Ahẹ Ụgama 74
74
 dá ịpẹ ka Ohomorihi ọ̀ dọ ẹkụra tụ́
(Ahẹ ana Asahwi sịị sị ịsaa zụ̀ aza)
1Te, Ohomorihi, we kuku reè hi ayị saka-saka?
Ewee sere yi anka aza ana sị eyi pe atẹmẹ mèe sere atẹmẹ anị avọọ nị.
Si ọ vavẹ dị ụ maanị nyayịnẹ aa kụ́ ayịị hị́ yị?
2Tamayị ka ka ẹya vị aza awụ ọnị ụ nyị hụrẹ ụ mẹ ịyẹẹyẹ vẹ nị.
Ẹyị ọnọnị ụ tụ̀ hụrẹ udi ọrịhị dị ụ sị yị mẹ aza awụ nị.
Navọ wa tamayị ataba ịzị ụ vịdị ra da.
3Ọnịvị ayị e reè du avaba irehi awụ ha saka-saka.
Maanị yị jị ahụ ngụ ịzọọ kẹnẹ di we re e.
4Ịzị ẹyịrị ẹwụ vịdịị gẹ avọọ, ọnịvị awụ kuku hi ịzọọ,
e yee nowu ẹ màa jẹ, di e hi uyi ẹnịnị jẹẹ ịzọọ ka ẹnị ẹ kụkụ nyị nị.
5Ẹ yaa mẹ anka ọza ana sị ịraga rị ụvọ na ngụ ini iriku, dị aa ma ọchịị ha avọọ.
6Ệ za avaba ịsị a sị ọchị mẹ tụ́ ịnị irehi Ohomorihi, dị ẹ sị ịraga ọnịrị ụhwọ du wa va ha nị.
7Ohomorihi irehi awụ vị ẹnị ẹ za dị ẹ rị ọ ịra saka-saka.
Ịzị a yàa hẹkẹ wụ vị ene du ẹngụ.
8Ẹ sị ọ kà tụ́ ịnị ayị ẹnịnị ka vị ẹnị vaa wụ̀ yịị vaa ha nị.
Avaba ịzị a yà aa hẹkẹ Ohomorihi ịnị ẹtẹ ayị vị ẹnị ẹ vị ịra bemi-bemi.
9Yẹ yị kuku re apọtẹrẹwa ọnyọọnyị,
yẹ yị rẹ kụkụ nyị ọnịsẹ ikonya, ana vọ,
nyị ọza ana yẹ ịzị ị maanị vee re nee tù.
10Ohomorihi, aanị ka aanị ọnịvị awụ mẹ̀ vaa sị wụụ mẹ enyinyi pooro nị?
Aanị ọnịrẹyị awụ mẹ̀ vaa kịị ká wụ isiya pooro nịị?
11Sị ẹ vẹ dị wẹ̀ yị kụrụ ụvọ?
Navọ wa tana ụvọ za aza ẹnịnị, dị wa wụ̀ wa va ha.
12Ohomorihi ẹwa vị ohinọyị ayị hụrẹ ụmọrụmọ nị,
wa raà dọ yị há éyi anẹhẹ.
13 #
Kụra 14.21
Ẹwa sị ụkata awụ mẹ ka enyi ò che ẹẹva nị,
dị ụ za uye odivi ọbanyị ana aā hi Ireviyatani ana yà ịnị oku dị wụ chaka a ịrẹsụ nị.
14 #
Ijov 41.1; Ahẹ 104.26; Ayị 27.1 Ịjị ụ sị ọ chaka ịrẹsụ, dị ụ sị oku anị yị uye ana vọ ene hi ịnị ụnọmị ka ẹ̀ẹ rị ọ nị.
15Ẹwa mẹ ka okuha ọnịrị orosi nịnị ee sì nị
Dị ụ rẹ mẹ kà enyi eneē vidii sì pooro, ọ̀ wụ nị.
16Ẹwa rẹ nyị ọọdụ ọnịrị ịrahụ nị.
Ẹwa mẹ ọyị ọnịrị ụhwẹ hị́ ịzị ẹ yà nị.
17Ẹwa kà a ka ẹhụ ịzị ẹhẹ ee tù yị nị,
dị ụ mẹ ọhahị ọnịrị ịrẹsụ nị.
18Ẹnẹyịmavara, tamayị ẹhụ isiya ọnị ọnịvị awụ mẹ wụ, dị ọnụra nịnị na sị eyii wụ wụ.
19Wâ yẹ ka ẹ yị nyị ịsị aza awụ zụ mẹ, agụvị avọọ asị ụ navọ wa chire ọnịvị ụvọ.
Ọnịvị ẹnịnị vị ana sị mẹẹ anka uye odivi avọọ.
20Ohomorihi, navọ wa tamayị ịrayị ọnị ụ kà tịtẹ yị,
wéē re ka aza ana aa mẹ̀ ebira odivi ịnị ẹtẹ ọnọnị vi ene hi avaba aha.
21Aza hị́ ịzọọ ana aza aa mẹ ehunaa yị,
navọ asị ụ navọ ka ụhị ọ̀ nyị aza ẹnẹẹ.
Navọ oniruwa nịnị ana a maanị aa mẹ ẹchakaa yị ẹ va zụụ kụ́ wụ avọ.
Navọ oniruwa nịnị ana a maanị aa mẹ ẹchakaa yị ẹ va zụụ kụ́ wụ avọ.
22Ohomorihi, tamayị ka aza edivi vi ene ee nyị wu unyi eyinị-eyinị.
Navọ wa kwẹẹtẹ dị wa ba yi owu.
23Asị u hi ayị ka ọnịvị awụ vị ana aa kụ́ ayị, di e yee nowu.
Mi ka ẹnịnị vi ene ee nowu pooro kẹnẹ.
Currently Selected:
Ahẹ Ụgama 74: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
