Ẹtore 18
18
Ọyịhyẹdụ Ịbabịrọnị
1Ịrẹma ẹnẹẹ, di mi re re anggẹẹrị ọsa ana hụrẹ ẹbẹẹba ee chii vẹ nị. Ộ nyị ụkata ẹtẹẹtẹrẹ, di igirima anị sị ẹhẹ hweyi nị. 2#Ayị 21.9; Ijer 51.8; Ẹtẹ 14.8; Ayị 13.21; Ijer 50.39Dị ụkata-ụkata nowu tụ́ ẹba ka: Ịbabịrọnị ọ sị hyẹdụ. Echu ọnịrị ụhwẹ echu irenyi-irenyi e kuku hi ịnị anị nị. Inomi edivi irenyi-irenyi kẹnẹ e kuku hi ịzọọ nị. 3#Ayị 23.17; Ijer 51.7Ọ raà mẹ ka avaba anẹkụra ẹ dọ ọda ebira ịdọtị ọnị ọọ̄ mẹ̀. Ohinọyị anẹhẹ nịnị e reè pe e sẹ̀ ịrẹka. Agụvị ka ụbanyị anị ẹ mā hụ ọọ, ọ raà mẹ ka osohu anẹhẹ nịnị ẹ̀ vara ọnyẹkẹhị.
4 #
Ayị 48.20; Ijer 50.8; 51.6,45 Dị mị rẹ wụ́ ọngwẹ ọsa hụrẹ ẹbẹẹba, dị ọ ka:
Ẹwụ nịnị aza anị, jịnẹ tụ́ ẹhẹ hụrị Ịbabịrọnị nịnị!
Asị ụ nyị ụvọ tụ́ ịnị ebira odivi ẹnịnị!
Agụvị asị ẹwụrị wa na rị ụya ọnyọọnya nịnị.
5 #
Oyn 18.20,21; Ijer 51.9 Ebira odivi ẹnịnị ệ hyakụ va kụ́ ngụ ẹbẹẹba.
Ohomorihi ê hí ayị ịsa edivi ẹnẹ ẹ mẹ.
6 #
Ahẹ 137.8; Ijer 50.29 Ọ kà, À mẹ Ịbabịrọnị anka ọ́nị mẹ̀ rẹ mẹ aza gẹdẹ-gẹdẹ;
è sí ọ ụta ịsị ọ mẹ tụra-tụra.
Ako ọnị ọ sị ká ẹchịpa anịị wụ nịnị,
à vavọọ sị ká ẹchịpaa yọ oze ẹẹva.
7 #
Ayị 47.7-9
Vị́ ọ vịdịị wo ka â nyị ịsị ọnị vị nị, dị aa rị ẹhẹ o mè ze eyi nị,
agụvị avọọ, sị́ ụya rị ọọ ẹtẹẹtẹrẹ nịnị
Vị́ ọọ̄ kà a yị ẹngụ anị
ka ohinọyị anẹẹ ọnị vị nị.
Ọnị ọ yị vị osoku,
ọnị ọ yị rẹ vaa rị ụya vụrụ-vụrụ.
8Agụvị avọọ, avaba ụyọrị anị vị ene vee tù ọ ẹkụhị ọnya:
ụkụ vaa za a, dị ọ và ẹngụ hi, dị ụngwẹ kụ̀ ọ ẹtẹẹtẹrẹ.
A vaa rị ọ ịra
agụvị ka Ohomorihi Ananyị yị ana aa mẹ̀ ọkarẹyị anị, ộ nyị ụkata.
9 #
Ezk 26.16,17 Ohinọyị anẹhẹ nịnị ene pe e sẹ̀ ịrẹka, di e re dudu aa rị ẹhẹ, vị aa jị òrèrè anị, di eyee nowu agụvị anị, Ịjị èe re areyi anị màa dà, ọ màa rị ịra. 10Ẹnịnị vaa jẹẹ ẹnẹẹnẹ, agụvị ka angwa ụya ana aa rị ọ ee hi wa. Dị ẹ ka: Kwaa-kwaa! Ho! Ịbabịrọnị ẹkụra ọbanyị ana maanị nyị ụkataa? Ịnị ụmẹ chee kẹnẹ ọ́karẹyị awụ tù aanị nịị? 11#Ezk 27.31,36Dị osohu anẹhẹ nịnị ẹnị raa jị òrèrè anị, dị ẹ kụ́ ẹngụ và hí, agụvị ka ẹ yị nyị ọza ana kụkụ aa hị́ ịsa ẹnịnị, 12#Ezk 27.12,13,22ẹhụụ: igooru, ọmọ, ịrẹta ozoza, uweyi; ịta ọvụ ozoza, ịta ovivi irenyi-renyi, ịta isiriki; avaba ọchị ozoza ọnịrị avaba ẹnya ana a sị ịkẹ mẹ, àa vị ọchị ana katarihi, beri enyusẹ irenyi-irenyi ọnịrị ịrẹta ozoza; 13eturare ozoza irenyi-irenyi ọnịrị eturare ozoza ana aā rị ịra; eche ọnịrị angwẹ ne beri angwẹ ne beri apaapa ana a kwọ̀ nẹrẹ-nẹrẹ beri akụ; uye nịnị ọnịrị atẹmẹ beri umaata ne beri ịkẹkẹ ọnịrị aza bẹẹ. Aza ẹ yị kụkụ hị́ avaba ịsa ẹnẹnị. 14Ọ kà, Avaba ịsa ọyịza ana aa tụra a eyi ẹ sị kụ̀rà kanaa yọ, avaba ịsọyịrị chomi-chomi ọnịrị ụbanyị anị ẹ sị jị ọ ụvọ, e me vene re wa. 15#Ezk 27.31,36Aza ana aa sẹ ohu ịsa ẹnẹẹ dị ẹ sị vara ọnyẹkẹhị, vaa jẹẹ ẹnẹẹnẹ, agụvị ka angwa ụyọrị ana aa rị ọ ee hí wa. Dị ẹyaa jị òrèrè anị, dị eyee nowu. 16Dị ẹ ka: Kwaa-kwaa! Ho! Ẹkụra ọbanyị ọnọọ ana hara ịta ọvụ ozoza ọnịrị ovivi irenyi-irenyi ene zoza hi ẹngụ, dị ọ rẹ hara igooru ọnịrị ọmọ beri uweyi hi ẹngụ. 17#Ayị 23.14; Ezk 27.26-30Ịnị ụmẹ chee kẹnẹ avaba ụbanyị ọrọgọdọ ọnọnị maanị ta nịị? Avaba ọga ẹpa beri aza ene hi ịnị ẹpa ẹnịrị aza anaā họ̀ ẹpa ẹnịrị avaba aza ana ahịka oze ini òkū ẹyaa zịị sẹ ohu nị, ệ jẹẹ ẹnẹẹnẹ. 18#Ezk 27.32E mè re, areyi anị màa dà, ọ màa rị ịra, dị ẹ ka: Ẹ yị nyị ẹkụra ene tù ẹngụ ẹkụra ọbanyị ọnọnị. 19#Ezk 27.30-34Dị ẹ ká ezi và hi ịrẹsụ, di eyee nowu, dị ẹyaa jị òrèrè dị ẹ ka: Kwaa-kwaa! Ho! Ẹkụra ọbanyị ọnọọ ana mẹ ka avaba aza ana nyị ẹpa tụ́ ini òkū ẹ̀ nyị ẹkẹhị agụvị ụbanyị anị, ịnị ụmẹ chẹẹ kẹnẹ ọ maanị vara osusu aanị nịị? 20#Ọda 32.43; Ijer 51.48Ẹwụ nịnị ene hi ẹbẹẹba ọ̀ọ jẹ! Ẹwụ nịnị aza Ohomorihi ọnịrị ezirẹma Ijeesu beri ọnịsẹ nịnị ọ̀ọ jẹ agụvị Ịbabịrọnị, agụvị ka Ohomorihi o reè sị ọ atọ wụ nịnị! 21#Ijer 51.63,64; Ezk 26.21Dị anggẹẹrị ọnya aanị ana nyị ụkata sị ịrẹta ọnya anka ịrẹtọkwayị ọbanyị avọọ, dị o ne e ngụ oku, dị ọ ka: Aanị a mẹ̀ vaa sị ụkata-ụkataa ne Ịbabịrọnị ẹkụra ana maanị banyịị nya ẹtẹ nị. Dị ọza e me vene kuku re e nị. 22#Ezk 26.13; Ayị 24.8#Ijer 7.34; 25.10Ọngwẹ ọnọọ ka: Ọza ọ mā vana wụ́ aza ene ee hú igita ọnịrị aza ene ee hú ịsa beri aza ene ee hú uhwere ọnịrị ọpanyị ịnịnẹ anị. Ọza e mē vene re ọnụkọrọ ụvọ ịnịnẹ anị paa. Ọza ọ mā rẹ vana wụ́ ka ịrẹtọkwayị aa sụ́ ịrẹyị ịnịnẹ anị pooro. 23Ọza e mē vene re ẹtohweyi ozotupa ịnịnẹ anị paa; ọza ọ mā rẹ vana wụ́ ka ọnọrụ aa nyị ọnẹẹ ịnịnẹ anị paa. Ọ kà osohu Anibabironi nịnị ẹ vịdị vị azẹbanyị ẹhẹ nị. Ịbabịrọnị ọ raà sị ẹbẹ anị vene avaba anẹhẹ. 24#Ijer 51.49Anya ọnịsẹ nịnị ọnịrị anya aza Ohomorihi ana a wụ beri anya avaba aza ana a wụ ịnị ẹhẹ, yà ịrẹsụ Ịbabịrọnị.
Ebira First Bible © Bible Society of Nigeria, 2014.