Ayịzaya 3
3
Jeruselemu Ama Ḅio Wọlọgịarị
1Mịọkụ, KỊNỊNYANAḄỌ ḅe, Kụrọmamgba Nyana KỊNỊNYANAḄỌ ḅe, Jeruselemu ḅụ na, ḅẹẹye-ḅẹẹye na ḅẹḅọ-ḅẹḅọ na, tẹ kịnị kẹ ḅiokpọmarị ye ọkị so ḅẹ-yearị. Ori ịna fịye na minji na ọkị so ḅa, 2ịna ḅụ tẹmẹ-kpọmatẹ ye mịẹarị apụ na, ịna ọmụapụ na, ịna ḅẹrẹkọn apụ na ịna ịkịankoroapụ na, ịna ḅịrịapụ na, ama ḅẹ ḅẹrẹtọn-apụ na; 3ịna ọmụ-alapụ na, ama ḅẹ alapụ na, ịna ama sime na-iḅim nwẹn ḅẹẹ ḅara ịgbanịarị apụ na, pịkị ḅẹḅọ-ḅẹḅọ tẹ majịkị kẹ ye mịẹarị apụ na. 4KỊNỊNYANAḄỌ ḅe mịẹ tẹ ye mịẹ-mịẹ ḅara nimi-a owiapụ-awọmẹ ḅẹrẹtọn tomi ma pịrị ḅa. 5In si ḅara kẹ jụmọ-jụmọ na mịẹ ḅa ye sime tomḅọ pịrị ḅara gotẹ. Ịwọ awọmẹ ḅarị ịna omongiapụ mangịma ḅịa, papaa atomi iḅi ịn nẹngị apụ mangịma ḅịa.
6Gbọrụ sakị ḅo ḅa, tẹ gbọrụ furo-ḅẹ-apụ ịna ḅụ ḅẹ gbọrụḅọ sẹlẹ-pakama-ḅo tẹ ọ̀ ḅẹẹ ḅa, “Anị sime-ḅara, sime-ḅara sọ, ị́yẹrị paa sụa ḅẹ kapa nyana wararị, mie ḅụ wamịna sịḅịdaḅọ sọọ mị ḅụụ-fụka sakị mẹ ḅụ.”
7Kụma ọ̀ pakịrị ḅa, “Yẹrị-yaa ndẹ! Àrị inetẹ ḅarasụa ọ́ pịrị ḅịa. Fị, fị gberie-sọ à nyana-a, anịanịa kapa. Ọmịnị ị̀ kẹ ọmịna sịḅịdaḅọ mịẹ ma!”
8Inn, Jeruselemu fa tẹẹ! Juda ḅịkị koroarị! In ḍukoarị ye na mịẹarị ye na goyegoye KỊNỊNYANAḄỌ ḅe na tụḅụrụarị. Ịn ḅịḅị ḅọị-a ḅara kẹ KỊNỊNYANAḄỌ ḅe ḅioju mịẹ-simarị. 9Ịn kẹ ḅioḅẹngbọ sụa wararị aḅẹrẹ ma ḅẹrẹ kẹ ịna aḅara sima ḅa. Gege tọrụ mie ịn kẹ si mịẹarị, Sọdọmụ ḅẹ apụ mịẹ ḅara. Ịn fa tẹ, ini ḅara na anị dogi-ḅo ịna aḅụụ pịrịm.
10Karakaraye-mịẹapụ ḅioḅẹlẹ ḅa, tẹ ye pịkị ini na iḅi ḅa. Ini ịn kọrị ḅo ye ḅẹ iḅi fị ḅa. 11Kụma si-mịẹapụ ịn fa tẹẹ! Ini kẹ jen-apụ mịẹ tẹ aị ma, mịọkụ jen-apụ kẹ ini sọ mịẹ ḅa.
12Igbigi kẹ kịnị ḅọlọ apụ ị̀ atomi ponomarị, tẹ ịn ḅara ḅụ saa ọlọ apụ ini inomarị. Ị̀ atomi, ọmịna sịḅịdapụ ọ́ da irimarị, mie ḅụ ọ́ da-mu ḅẹ anga ó nimi-a.
KỊNỊNYANAḄỌ ḅe ori atomi Kọn-arị
13KỊNỊNYANAḄỌ ḅe tẹlẹma tẹ ọ̀ ḅịḅị ḍuko ḅẹ tẹ; ọ̀ tẹlẹma tẹ ori atomi kọn ḅẹ tẹ. 14KỊNỊNYANAḄỌ ḅe ori atomi ma ḅẹ omongiapụ ma na sịḅịdapụ ma na kẹ ḅẹrẹkọn ḅoarị. Ò miemẹ kẹ ịna sịḅị sẹịn-arị: “Ọ́ kụrọ-aḍụọ fọịn tẹẹ, anịsakị igoin-apụ ma ḅara ọmịnị ọkị aị ma ọmịna awarị ḅio ḅin wararị. 15Anị ọmịna kiri-a ọmịnị ị̀ atomi ma gbẹẹ kọsịma tẹ igoin-apụ ma igoin kẹ ịna ḅịḅị da. Yẹrị Ḅẹrẹtọn kụrọ Nyanaḅọ, Kụrọmamgba Nyana KỊNỊNYANAḄỌ ḅe, ẹkwẹn tẹ.”
Kẹ Jeruselemu ḅẹ Ereme Ḅeri Nụnụarị Ẹkwẹn
16KỊNỊNYANAḄỌ ḅe ḅẹẹm, “Jeruselemu ḅẹ ereme ma ḅụụ-gelemarị ḅara ḍiki! Ini ịna anini ma saakị gelema tẹ mẹnjịarị. Sakị mamgba ịn kịnị in ḍiki ḅẹ ḅara kẹ ye mịẹarị. Ịn yọngọ ma mẹnjịarị, tẹ ịn kẹ ịna aḅụọ-ịkarị sụa wararị anụnụma ma nwẹnị gwaịn-gwaịnma fiearị, ịn mẹnjịarị sakị. 17Kụma à fomu-ḅara kẹ ịn pịrị ḅa — àrị ịna sịḅị-ḅẹ-inume sẹịn siin ḅa, tẹ ịn kpụkpụnụ wararị ḅara mẹ kẹ ịn wẹrị ḅa.”
18Gbọrụ ene ḅaka ḅoarị, KỊNỊNYANAḄỌ ḅe Jeruselemu ḅẹ ereme ḅara ịn kẹ ḅụụ-gelemarị aị mamgba ọkị so ḅa — ḅụụ-ḅirima aị ma tẹ ịn kẹ ịna ḅụọ-ịkarị na ịna asịḅị na, ịna akọngọ na, 19pịkị ịna aḅara kọngọ na ḅirimarị aị ma. Ori ịna tọrụ gbaịn aḅịtẹ siin so ḅa, 20ịna asun sọ; agba-apoku-apoku tẹ ịn kẹ ịna aḅara kọngọ na ịna akonju na kpọọarị aị ma sọ; 21ịna ḅara-tụngbalị na ịna anini na ḅụ ịn sụarị gulu ma na; 22ịna iḅi vọrọrọ-akapa ma na, ọgọnọ ḅẹ akapa ma na, ọlọ-akpa ma na; 23ịna tolu-tolutẹ ḅịtẹ kẹ gbin akapa, ịna pịna-pịna pọkụtankịsị na kọngọ kpọọ ḅịtẹ na, nangwọtẹ tọrụ-gbaịn ḅịtẹ na, kẹ sịḅị ḅụ gbaịn sararị ye sọ.
24Ịn sẹntị asana ḅẹ nakara, ịn fụrụ ḅa; ini iḅi ḅiri-ponoye kẹ ḅiri pono ḅẹ nakara, ịn kụrọtẹ ḍiki kẹ ḅiri kpọọ ḅa; ini iḅi sịḅị-ḅẹ-inume sụa ḅẹ nakara ịna asịḅị firi ḅa; ini iḅi kapa sụa ḅẹ nakara, ịn kụrọtẹ ḍiki kẹ ḅiri kpọọ ḅa; ini iḅi sịḅị-ḅẹ-inume sụa ḅẹ nakara ịna asịḅị firi ḅa; ini iḅi kapa sụa ḅẹ nakara, ịn kanị-kanịtẹ aị ḅiri ḅa. Ịna Iḅi, pịkị-ḅo ḅụụ-jịrịma ye sọ ḅa!
25Ini ịna ama ḅẹ owiapụ ma, inn, jen-a jen-a kụrọ-tẹịn apụ ma, ḅaa ḅa ọmụ ḅio. 26Ama mẹ ḅẹ onu-aḅọkọ ma kururu tẹ owu ḅa, tẹ ama mẹ ḅioju ịn paụmatẹ kiri ḅio lẹgị wararị ẹrẹḅọ kịka ḅa.
Currently Selected:
Ayịzaya 3: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria