Ẹtore 8

Ịsa ọhụhịmba ana a sị vá iwe ọnọọ

1Ozi Atẹmẹ ọnọọ ộ hụ̀ ịsa ọhụhịmba ana a sị vá iwe ọnọọ, dị avaba ẹbẹẹba tịtẹ sisisi mẹ ẹhụụ achẹva agogo ọnya avọọ nị. 2Di mi re anggẹẹrị ịhịmba ana jẹẹ ọvịdị Ohomorihi, dị a sị ọpanyị ịhịmba yị wa nị. 3#Emọ 9.1; Kụra 30.1,3Dị anggẹẹrị ọsa ana nyị ẹnya eturare ana a sị igooru mẹ vẹ, dị ọ va jẹ ẹ pe ụta nị. Â sị eturare rụrụ yọ ka ọ̀ và a hura aduwa avaba aza Ohomorihi, dị ọ̀ sị ọọ nọ ị́rẹsụ ụta ana a sị igooru mẹ ana yà ọvịdị aga ohinọyị ọnọọ. 4Dị areyi eturare ana aa rị ịra aanị dà, beri aduwa avaba aza Ohomorihi hụụnị ẹnya eturare ọnị anggẹẹrị ọnọọ sị rị ụvọ nọ ọvịdị Ohomorihi nị. 5#Ire 16.12; Ezk 10.2; Kụra 19.16; Ẹtẹ 11.19; 16.18Dị anggẹẹrị ọnọọ nyị ịra hụụ ịrẹsụ ụta ọnọọ tụ́ ịnị ẹnya eturare ọnọọ ohihi, dị o ne e na ngụ ẹhẹ nị, Dị apaana ihinẹba aa sụ́ wara-wara, dị ịrẹka aa sụ́, dị ịnyanya aa rị vee-vee, dị ẹtẹ ee henyi jigi-jigi nị.

Ọpanyị ịhịmba ana sụ́ ịrẹyị

6Dị anggẹẹrị ịhịmba ẹnẹẹ ana nyị ọpanyị ịhịmba aanị tenyi ẹngụ ka eni è hú ọọ nị. 7#Kụra 9.23-25; Ezk 38.22Anggẹẹrị ịpaapa ô hú ọpanyị anị. Dị ata ihinẹba ọnịrị ịra và hura anya aa zụ̀ụ hi ịnị ẹhẹ nị. Dị achẹta ẹhẹ rị ịra, dị achẹta avaba ọchị rị ịra, dị avaba ohwoohu rẹ rị ịra nị. 8Dị anggẹẹrị ọhụva oni re hú ọpanyị anị nị. Dị a sị ịsa ọnya aanị ana sị mẹẹ anka ataba ọbanyị ana aa rị ịra, di e ne e ngụ ini òkū nị. Dị achẹta oku vara anya tịtẹ nị. 9Dị achẹta avaba ịsa ana ra hi ini òkū sú nị; dị achẹta ẹpa nịnị du va ha nị. 10#Ayị 14.12Dị anggẹẹrị ọhụta oni re hú ọpanyị anị nị. Dị ụzọmị ọbanyị ọnya ana aa za giri-giri anka ịra avọọ jị hụrẹ ẹbẹẹba, di o ne ngụ achẹta irehu nịnị ọnịrị enyi ẹtẹ nịnị nị. 11#Ijer 9.15Ịrẹha ụzọmị ọnọọ ọ rị ẹchịpa nị. Dị achẹta enyi ẹnẹẹ kụkụ aa nyịrẹyị, dị aza ọrụrụ-ọrụrụ ene hú enyi ọnọọ sú, agụvị ka aa nyịrẹyị nị. 12#Ayị 13.10; Ezk 32.7; Ijow 2.10,31; 3.15Dị anggẹẹrị ọhụna oni re hú ọpanyị anị nị, dị a sị ịsa nya achẹta ọyị ọnịrị achẹta ụhwẹ ne beri achẹta ụzọmị nịnị, dị achẹta ẹtohweyi ẹnịnị sị hozi nị. Achẹta ụmẹ ọọdụ ọnịrị achẹta ịrahụ ẹnị ẹ yị rẹ kụkụ nyị ẹtohweyi. 13Dị mị kana eyi, dị mị wụ́, ọ́kasịmẹ ọnya mee hira ẹbẹẹba, di ee nowu ka: aza ana ra ịnị ẹhẹ ẹ sị da. Ẹ sị da. Ẹ sị da, ịjị ọpanyị anggẹẹrị ẹẹta ana vọ ẹ̀ẹ sụ́ ịrẹyị!

Currently Selected:

Ẹtore 8: EBTP

Highlight

Copy

Compare