Nimi Tolumaḅọ 3
3
Ye Goyegoye Amịna Sakị Nyana Wararị
1Tomikiri ye goyegoye amịna sakị nyana wararị, pakarị ye goyegoye pịkị anị ḅẹ sakị kẹ pakarị.
2Tomḅọ iyi sakị emii, tomḅọ fị sakị emii.
Fịye ḍiḅi sakị emii, fịye soku sakị emii.
3Kịnị-ḅa sakị emii, kịnị-gwọ sakị emii.
Ye kan-sara sakị emii, ye nama sịẹma sakị emii.
4Owu sakị emii, ḍẹrị sakị emii.
Kururu sakị emii, sẹkị sakị emii.
5Ḍụḅarị apakịrị kẹ wakị-nguma sakị emii.
Ḍụḅarị apakịrị kobiri gboloma sakị emii.
Ekpe kẹ jụmọ-jụmọ lama sakị emii.
Jụmọ-jụmọ ḅụụ ḅele sakị emii.
6Ḍọkị sakị emii, fama sakị emii.
Koko sakị emii, kẹ gbin nguma sakị emii.
7Ye kaan sakị emii, ye gbin-gboloma sakị emii.
Gbọsime sakị emii, ẹkwẹn sakị emii.
8Kịnị ḅẹlẹma sakị emii, kịnị ḍiki-ḅioḅu sakị emii.
Ọmụgbin sakị emii, dein sakị emii.
9Kọrịnama-kọrịḅọ ḅe ọ̀ kọn lịlị mamgba ḅụ tọ sọye nyana?
10Kọrịnama mẹ tẹ Tamụnọ kẹ tomina awọmẹ pịrịm kọrịị nwẹn ḅẹẹ kụrọ kọrịnama ma àrị arị sime-ḅara ẹrị tẹẹ. 11Ò ye goyegoye mịẹ tọrụ-gbẹ ḅara wẹrị wararị anịḅẹ sakị ḅụ, tẹ jen-a jen-a, pịkị sịḅịḅio kẹ ḅọrọtẹ sakị ḅụ mịẹ ye na, tọrọkọ-jụ ḅụ mịẹ ḅarịye na ọlọ gbamaso ḅẹ ḅioḅẹngbọ kẹ wa pịrịm, anịsọ aniemẹ tẹ Tamụnọ sukuyọ-saakị ọkị mu kunoma la ḅụ mie ye mẹ wa inetẹ ḍọkị-nimi ḅịa. 12À nimi wararị mịnẹ ịn ḍumo wararị sakị goyegoye ini na iḅi kẹ fị-na-ḅuu-na, ḅioḅẹlẹ na nẹngị ḅẹ ye ofori; 13aniemẹ anie Tamụnọ ḍiepịrịye tẹ ọ̀ kẹ tomḅọ pịrị ye, mịnẹ ḅẹḅọ-ḅẹḅọ fị, pịkị ḅuu tẹ mḅọ nụnụ ye mẹmgba ḅẹ tọrụ-ḅẹlẹ nyana-a. 14À nimi wararị mịnẹ Tamụnọ mịẹ ye, mịẹ ye sime gbamasom; kẹ anị ḅụ sụa-sụa ye, anịanịa sin-sin ye ofori; Tamụnọ ọkọ kẹ anị mịẹm, mịẹ tẹ tomi ò ḍiki-ḅalafa na-iḅi ḅara kẹ ọ̀ tọrọkọ ḅalafa ḅẹ ḅara. 15Anie mẹ tẹ mịọkụ simearị ye mẹ, iḅerea sakị ḅụ sọ emi; aniemẹ tẹ ḅo ḅarịye mẹ, anịngẹ-kụraḅio ḅo tẹ emi, kẹ gotẹ ọkọ ḅẹẹarị, Tamụnọ mịẹtẹ mịẹ ḅọrọtẹ ye mẹ pịkị siin mịẹarị.
Tomikiri Ḅụ Simearị Inoma
16Anie sikima, tomikiri mẹ ḅụ àrị ẹrị ye anie, si-sịḅịḅio karakara ḅẹrẹkọn kiri ọkị tẹẹ, tẹ karakara mẹ sime na-iḅi kiri sọ si-sịḅịḅio mie emi yee. 17À nwẹnị ì ḅioḅẹngbọ ḅụ ḅẹẹ, Tamụnọ karakaraye-mịẹḅọ ḅe na, si-sịḅịḅio-sụaḅọ ḅe na kọn ḅa, kẹ gotẹ ọkọ ḅẹẹarị, ọ̀ sakị pẹlẹ tẹ kẹ ḅẹrẹ goyegoye na, kọrịnama goyegoye na pịrị tẹẹ. 18À nwẹnị ì ḅioḅẹngbọ ḅụ ḅẹẹ, tomina awọmẹ ma gboloma ye kụma, Tamụnọ ịn pekele-ḍikiarị, kẹ ịn ḍie mịnẹ ini iḅi piri-ḅio-ḅẹ anama nẹngị-a. 19Kẹ gotẹ ọkọ ḅẹẹarị, tomina awọmẹ ma na, piri-ḅio-ḅẹ anama ma na sọ tọọn wararị gbọrụ ye mẹ mie sime ịn pịrị yee: tomḅọ fịị ḅara, mie nama sọ fịịarị ḅara. Inimgba gbọrụ ḅara. Inimgba gbọrụ ḅara kẹ ọwụ sarasara pakamarị, tẹ tomḅọ nwẹnị ọngụrụ nyana kẹ nama ma nẹngị; kụma arịmgba ḅintẹ ḅara kẹ arị fieye nimi-a aị. 20Inimgba gbọrụ anga mie in muarị ye; fọọn ḅio ịn ḅom, ịn pịkị siin anị ḍọkụma-mu ḅa.
21Tụḅọ inetẹ ḅẹẹ ḅẹ mịnẹ tomḅọ fị kụma mḅọ tẹmẹ mẹ iwoarị, tẹ nama fị kụma anịḅẹ tẹmẹ mẹ ideri kiri-ḅio muarị? 22Anieḅụ arị ẹrịm mịnẹ tomḅọ amịna kọrịnama ḅụ tọrụ-ḅẹlẹ mẹ iḅi anị nẹngị ye ofori, kẹ gotẹ ọkọ ḍukoarị ye, aniemẹ mie sime tomḅọ pịrị yee; tụḅọ inetẹ ọ̀ kẹ ḅo tẹ ọ̀ tọrụngbọ kẹ ọ̀ fị sakị ḅụ paka ḅẹ ye ẹrị ḅẹ?
Currently Selected:
Nimi Tolumaḅọ 3: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria