Ahẹ Ụgama 9
9
Ahẹ ana a jị gono Ohomorihi ka ộ nyị ịzẹyịza
(Ahẹ Idevidi ana yà ịnị ụvọ ọga ọjahẹ)
1Ẹnẹyịmavara, avaba ayị amị m maa sịị kụ́ wụ avọ nị;
mi vaa kà zụ̀ aza avaba ụkọrọ ẹbanyị-ẹbanyị ọnị ụ mẹ.
2Ẹwụ Ohomorihi Ochẹtẹẹngụ, mi vaa jẹ ịrajẹ agụvị awụ.
Dị maa jị ahẹ gono wu.
3Ọnịvị amị mè re wu e si zwe varẹma.
E mèe zwe, dị ẹ yaa hyẹdụ di e yee sú nị.
4Ịzẹyịza ụ waa sịị mẹ̀ ọkarẹyị nị;
wa mā mẹ eyi ịdị
wa raà kà a ka mẹ yị rị ịvị.
5Wa raà jị ịvị yị anẹkụra ẹnẹ ẹ̀ yị yẹ Ohomorihi.
Dị ụ za aza edivi dị ụ wụ̀ wa va ha nị.
Wâ mẹ ka asị a kụkụ wụ́ ịrẹha ẹnịnị pooro zịna-zịna.
6Ọnịvị ayị ẹ si vú ẹtẹ pooro paa ịnị ẹhẹ.
Wa sị ẹkụra ẹnịnị jị eburu.
Ayị ẹnịnị ô hi saka-saka.
7Ama Ẹnẹyịmavara ọnị vị Ohinọyị pooro zịna-zịna nị.
O reè tenyi ịzị ọ vaa yà dị ọ̀ọ mẹ̀ ọkarẹyị.
8Ịzẹyịza ọ vaa sị mẹ̀ ọkarẹyị anẹhẹ nị.
Ịzẹyịza ọ rẹ vaa sị mẹ ịjọvaa tụra wa nị.
9Àa mẹ ehunaa yị ọza, di o zwe na vaka Ẹnẹyịmavara nị,
ẹ yị nyị ịsị ẹ kụkụ zụ kanyị ọza ọnọọ.
Ịrẹyị òo tù ọza di o zwe nọ ịda Ẹnẹyịmavara nị
nyị ịsị ẹ kụkụ zụ na kanyị ọza ọnọọ vụrụ-vụrụ.
10Ẹnẹyịmavara, aza ana yẹ wụ vị ana vaa sị ayịị tụra wụ.
 yị nyị ọza ana vẹ ịda awụ da, ọnị ụ dụ varẹma.
11Waā jị ahẹ gono Ẹnẹyịmavara nịnị.
Ọnị ọ vị ohinọyị tụ́ nị.
Waā kà a yị avaba aza nịnị ịsa ọnị ọ mẹ.
12Ọza ọ̀ọ wụ̀ ọza, Ohomorihi ọọ̄ họ̀ ọ oponu nị.
Ayị o mē hí ọ
Àaa chamayịị yị ọza dị ọza ọnọọ nowu na za Ohomorihi nị.
Ohomorihi vị ana aa ba ọza ọnọọ owu.
13Ẹnẹyịmavara, wéē re ọnịvị amị màa sị ụyaa rị mị!
Navọ wa vayị amị asị ụ zẹẹ ka me sú!
14Wẹ̀ yị zẹẹ ka me sú, mị va zụụ jẹẹ Ịzayọnị ịnị akakana aza awụ
dị maa gā wụ
Dị mị ya ịzọọ dị maa jẹ agụvị ka wa raà dọ mị tụ́.
15Aza ẹnẹ ẹ̀ yị yẹ wụ mẹ̀ na hụ ụvị ọza chị ụsị
dị ahịka ẹnị ẹ rẹ horo ngụ ọ nị.
Ịrẹpa ẹnị ẹ̀ và zi ọza gẹdẹ-gẹdẹ ọ rẹ vara eyi za wa ahụ nị.
16Aza ệ yẹ ka Ẹnẹyịmavara vị ana aā mẹ ịzẹyịza.
Ịsa ana aza edivi aa sị ụvọ ẹnịnị mẹ ọ rẹ vara eyi za wa nị.
17Avaba aza edivi ene hi ayị Ohomorihi vi ene vee súu vaa ha.
18Ama Ohomorihi o yi vee hí ayị oniruwa
ẹnịnị mẹ̀ sị ayị tụra Ohomorihi
ẹ yẹ ka ẹẹnịnị ọ yị vaa vị osusu.
19Ẹnẹyịmavara navọ wa kwẹẹtẹ!
Asị ụ zẹẹ ka aza ẹ̀ kà a ka ẹnị e huna wụ nị.
Kụ́ aza ẹnẹ ẹ̀ yị yẹ wụ vẹ ịda awụ
dị wa mẹ̀ ọkarẹyị yị wa.
20Ẹnẹyịmavara, navọ we chire wa angwa
dị ẹ̀ yẹ ka aza rị ẹyị ịrẹsụ kẹnẹ ẹnị vị nị.
Currently Selected:
Ahẹ Ụgama 9: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
