Ahẹ Ụgama 68
68
Ahẹ ana jị gono Ohomorihi ọ mẹ̀ dọ aza anị tụ́
(Ahẹ Idevidi ana yà ịnị ụvọ ọjahẹ).
1Ohomorihi ọ̀ navọ ọ̀ kwẹẹtẹ dị ọ̀ gara ọnịvị anị hi.
Ọ máá navọ ahịka vị ọnịvị anị vee zwe ini eyi amị nị.
2Ahị mẹ̀ẹ kụ́ areyi avọọ, avọọ ụ mẹ̀ vaa kụ́ ọnịvị awụ kwooze nị.
Ụsụ ọ̀ọ gụrị ịra vị ọọ̄ nā nị,
avọọ ọnịvị Ohomorihi mè vee du ha pẹrẹ-pẹrẹ nị.
3Ama aza ana aa mẹ̀ ebira ana vọrọ vị ana vaa jẹ,
dị ịnẹ ẹnịnị ee hine ini eyi Ohomorihi
Mị ka ẹnịnị vị ana vaa jẹ, dị ịnẹ ẹnịnị ee hine.
4Waā jị ahẹ kụ́ Ohomorihi avọ nịnị.
Waā sị ụbanyịị yọ nịnị, dị wa jẹ ịrajẹ ịda anị nịnị
Ọnị ọ vị Ẹnẹyịmavara anaā tụra eguhii zị nị.
5Ohomorihi ọ vị ada aza ẹnẹ ẹ̀ yị nyị ada nị,
ọnị ọ rẹ ẹ̀ yị mā zẹẹ ka à chamayị yị ozi oku nịnị nị.
Ọnị ọ vị Ohomorihi ana ra ini irehi anị ẹbẹẹba nị.
6Ohomorihi ọọ̄ sị ọnị ịrịnya dị ọ mẹ ka ọ̀ nyị aza nị
Ọ́ rẹ kụ́ aza ana a za hi ịnị ẹngwa
dị ọ kụ́ wa jịnẹ ka ẹ̀ẹ zị hwana-hwana, dị ẹ̀ẹ jẹ ịrajẹ nị.
Ama aza ana kwẹẹtẹ tù Ohomorihi vị ọnị kú ne hi ịnị ẹtẹ ụngwẹ.
7-8 #
Kụra 19.18
Ohomorihi, ụ mẹ̀ kụ́ aza tụra ẹngụ, dị ụ zi oze ịnị ụnọmị na para hu, ẹtẹ vi ene Zizi.
Dị ataba Ịsịnayị ee henyi, dị orihi aa zụ̀. Mị ka orihi aa zụ̀ agụvị ka Ohomorihi Anisirẹrị aa vẹ.
9Ohomorihi, wâ mẹ ka orihi ọ̀ zụ̀ hi ịnị ẹtẹ awụ ẹtẹẹtẹrẹ.
Ẹtẹ awụ ene vịdị si bo, ọ rẹ varẹma vẹ eehi.
10Aza awụ ẹ na ra hi ịnị ẹtẹ ọnọọ, dị waa mẹ ka onosiye ẹẹ nyịị rị ụvọ nị,
agụvị ka vị ụụ̄ mẹ ẹyịza nị.
11Ananyị yị ọ sị ịrẹyị kà, di Ohomorihi anyẹnẹẹ kụkụ aa kà ana nị
12Ohinọyị ọnịrị isoja nịnị ệ va tụ́ echi, e yee zwe,
dị anyẹnẹẹ ene hi udi kụ́ ogu isoja ẹnẹẹ dị ẹ yaa gà a nị.
13Di e hi ẹtẹ pè atẹmẹ ẹnịnị ẹngwọọrọ-ẹngwọọrọ nị.
Ệ hara igooru ozoza-ozoza rụrụ ẹnẹmẹhị anka asịsẹ mè kú avaka arivadi avọọ.
14Ịjị Ohomorihi Ochẹtẹẹngụ za ohinọyị ẹnẹẹ dị ọ gara wa ha
vị ọ sị mẹẹ ata ihinẹba ene ee zina hụrẹ ataba Ịzarịmọnị avọọ nị.
15Ataba Ịbasanị ộ dẹngụ ẹtẹẹtẹrẹ,
mị ka vị ọ maanị jẹẹ gwaa-gwaa nị.
16Ẹwụ ataba ana maanị nẹba, sị ẹ vẹ dị ụ maanị aa kụ̀ ụhị
agụvị ataba ọsa ọnị Ohomorihi sị nyị ka ịzọọ ọnị aa ra pooro nị?
Ẹnẹyịmavara ọ sị ịzọọ nyị, ịzọọ ọ vaa ra pooro zịna-zịna nị.
17Ananyị yị ọ raà hụrẹ Ịsịnayị vẹ va ngụ ini eehi anị. Ộ nyị ịkẹkẹ ịrẹkụ oni umaataā tura.
Ệ rụrụ ẹnẹmẹhị, ọza ọ yị zụ za wa ịrịka.
18 #
Ẹhw 4.8
Ộ hịrẹ nọ ẹbẹẹba dị ọ kú aza ọnị ọ za éyi ịrẹkụ aa na nị.
Ộ dọ ịsa ẹtẹ hụụnị ụvọ aza
Aza ana hyakụ kwẹẹtẹ tù ọ vị ọnị za agụvị dị ọ̀ ra ịzọọ. Dị ẹkụkụ aa tụ́ ịsa ẹtẹẹ yọ nị.
19Yâ kụ́ Ananyị yị avọ, ọnị ọ vị Ohomorihi anaā dọ yị há nị.
Eyinị-eyinị aa sịị gụ yị ụvọ nị.
20Ohomorihi ayị vị Ẹnẹyịmavara, Ananyị yị ọ ka asị i sú nị.
21Ohomorihii vị ana vaa chaka ọnịvị anị ịrẹsụ,
mị ka ọ vaa chaka ịrẹsụ aza ẹnẹẹ ana kà ẹnị ẹ mā hụụnị ebira odivi.
22Ananyị yị ka ọnị vaa kụ́ ọnịvị ẹnẹẹ hụrẹ Ịbasanị vẹ,
ọ ka ịzị ẹ̀ẹ ngụ ụsị na tẹ̀ tụ́ ọnị aa kụ́ wa vẹ.
23Ọ kà ọnị ọ̀ọ raà kụ́ wa vẹ,
dị ẹwụ nịnị Anisirẹrị jị wa hi ẹtẹ dị waa kụ́ ahụụ hi ọ naa parahu,
di irezi awụ nịnị ẹnị rị oku ẹnịnị.
24Ohomorihi, aza ê re ụ mẹ wara aza tụra ẹngụ aa vẹ.
Ohomorihi amị, ana vị Ohinọyị ộ wara aza tụra ẹngụ aa nọ ini eehi anị.
25Aza ana aa jị ahẹ vị ene tu ọvịdị,
dị ọnọkangga aa dụ wa ịrẹma nị.
Anyẹnẹẹ ene ee hú ọkangga vị ana rẹ yà ịnị onisohu ẹnẹẹ.
26Ẹ yaa jị ahẹ ka: Waā kụ́ Ohomorihi avọ ịnị akakana ịnọyị,
mị ka waā kụ́ Ẹnẹyịmavara avọ ịzị Anisirẹrị ẹ̀ẹ maanị kụ́ gụ tụ́.
27Ịnị aza ana wara aa vọ, ovwoovu Ịbẹnjamịnị, ana vi ozweyi hu ọ tụ́ ọvịdị nị.
Dị ọdọvịdị anovwoovu Ijuda ọnịrị aza anị và tụra a nị.
Dị ahịka ọdọvịdị anovwoovu Inahwitari ọnịrị Izeburuni ẹ vatụra Anijuda nị.
28Ohomorihi, sị ụkata awụ zụ̀,
mị ka wa navọ wa sị ụkata ọnị ụ vịdị si gụ yị ụvọ ịyẹẹyẹ zụ̀
29Ohinọyị nịnị vaa kụ́ ịsa vaa yị wụ ini eehi awụ Ijerusarẹmị ịzị ụ vavọọ ya mẹ. 30Ohomorihi navọ wa za Anijipiti ana sị mẹẹ anka uye ịnị avị ene hi ịnị ịkẹ avọọ dị wa tụ́ ọ ohuvọ.
Mị ka za anẹkụra ẹnẹẹ ana sị mẹẹ anka ụnọ avọọ rẹ tụ́ wa ohuvọ.
Kara eyi hi wa dị ẹ̀ ká ịrẹsụ hi
di ẹnịnị ẹ̀ kụ́ ẹkẹhị ẹnịnị va wụ.
Aza ana vavọọ sì ka ẹnị ẹ̀ẹ kụ̀ ịrẹkụ avọọ, navọ wa za wa dị wa gara wa ha.
31A vaa tụ́ odeyi hụrẹ Ijipiti vẹ,
Anisudani vaa kụ̀rà ụvọ tụ́ ẹba dị ẹ yaa mẹ̀ aduwaa hi Ohomorihi.
32Ẹwụ nịnị ohinọyị anẹhẹ, waā jị ahẹ kụ́ Ohomorihi nịnị,
mị ka waa jị ahẹ kụ́ Ananyị yị nịnị.
33Jị ahẹ kụ́ Ohomorihi anaā tụra eguhi ana yà ẹbẹẹba hụrẹ ụmọrụmọ.
Heyi, ọ̀ọ kà ịrẹyị, dị ọ sị mẹẹ ka vị apaana ihinẹba aa há nị.
34Waā kà ịrẹkụkụ ụkata oni Ohomorihi nyị.
Avaba Anisirẹrị ệ yẹ ọ mẹmẹ nyị ụbanyị.
Ụkata anị vị ana nya ẹtẹ ini eguhi.
35Avaba aza vi ene ee hí angwa Ohomorihi ọ́ mẹ̀ hụụnị eehi anị aa vẹ.
Ohomorihi Anisirẹrị aa sị ụkataa yị aza anị nị.
Waā kụ́ Ohomorihi avọ nịnị!
Currently Selected:
Ahẹ Ụgama 68: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
