Ẹtore 16

Ụyọrị ana hụụnị ịchacha ịhịmba ẹnẹẹ vẹ

1Mâ wụ́ ọngwẹ ọbanyị ọnya aanị hụụnị irehi Ohomorihi ọnọọ, dị ọ kà a yị anggẹẹrị ịhịmba ẹnẹẹ ka: Ẹ̀ na dị ẹ̀ na và ọyịkụ Ohomorihi ana vị ohihi ịchacha ịhịmba ẹnẹẹ hi ẹhẹ nị. 2#Kụra 9.10Dị anggẹẹrị ịpaapa na, dị ọ na và ene hi ịnị ịchacha anị hi ẹtẹ nị. Dị ịtahụ edivi ẹnyị aanị anaā zị ọza ẹtẹẹtẹrẹ chị hi ịnị ẹngụ aza ana nyị apọtẹrẹwa uye ịnị avị ọnọọ ọnị aza ana hẹkẹ ori anị nị. 3Dị anggẹẹrị ọhụva ọnị rẹ và ene hi ịnị ịchacha anị hi ini òkū nị. Di enyi sị vara anka anya ọza ene sú avọọ nị. Dị avaba ịsa ana nyị ụhwẹ ene hi ini òkū sú va ha nị.

4 # Kụra 7.17-21; Ahẹ 78.44 Anggẹẹrị ọhụta ọnị ọ rẹ và ene hi ịnị ịchacha ene hi ịnị ịchacha anị hi ini okuha ọnịrị avaba enyi ẹtẹ, dị ẹnị rẹ vara anya nị. 5Dị mị wụ́ anggẹẹrị ana sị eyi pe enyi, dị ọ ka: Ẹwụ Ohomorihi ẹnẹ ẹ̀ yị nyị ẹngụ anị, ịzẹyịza ụ sị mẹ̀ ọkarẹyị ẹnẹnị nị. Ẹwa yà ịzọọ booro aanị nị, ẹwa rẹ yà ịzọọ hụrị ụmọrụmọ nị. 6Ệ wụ̀ aza awụ beri ọnịsẹ awụ nịnị, dị e che anya ẹnịnị sẹ́ ẹtẹ nị. Ẹwa rẹ raà sị anya yị wa ka èe hụ́ ọọ. Ịsị ẹ vọrọ tụra wa gẹdẹ-gẹdẹ ọ vị ọnọọ nị. 7Dị mị rẹ wụ́ ọngwẹ ọsa hụụnị ụta ọnọọ vẹ, dị ọ tụ́ ohi ka, “Ohomorihi Ananyị yị Ochẹtẹngụ, ịzẹyịza ụ waa sịị mẹ̀ ọkarẹyị nị, ẹ yị nyị ireche ịnị anị.” 8Dị anggẹẹrị ọhụna và ịsa ene hi ini ịchacha anị hi ịnị ọyị nị. Dị a sị ụkata yị ọyị ka ọ̀ọ rị ọza ẹtẹẹtẹrẹ anka ịra avọọ nị. 9Dị ọyị aa rị aza kẹnẹ nị. Dị aza aa kà ịrẹyị odivii hi Ohomorihi, ana ahịka ọ́ọ nyị ụkata tụ́ ịrẹsụ ụyọrị ẹnẹnị nị. Ẹnịnị eyi ro ịnẹ varẹma, dị ẹ̀ẹ ga Ohomorihi. 10#Kụra 10.21Dị anggẹẹrị ọhụhị và ene hi ịnị ịchacha anị hi ịnị aga uye ịnị avị ọnọọ nị. Dị ịzị ọ yà aa mẹ ịjọva kụkụ vị ịrahụ-ịrahụ nị. Dị ẹyaa dà ịrarẹ ẹnịnị rị, ịsa màa zị wa nị. 11Dị ẹyaa kà ịrẹyị odivii hi Ohomorihi ẹbẹẹba agụvị ịsa ana aa zị wa ọnịrị ịtahụ ẹnịnị nị. Ama ẹnịnị eyi ro ịnẹ varẹma hụụnị ịsa ẹnẹ ẹyaa mẹ. 12#Ayị 11.15Dị anggẹẹrị ọhụhịnọnyị ọnị rẹ và ene hi ịnị ịchacha hi ini okuha Iyuhureti ana banyị nị. Dị enyi anị wụ, ka oze ò tenyi tịtẹ yị ohinọyị nịnị ana yà eyi ọnị ọyịị̄ zịị hụrẹẹ vẹ nị. 13Di mi re ụhwẹ echu ẹẹta anka uruvu avọọ ka ẹ́ẹ jịnẹ hụụnị irenu uye odivi ọnọọ ọnịrị ini irenu uye ịnị avị ọnọọ beri irenu ọnịsẹ ireche ọnọọ vẹ nị. 14Ẹnị ẹ vị ụhwẹ echu ana aa mẹ̀ ụkọrọ ohyozirenu nị. Dị ụhwẹ echu ẹẹta ẹnẹẹ nọ ịda avaba ohinọyị anẹhẹ nịnị nị. Di eyee sì ka ẹnị ẹ̀ kụ́ wa gụ tịtẹ zí ịrẹkụ ana aa vẹ ịnị ẹkụhị ọbanyị Ohomorihi Ochẹtẹngụ nị.

15 # Imt 24.43,44; Irk 12.39,40; Ẹtẹ 3.3 “Re! Mị vanaa vẹ anka oyi avọọ nị. Ọza eme èee zí di o tenyi ịta anị tịtẹ ka asị ọnị na yà ịnị ahwaahụ dị ụhị ọ̀ vaa nyị ọọ nị, vaa daa jẹ.” 16#2 Ohi 23.29; Iza 12.11Dị ụhwẹ echu ẹnẹẹ kụ́ ohinọyị ẹnẹẹ gụ tụ́ aha ọnya aanị ana aā hị́ Amagẹdọnị ịnị ẹkụra Anihiburu nịnị nị. 17Dị anggẹẹrị ọhụhịmba và ene hi ịnị ịchacha anị hi ịnị ahị nị. Dị ọngwẹ ọbanyị ọnya aanị hụụnị aga ohinọyị ọnọọ ini irehi Ohomorihi ẹbẹẹba vẹ, dị ọ ka, “Ịrẹyị o si tù!” 18#Ẹtẹ 8.5; 11.13,19Dị ịsa aa sụ́ ịrẹyị, dị apaana ihinẹba aa há dị ịnyanya aa rị vee-vee nị. Dị ẹtẹ henyi jigi-jigi nị. Ẹtẹ ọọ̀ yị vavọọ henyi da, aza mẹ̀ hụrẹ vẹ ẹhẹ. Vị ẹtẹ ọnọọ nyayịnẹ henyi ẹtẹẹtẹrẹ nị. 19#Ayị 51.17Dị ẹkụra ọbanyị ọnọọ che hi oze ẹẹta nị. Dị ẹkụra avaba ẹhẹ hyẹdụ va hi ẹtẹ nị. Ohomorihi ọ́ọ tamayị ẹkụra ọbanyị Ịbabịrọnị ọnọọ, dị ọ ká ọyịkụ ọbanyị anị tụ́ ini ako yọ ka ò hú ọọ nị. 20#Ẹtẹ 6.14Avaba ẹtẹ ene enyi kara e si zwe, ataba nịnị e kú vú. 21#Kụra 9.23; Ẹtẹ 11.19Dị ata ihinẹba ẹbanyị-ẹbanyị aa sụ̀ụ hụrẹ ẹbẹẹba vaa nya aza nị. Ata ẹnẹẹ, ọnya-ọnya ọ́ọ rata anka anọ ampo ẹẹva. Dị aza aa kà ịrẹyị odivii hi Ohomorihi agụvị ụyọrị ana ata ẹnẹẹ aa sịị rị wa nị. Ụyọrị ọnọọ ọ́ọ banyị ẹnẹmẹhị.

Currently Selected:

Ẹtore 16: EBTP

Highlight

Copy

Compare