Ayịzaya 2
2
Gbamaso Dein
(May 4.1-3)
1Mie Juda na Jeruselemu na gboloma oku mẹ tẹ
Tamụnọ kẹ Emọzị tụḅọ Ayịzaya pịrị ye mẹ:
2Tọrọkọ-jụ ḅo ḅarị ene ma ḅụ
Tamụnọ-warị mẹ sịẹ wararị tụndụ mẹ
tụndụ mamgba ḅụ geletẹịn ye sọ ḅa,
sịẹ gele tụndụ mamgba ḅọrọ faa ḅa.
Tọnwa asịẹ minji seri sọ ḅara kẹ
gbii-gbiima anị dama-ḅo ḅa,
3tẹ ịna atomi ḅẹẹ ḅa,
“Ó yee wa KỊNỊNYANAḄỌ ḅe tụndụ mẹ kpọlị iwo
mu Izirẹlịapụ tẹkẹarị Tamụnọ ḅe Warị mẹ la.
Ori ò ḅiiarị wa mịẹ ḅẹ ye kẹ wa toluma ḅa;
wa ori sẹlẹ-ọkị tẹ etela mẹ ḅụ mẹnjị ḅa.
KỊNỊNYANAḄỌ ḅe tolumaye mẹ Jeruselemu ḅụ paka-ḅoarị ẹrẹsị;
Zayọnị mie ò sime tẹ ẹkwẹn ori atomi pịrịarị.”
4 #
Jow 3.10; May 4.3 Ḅẹrẹ nyana wararị opu asịẹ ma ogboku ọ̀ ḅẹrẹ fama ḅa.
Ini ịna okologie ma kẹ kiri soku tẹ ye ḍiḅi aị tẹmẹ ḅa
tẹ ịna aḅẹkẹrẹ ma kẹ osuka pẹlẹ ogie tẹmẹ ḅa.
Sịẹ ma ḅarị gbala-gbala ọmụ kẹ jụmọ-jụmọ gbin ḅịa,
ịn ḅarị pịkị gbala-gbala tẹlẹma ọmụgbin pịrị ḅịa.
5Mịọkụ, Jekọbụ furo-ḅẹ-apụ, ó ye wa KỊNỊNYANAḄỌ ḅe pịrịarị bele mẹ ḅio mẹnjị.
Opu Ẹkwẹn Kọn Faa Ḅa
6Yei Tamụnọ, ị́ ị́ atomi sịkị tịya, Jekọbụ furo-ḅẹ-apụ ma Amakiri mẹ ḅụ majịkị amịẹaị mie ịn mịẹarị, anie ịrụa saakị paka-ḅoarị yọ mẹ na Filisiteni na ḅụ ḅo aị ma. Tomi ma jen asịẹ ḅẹ ama-anganga-ḅara kẹ amịna aị sọma tẹ mịẹarị. 7Ịna amakiri mẹ ḅụ seleḅa na golu na ḅin tẹ, tẹ in kiki ofori ḅara kẹ ngọ-kọn sara tẹ. Ịna amakiri mẹ ḅụ asụ-asụ-asụ ḅin tẹ, tẹ in kiki ofori ḅara kẹ kirimẹnjị-ọmụarụ nyana sara tẹ. 8Ịna amakiri ḅụ oru-afụḅara, fụḅara ḅin tẹ, tẹ ini ḅarana tẹmẹ-aị mie in sunsin pịrịarị.
9Ịna ḅụ ọrụḅọ-ọrụḅọ iderima tẹ tọrụ-tuu ḅa ḅụụ-jịrị ḅụ. KỊNỊNYANAḄỌ, wẹrịso ịn pịrị ma!
10 #
Mịẹ 6.15; 2 Tẹs 1.9 Ịn tụndụ ma ḅẹ ịkụ ma ḅụ ḅẹ fukuru ma ḅio ḅọị ḅa, anịanịa ịḅụkụ soku tẹ ḅụụkụrọma tẹ KỊNỊNYANAḄỌ ḅe ịganị ḅụ mangị ḅụ anị anga ḅọị tẹ ḅarị ori opu kụrọ na ebube na ẹrị ḅịa ḅara! 11Gbọrụ ene ḅaka ḅoarị, tomina ḅụụ-gelema kuno tẹ in tomina Opu ẹkwẹn mẹ ḅaa siin ḅarị sakị. Anịtẹso ịn KỊNỊNYANAḄỌ ḅe ngẹrị gelema ḅa. 12Anị ene mẹ ḅụ, Kụrọmamgba nyana KỊNỊNYANAḄỌ ḅe kụrọ nyana tẹ ḅụụ-gelema tẹ “ị̀ ḅụụ ngẹrị ḅụ” kẹ amịna ḅụụ ḅẹẹarị apụ mamgba iderima ḅa. 13Lẹbanọnị ḅe geletẹ sida sịn ma ori arị sukuruma-gbin ḅa, pịkị Basani amakiri ḅẹ oku nwẹn-sịn asịn mamgba sọ. 14Gele tụndụ ma na tụndụ ma na sọ ọ́ ḅaa lẹsẹrẹma ḅa, 15geletẹ kụrọ tẹ awarị goyegoye, pịkị ọmụ la ḅịa ayọ mamgba gbori onu ma sọ. 16Ḍụḅa tẹịn, pịkị tọrụ-gbẹ tẹịn opu arụ mamgba ò ḅilema ḅa. 17Tomḅọ opu ẹkwẹn mẹ ideri ḅa, tẹ tomina ḅụụ-gelema mẹ ḅo ḅụụ-iderima ḅa; KỊNỊNYANAḄỌ ḅe ngẹrị Geleḅọ sọ ḅa anị ene mẹ ḅụ, 18tẹ oru-afụḅara mamgba kịnị ḅarị arị ẹrị ḅịa.
19Tomi ịkụ tụndụ ma ḅẹ fukuru ma ḅio ḅọị ḅa, anịanịa ịḅụkụ soku ḅa, ḅụụkụrọma tẹ KỊNỊNYANAḄỌ ḅe ịganị na, kụrọ na, ebube na ḅụ ḅụụ kikima gotẹ, ò ḅo tomikiri mẹ jike ḅẹ ḅoarị sakị ḅụ. 20Anị ene mẹ ḅụ, in golu na seleḅa na kẹ tẹmẹ ịna ḅụụ pịrị oru-afụḅara ma ịn kẹ gbin koroma so piri-ofunguru amẹẹ na poku amẹẹ na pịrị ḅa. 21KỊNỊNYANAḄỌ ḅe ḅo kiri mẹ jike ḅarị sakị mẹ tomi ịḅụkụ ḅio na ịkụ tụndụ ḅẹ afukuru ḅio na ḅọị ḅa, ḅụụkụrọma tẹ ori ịganị ḅụ mangị-so, tẹ ọ̀ kụrọ na ebube na ḅụ ḅụụ kikima ḅẹ ḅara.
22Ḅarị jen kẹ fịị, fịị atomi kẹ ḅiokpọma ma. In tiye la?
Currently Selected:
Ayịzaya 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria