Nimi Tolumaḅọ 4
4
1Anịtẹso à pịkị siin tomikiri mẹ ḅụ ịn tomi ponoma ma ḅọrọarị ḅara mẹ ẹrịm. Ịn ponomarị apụ ma owuarị tẹ ḅarasụa ịn pịrị tẹ ịna ḅiokpọmarị gbọrụḅọ-sọ ofori ḅara ḍikii! In ponomarị apụ ma pakịrị ḅụ kụrọ simem ẹrẹsị gbọrụḅọ-sọ ḅarasụa ịn pịrị tẹ ịna ḅio kọnma-a. 2À nwẹnị kuroma mịnẹ fịị ḅọrọtẹ apụ ma iḅi-fụḅara sụa paa ḍumo-sime wararị apụ ma nẹngịm; 3kụma amụ iyi-a ḅọ iḅi fịị tẹ apụ ma na, ḍumo wararị apụ ma na nẹngịm; gbala mḅọ amụ tomikiri mẹ ḅụ ịn mịẹarị si amịẹaị ma ẹrị-a ẹrẹsị.
4Anịtẹso arị ẹrịm mịnẹ tomḅọ mḅọ na kpeki tẹ angarị ḅọ mọnị ḅụ mie lịlị mẹmgba na, kọrịnama kọrị ḍin mẹmgba na ḅo yee. Miemẹ sọ ḅintẹ ḅara kẹ anị fieye nimi-a ye, tẹ fẹrụ ḍukarị ḅọ ọkụ.
5Ye-nimia-ḅọ ḅe ori aḅara kẹ ọ̀ ḅụọ ogbo suum tẹ ḅuru ọ̀ ḅaam.
6Boowa ye nyana tẹ dein sime mẹ iḅi kẹ lịlị ḅaka tẹ tọnwa aị nyana tẹ fẹrụ ḍuka nẹngịm.
7À pịkị siin tomikiri mẹ ḅụ jen ḅintẹ ḅara kẹ anị fieye nimi-a ye ẹrịm: 8tụḅọ anịanịa gbọrụ mịnaḅọ sọ nyana-a ḅọ nwẹnị lịlịarị tẹ mḅọ kọn lịlị mẹmgba ḅụ kuroma nyana-a, mḅọ kọn tẹ ngọ mẹmgba mḅọ furo ḅin-a, mḅọ pịkị gbala-gbala amịna ḅụụ gbela-a: “À gbeke lịlị tụḅọ pịrịarị, tẹ à nyana na-iḅi tọrụ-ḅẹlẹ famarị. Miemẹ sọ ḅintẹ ḅara kẹ anị fieye nimi-a ḅintẹ ḅara kẹ anị fieye nimi-a ye, tẹ pịkị tomḅọ ḅioḅẹlẹma-a mịẹye.”
9Maa apụ iḅi gbọrụḅọ nẹngịm, kẹ gotẹ ọkọ ḅarị, ịn gbọrụ ḅụụ ḅụ kọrị ḅarị kọrịnama iḅi gbẹẹ-ye ọkị-ḅo ịn pịrị ḅa. 10Gbọrụḅọ ḅịkị-ḅịkị, osi-ḅọ ḅarasụa ḅịkị ḅọ mẹ pịrị ḅa, kụma sule-ḅịḅị sime ngẹrị mẹnjị ḅọ mẹ pịrịị, gbala mḅọ ḅịkị, ḅịkị, mḅọ jen ḅarasụa nyana-a ẹrẹsị.
11Maa apụ gbọrụ anga mono-mono, ịn jụmọ-jụmọ oju mẹmẹmam, kụma gbọrụḅọ ngẹrị tọ-ḅara mono tẹ mḅọ oju mẹmẹma ḅẹ? 12Anịsakị gbọrụḅọ inetẹ ngẹrị simearị gbọrụḅọ nẹngịma ḅa ḅẹsọ, maa apụ inetẹ ò kuḅu daa sịẹ ḅa. Tẹra aḅụụ ḅụ parị wararị ḍigi kpekele pẹlẹ-pẹlẹ-a.
13Igoin wararị kụma ye-nimi tẹ asatụḅọ iḅi omongitẹ ye-nimia amadaḅọ nẹngịm, oriḅe tẹ ḅarị daa-karakarama ẹkwẹn ọkị-a ḅọ ḅe, 14anị asatụḅọ ḅe nwẹnị ikoli ḅio sime tẹ paka-ḅo emine mẹ ọgọnọ lẹgị ḅọ-o, sịẹ mẹ ḅio igoin furo ḅio iyi ḅọ sọ. 15Anị sime-ḅara sime-ḅara sọ, à ḍumo wararị tẹ tomikiri mẹ ḅụ mẹnjị ma-ḅọrọarị apụ mamgba na, anị asatụḅọ ḅe tẹ amadaḅọ ḅe kiri ọkị ḅarị ḅọ ḅe na ẹrịm. 16Arị atomi mamgba tẹ amadaḅọ ḅe ḍikiḍiki ḅarị apụ ma kunoma nyana-a; anịtẹrẹmẹ paka-ḅo ḅarị jen-apụ ọ̀ ḅụụ ḅụ ḅioḅẹlẹ nyana ḅịa. Miemẹ sọ ḅintẹ ḅara kẹ anị fieye nimi-a ye, tẹ fẹrụ ḍukarị ye ọkụ.
Currently Selected:
Nimi Tolumaḅọ 4: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria