅụra tẹ fịnị!” 17Sịn mẹ ḅẹ kọn ye mẹ ọ̀ kẹ oru-fụḅara mịẹarị, anị tẹso, ò tuu ideri-koro tẹ sunsin anị pịrịarị. Ori anị tẹkẹ-tẹkẹ tẹ ḅẹẹarị, “Ị́yẹrị anie ị̀ tamụnọọ, ị̀ ḅọrọmaa!”
18Ọkọ sime apụ ma ini oḅori-sọ ḅụra tẹ ḅarị ịn mịẹarị ye nimi-a. Ini ịna atọrụngbọ na ịna akuroma na gbaịn karakara mẹ pịrịarị. 19Oru-afụḅara mịẹarị ḅọ ḅe nimi kala ye anịanịa sịḅịḅio nyana tẹ ḅa, “À sịn mẹ ḅụ jen anga dọkịmam. Àrị anyịmgbọ mẹ ọgọnọ fịturu fọịnm, pịkị nama fọị pẹịm. Tẹ sịn mẹ ḅụ kọn ye mẹ à kẹ oru-fụḅara mịẹm. Mie yẹrịị, à tuu ideri-koro sịn ikiḅa pịrịarị!”
20Ọ̀ fọọn kẹ fịye sọma tẹ fịarị; Ori oḅori akuroma ma ọ̀ da irima mu ọ̀ ḅarasụa nyana ḅẹ yọ saḅa tẹẹ. Ò minini ḍụkụ ḅịa mịnẹ ori ọlọ-sịẹma wararị oru-fụḅara mẹ gbala-gbala tamụnọ-a, ḅọkọ-ḅọkọ mamgba ḅụ.
KỊNỊNYANAḄỌ Ḅe Tẹmẹḅọ Pịkị Ḅọrọmaḅọ
21KỊNỊNYANAḄỌ ḅe mẹẹ,
“Izirẹlị, miemẹ kẹ ḅiokoroma;
ḅiokoroma mịnẹ ị̀ fịrịmẹnjịḅọọ.
Arị ị́ tẹmẹm ị́ ị̀ fịrịmẹnjịḅọ sọọ,
anị sakị gbala-gbala arị ị́ kẹ ḅioḅọrọ ḅịa.
22Oḅuto So-tọrụ kaan-so ḅara arị ị́ asi ma ọfịn siin tẹ.
Pịkị ị̀ ḍọkụma-ḅoo; yẹrị anie ị́ ḅọrọmarị ḅọ ḅee.”
23So, ḍereku ḅụ olokuu!
Tomikiri mẹ ḅẹ pokolo ayọ, ọmịnị olokuu!
Tụndụ amẹẹ, ó ḍereku ḅụ olokuu; opu piri mẹ ḅio
simearị sịn goyegoye sọ!
KỊNỊNYANAḄỌ ḅe ọ̀ kụrọ ḍie-pakama tẹ
ori atomi Izirẹlị ḅọrọma ḅụ.
24“Yẹrị anie KỊNỊNYANAḄỌ ḅee, ị́ ḅọrọmaḅọ;
Yẹrị anie ị́ tẹmẹḅọ ḅee.
Yẹrị anie KỊNỊNYANAḄỌ ḅe, ye mamgba Tẹmẹḅọ ḅee. Yẹrị ngẹrị So mẹ nụnụ finjimam
à kiri mẹ tẹmẹ sakị, ḅarasụa gbọrụḅọ-sọ ofori.
25 #
1 Kọr 1.20
Ḅịrị-ẹrịapụ ma arị ịn kẹ oḅori apụ sọmarị
tẹ lolia ḍiki apụ tọrọkọ paka ḅẹ tẹ ḍukoarị
aị ma mịẹ tẹ arị gbarịarị.
Ye-nimiapụ ma ẹkwẹn ma à ḍuko kan-siin-arị
tẹ mịẹ tẹ kịnị ẹrịarị mịnẹ ịna nimi mẹ oḅori.
26Kụma ị̀ fịrịmẹnjịḅọ tọrọkọ paka ḅẹ ye ḍuko arị sakị,
arị ì oku-mẹnjịḅọ fịrịma mu à tọn wẹrị aị mịẹfinji ḅẹ sakị,
à mịẹ tẹ à tọn wẹrị aị ma na tọrọkọ paka
ḅẹ tẹ ò ḍuko aị na ò ḍuko ḅara pakarị.
À ḍuko Jeruselemu pịrịarị mịnẹ kịnị siin anị anga anga ḅa,
tẹ Juda ḅẹ opu ama ma in siin arị nama ḅa.
Arị opu ama ma sara ma ḅio saakị paka-ḅo ḅa.
27Ẹkwẹn ḅịḅị mie à kẹ abajị samụnọmarị.
28 #
2 Pkị 36.23; Ẹzị 1.2 À Sayịrọsị ḅẹẹarị, ‘Ị́yẹrị anie ḅẹrẹtọn tomi pịrị ị̀ pịrị ḅarị ḅọ;
à ḅii ye mie ị́ mịẹ ḅarịye;
ị́ tọn tẹ in siin Jeruselemu nama ḅa
pịkị Tamụnọ-warị mẹ ḅẹ suku mẹ
saakị ḅa.’ ”
Currently Selected:
Ayịzaya 44: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria