Ịzakaraya 12

Ọnịvị Ijerusarẹmị vee vú ẹtẹ

1Ọsọnị ọ vị ụtụ ọnị Ẹnẹyịmavara tụ́ hi Anisirẹrị nịnị. Ẹnẹyịmavara ana gana eguhi ku ẹbẹẹba, dị ộ mè ẹtẹ, dị ọ sị ụhwẹ ka ọ sị ra kà, 2Ọnị vaa mẹ Ijerusarẹmị anka ako eche avọọ. Ẹkụra ana kara a vee hú dị aa mẹrị wa anka ohweche avọọ. Ịjị ẹnịnị ẹ̀ẹ kara Ijerusarẹmị hi, ẹkụra ana vọ ịnị ẹtẹ Ijuda ẹ yị vaa ha. 3Ama yị ụmẹ ọnọọ o si tù, Ẹnẹyịmavara kà ọnị vaa mẹ Ijerusarẹmị ka ọ rata anka ịrẹta. Ọza ana a sị ọ vị ọnị ọ vaa tọ̀ ụnava. Avaba ẹkụra ene hi ịnị ẹhẹ vaa vabẹ gẹ ịrẹkụ tù ọ. 4Ẹnẹyịmavara kà ịnị ẹkụhị ịhị ọnọọ, ọnị vaa tụ́ umaata ẹnịnị angwahi, dị aza ana tụra wa ee chi uvu, ọ ka ọnị vee sere irehi Ijuda ama dị ọnị gu avaba umaata anẹkụra ana vọ eyi. 5Ịjọnọọ, dị ọdọvịdị Ijuda nịnị aa kà a ịnị ayị ẹnịnị ka Anijerusarẹmị ệ nyị ụkata agụvị ka Ẹnẹyịmavara Ochẹtẹẹngụ ọ vị Ohomorihi ẹnịnị nị. 6Ụmẹ ọnọọ Ẹnẹyịmavara kà ọnị vaa mẹ̀ Ijuda anka ịra ịnị iruku, a vị ịnị aarẹ ọnị akụ anị sị vị. Ẹnịnị vee vu avaba ẹkụra nịnị ana kara wa. Aza ene hi Ijerusarẹmị vaa ha tụ̀ ịzọọ. 7Ẹnẹyịmavara kà a ọnị ụvọta vaa vịdị dọ aza ana ra Ijuda ha da, agụvị dị ọ sị ụbanyị yị ovwoovu Idevidi, dị asị aza ene hi Ijerusarẹmị huna Ijuda. 8Ịnẹ ẹkụhị ọnọọ Ẹnẹyịmavara vaa vị ogonto kú aza ana ra Ijerusarẹmị agụvị ọkụmị ene hi akakana ẹnịnị ẹ ya anka Idevidi, dị ovwoovu Idevidi ẹ ya anka Ohomorihi, anka anggẹẹrị Ẹnẹyịmavara ana aa na ọvịdị ẹnịnị. 9Ịhị ọnọọ ọnị vaa wụ̀ avaba anẹkụra ana va eyi ịraazị ka Ijerusarẹmị. 10#Ịjọ 19.37; Ẹtẹ 1.7#Imt 24.20; Ẹtẹ 1.7Ẹnẹyịmavara kà a, ọnị vaa mẹ ka ezi Idevidi ẹnịrị aza ana ra Ijerusarẹmị ẹẹ vayị ọza, dị ẹẹ mẹ̀ aduwa. Ẹnịnị vee re ọza ẹnẹ ẹ sị ụ̀hwọ̀ wụ̀, dị ẹ yaa zị ẹngụ yọ anka aza anaa zị ẹngụ yị ozi ene su avọọ. Ẹ vaa nyayịnẹ zị ẹngụ anka ozi ịpaapa ọza ô rere su avọọ nị. 11Ịnị ụmẹ ọnọọ ọyị zị ẹngụ ịnị Ijerusarẹmị vaa banyị huu ọyị zị ẹngụ yị Ihadadirimoni Imegido. 12Avaba aha aza vaa zị ẹngụ nị. Ịrẹsụ ọzọza ọnịrị ezi ẹnịnị vaa zị ẹngụ: Ịrẹsụ ovwoovu Idevidi ẹnịrị ese ẹnịnị, ịrẹsụ ovwoovu Inatanị ẹnịrị ese ẹnịnị. 13Ịrẹsụ ovwoovu Ireevi ẹnịrị ese ẹnịnị, ịrẹsụ Isimeyi ẹnịrị ese ẹnịnị. 14Avaba ịrẹsụ ana vọ ẹnịrị ese ẹnịnị vị ana rẹ vavọọ zị ẹngụ.

Currently Selected:

Ịzakaraya 12: EBTP

Highlight

Copy

Compare