Ẹtore 10

Anggẹẹrị ọnya ộ sị iwe oweyi ọnya vẹ

1Me re re anggẹẹrị ọbanyị ọsa ene ee chii hụrẹ ẹbẹẹba vẹ. Eguhi o si kú ẹngụ, dị ọgaazị jị karaa ịrẹsụ nị. Eyirẹsụ anị vị ana a sị mẹẹ anka ọyị avọọ, dị ahụ anị yà anka ịra nị. 2Ộ nyị iwe oweyi ọnya aanị rị ụvọ ọnị ọ hụ̀ tịtẹ. Ộ sị ahị ụvọrị tụ́ ini òkū, dị ọ sị ahụ ụvọha anị tụ́ ini eteesu nị. 3Di o nowu zẹtẹ anka idu òo rere ee nowu avọọ nị. Ịjị o si owu na, dị apaana ihinẹba sụ́ ịrẹyị ụpẹ ịhịmba tụ́ ọọ ohi nị. 4Ịjị apaana ihinẹba vavọọ sụ́ ịrẹyị ụpẹ ịhịmba, dị mị ka maa chẹrẹ ịsị ọ kà nị. Dị mị wụ́ ọngwẹ ọnya hụrẹ ẹbẹẹba vẹ, dị ọ ka: Asị mị chẹrẹ ịsị ọnị apaana ihinẹba ọnọọ kà ụpẹ ịhịmba avọọ, ama ma sị ọ tẹ nị. 5#Kụra 20.11; Ọda 32.40; Ịda 12.7; Emọ 3.7Dị anggẹẹrị oni mi re ana jẹẹ ini òkū ọnịrị eteesu aanị, tana ụvọ nọ ẹbẹẹba nị. 6Ộ sị Ohomorihi ana yára pooro zịna-zịna, ana mẹ ẹbẹẹba ọnịrị avaba ịsị e hi ịnị anị, dị ọ rẹ mẹ ẹhẹ ọnịrị avaba ịsị e hi ịnị anị, dị ọ rẹ mẹ oku ọnịrị avaba ịsị e hi ịnị anị hị́ eku ka ọza ọ yị kụkụ vaa za a kù nị. 7Ọ kà anggẹẹrị ọhụhịmba ọ̀ọ sị ọpanyị anị hú, Ohomorihi vaa mẹ̀ ịsa ana nyịnẹ ọnị ọ vịdị mẹ eto anị tịtẹ, anka ọ mẹ̀ vịdị kà a zụ ọnịsẹ nịnị ana vị ezi ahụ anị. 8#Ezk 2.8—3.3Dị mị rẹ wụ ọngwẹ ana vịdị kà ịrẹyịị mị hụrẹ ẹbẹẹba vẹ, dị ọ rẹ ka: Ma na sị iwe oweyi ana a hụ̀ tịtẹ, ana yà ịnị ụvọ anggẹẹrị ana jẹẹ ini òkū ọnịrị eteesu nị. 9Dị mị nọ ịdị anggẹẹrị ọnọọ, dị mị ka ọ̀ sị iwe oweyi ọnọọ mị nị. Dị ọ ma sị ọọ dị ma rị ọọ nị. Ọ kà ọ vaa mẹ ka ịnị amị ọ̀ nyịrẹyị ama o vee hine ini irenu amị anka ẹhụ avọọ. 10Dị mị sị iwe oweyi ọnọọ hụụnị ụvọ anggẹẹrị ọnọọ, dị mị rị ọọ nị. Ô hine anka ẹhụ avọọ ini irenu amị. Ama m mẹ̀ yị mụnẹ ẹ kẹnẹ, dị ọ kụkụ aa nyịrẹyị ịnị ịnẹ amị nị. 11Dị ọ ka, â nyị ka ma rẹẹ kà ịsẹẹ yị aza ọrụrụ-ọrụrụ ọnịrị anẹkụra ọrụrụ-ọrụrụ ana aa kà ẹkụra irenyi-irenyi, beri ohinọyị nịnị nị.

Currently Selected:

Ẹtore 10: EBTP

Highlight

Copy

Compare