Ahẹ Ụgama 41
41
Aduwa ọza ẹnẹ ẹngụ aa zị
(Ahẹ Idevidi ana yà ịnị ụvọ ọga ọjahẹ)
1Ẹngụ aza ana ahịka eē ro ịrẹyị onosiye ẹ̀ nyarị ịrẹsụ ọyịza
Ụmẹ ẹnị ẹngụ aza ẹnẹẹ ẹ̀ẹ nyị akanya, Ẹnẹyịmavara vị ana aa dọ waa tụ́.
2Ẹnẹyịmavara vi ene vee sere wa,
ọ yị vaa zẹẹ ka à nyị ịsị ẹ mẹ̀ wa
Ọ rẹ vaa mẹ ka òo zee yị wa ịnị ẹtẹ ẹnị ẹ̀ yà
Ọ yị vaa zẹẹ ka ọnịvị ẹnịnị ò re wa za.
3Ẹngụ àa zị ẹngụ aza ana vavọọ nyị ariro yị onosiye
Ẹnẹyịmavara vị ana vaa sị ẹngụ anịị ta
dị ọ sị ọ kwẹẹtẹ hụụ ịrẹsụ ụkụ anị.
4Mị ka Ẹnẹyịmavara, navọ kwogwo wa vayị amị dị wa mẹ mị ụkụ
mâ yẹ ka ma raà mẹ̀ ịsa odivi ka wụ vẹ.
5Ọnịvị amị nịnị vị ana aa kà ịrẹyị odivi amị
Ẹ ka à kà ka ma hụra sú dị aamị ọ̀ ta hụụnị ẹhẹ.
6Ẹnịnị ana ka vị ẹnị ee vee hee mi nị vị ana aa mẹ apẹ
Ẹ̀ẹ vẹ, di e yee sì ịrẹyị odivi amị ẹnẹ va naa kà a ngụ ẹhẹẹ zị.
7Avaba ẹnị ana aa kụ́ ayị amị vi ene ee weree kà ịrẹyị amịị yị ẹngụ
Ịrẹyị ene divi hu e yee ro o tụra mị nị.
8Ẹ ka ụkụ odivi ọ za mị aanị nị
Ẹ rẹ ka mẹ mā vana kụkụ zụ kwẹẹtẹ hụrẹ ịzị mị yà.
9 #
Imt 26.23; Ịmk 14.18; Irk 22.21; Ịjọ 13.18 Ọta amị ọnị mị nyayịnẹ sị ịnẹ yị, ẹnị ẹnịrịị dudu aa rị ịsa
ọnị gẹdẹ-gẹdẹ ọ kwẹẹtẹ tù mi nị.
10Ẹnẹyịmavara, navọ wa vayị amị
navọ wa sị mị kwẹẹtẹ di me si wa atọ.
11Wàa raà sị mị kwẹẹtẹ, dị ọnịvị ẹ̀ yị rẹ vaa nyị ehuna amị nị,
dị mị yẹ ka wê sì ịrẹyị amị.
12Mâ yẹ ka ụ vaa gụ mị ụvọ agụvị ka mẹ yị mẹ akụvị
Mâ rẹ yẹ ka ụ vaa navọ ka ma yà ịda awụ pooro zịna-zịna.
13 #
Ahẹ 106.48
Ẹnẹyịmavara, ana vị Ohomorihi Anisirẹrị, ẹwụ a vaa kụ́ avọ pooro zịna-zịna nị
Aamị, mị ka aamị.
Currently Selected:
Ahẹ Ụgama 41: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
