Ahẹ Ụgama 55
55
Aduwa ọza ọnị ọta anị vị ene evene
(Ahẹ Idevidi oni o hú agidibò tụ́. Ahẹ ana a sị sị ịrẹyọyẹ kọ ọza ana yà ịnị ụvọ ọga ọjahẹ).
1Ohomorihi, navọ wa wụ́ ịpọda amị, navọ asị u si eyi jịnẹ ịrẹyị ọnị maa dá ịpẹ anị. 2Navọ kwogwo we tụ́ ohi aduwa ọnị maa mẹ̀ aanị
Ariro ene tù mị aanị, o si chi mi ẹngụ.
3Ọnịvị amị ee woo hi mị, angwa ee hi mị
Aza edivi ana aa chamayịị yị ọza aa va wụ̀ mị
Ẹnịnị ẹ raà kụ́ ọ kata mị ẹngụ
Avọọ ẹ maa nyị ịhyẹrẹ amị, dị ẹ yaa kụ́ ayị amị nị.
4Ayị aa hụrẹ mị ịnẹ, angwa ee hi mị ẹtẹẹtẹrẹ ka aa vaa wụ̀ mị.
5Mị ka angwa ee hi mị ẹtẹẹtẹ, ẹgahị ọ sị ngụ mị ẹngụ.
6Mị ka àa yẹ ma nyị avaka anka arivadi avọọ!
Mị yaanị si hira na dị ma na tụ́ ụhwọ.
7Màa yaanị hira, dị maa na huu, dị mị va yà ịnị ụnọmị.
8Di mi wuse ne sì ịzị a vọrọ ka ma yà ịzị ẹ̀ yị nyị ẹngụkata irenyi-irenyi ẹnẹnị.
9Ẹnẹyịmavara, asị ụ navọ ka aza edivi ẹnẹẹ ẹ̀ kụkụ yẹ ịsị ẹ yaa kà
navọ asị ịrẹyị ẹnịnị kụkụ jịrị ẹngụ
Ebira ụkata-ụkata ọnịrị ịrazị kẹnẹ ẹ kụ́ hi ịnị ẹkụra nị.
10Aza ana aa mẹ̀ ebira odivi vị ana gwẹtẹ ịnị ẹkụra eyinị-eyinị
Ẹnịnị e si chi ẹkụra ẹngụ.
11Aa wụ̀ aza avaba aha, aza aa mẹ ehunaa yị aza, ẹ yaa mẹ azaa rị.
12Àa vị ọnịvị amị aa mẹ mị isiya nị, ọ yị yaanị kata mị ẹngụ
Àa rẹ vị ọnịrẹyị amị ee woo hi mi nị, di mi zwe na tẹ̀ yọ.
13Ama ẹwụ ọta amị, ẹnị ẹmịrị maanị gụrị ẹngụ ọ maanị vaa mẹẹ hi mi nị.
14Wáá yẹ ka ẹmịrị ẹwụ vịdị maanị kà ịrẹyị ohinee vaa bẹ,
di dudu maanị aa nọ ini irehi Ohomorihi naa hẹkẹ?
15Ohomorihi, navọ ahịka isu asigiri ọ wụ ọnịvị amị nị!
Navọ ahịka ireyi-ireyi e ne e nị,
agụvị ka ịsa odivi o hi ịnị ayị ẹnịnị nị.
16Emee nowu na za Ẹnẹyịmavara ana vị Ohomorihi, dị ọ dọ mị tụ́ nị.
17Ẹnẹnẹ, ọọdụ ọnịrị ịrahụ vị oni mee nowu ka Ohomorihi ọ̀ gụ mị ụvọ
Ịzẹyịza, Ohomorihi ộ ba mị owu.
18Aza ana kwẹẹtẹ tù mị ệ rụrụ,
ama Ohomorihi ộ dọ mị tụ́ ịnị ịrẹkụ ene e kú tù mị,
ọ yị va zẹẹ ka à nyị ịsị ẹ mẹ̀ mị.
19Ohomorihi ọ vị ohinọyị pooro zịna-zịna nị
Ọ vaa wụ́ aduwa amị
dị ọ sị ụya rị aza ẹnẹẹ ana ka ẹnị ẹ mā hụụnị ebira odivi, dị è yi mē re hí angwa Ohomorihi.
20Ọza ana vịdị vị ọta amị vị ana kụkụ kwẹẹtẹ tù ọta anị
ọ yị kụkụ jẹẹ pè ịrẹyị ẹnị ẹ vịdị kà tịtẹ.
21Ọ nyẹngụ kà ịrẹyị mẹnẹ-mẹnẹ, ama ịrẹkụ vi oni o tenyi tụ́ ịnị ayị
Mị ka ọ̀ọ kà ịrẹyị, ụ ka ịrẹyị anị vị ẹngwọọrọ, ama ụhwọ vị oni o ne rị ụvọ.
22Ịrẹyị ene èe tù wu, ụ sị chire Ẹnẹyịmavara ụvọ, ka ọ vaa sị ụvọọ za wụ
Ohomorihi ọ yị vaa zẹẹ ka aza ana aa mẹ ịzẹyịza ẹ̀ hyẹdụ.
23Ohomorihi, aza edivi vị ọnị ụ vaa gụụ hyẹdụ
Ọwọza ọnịrị onireche e yi yèe tù achẹva ẹhẹ ẹnịnị di è sú
Ama ẹmị vị ana vaa sị ayịị tụra wụ.
Currently Selected:
Ahẹ Ụgama 55: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
