Ahẹ Ụgama 38
38
Aduwa ọza ọnị ụya aa rị
(Ahẹ Idevidi ọnị ọ sịị̄ tamayị)
1Ẹnẹyịmavara, navọ wa nyị isuuru, asị ụ sị ụya rị mị
Navọ asị ụ zẹẹ ka ọyịkụ ọ̀ mẹ ka we tụ́ mi ipono.
2Wéē re ka u mè che mị ọpa, ọ na sị hụrẹ hi
Vị ụ nyayịnẹ tana ụvọ za mị ẹtẹẹtẹrẹ nị.
3Ụ mẹ̀ kụ́ ayị hi mi, avaba ẹngụ vị ana kụkụ aa zị mị
Ebira odivi ọnị mị mẹ vị ana mẹ ka avaba ẹngụ amị bemi ọ̀ọ zị mị.
4Ebira odivi amị vị ana ngụ mị tịtẹ anka ẹnya ọrata avọọ, mẹ yị zụ za a.
5Ụra ọnị maa mẹ̀, ọ raà mẹ ka ịtahụ amị ẹ̀ẹ vụ, dị ẹ̀ kụkụ a dà agụ nị.
6Ẹngụ amị ọ sị và hí, mee vee sú
mi kuku ee sụ́ ùnèe zị pooro nị.
7Avaba ẹngụ amị ộ ta jịnẹ ịra yị ọvanggoro
ẹ yị kụkụ vị ẹma nyị ẹngụ amị.
8Ộ ngụ mị ẹngụ ẹtẹẹtẹrẹ, mee vee sú
Ayị amị o si du, mee nowu pooro, ẹngụ aa zị mị.
9Ananyị yị, wâ yẹ avaba ịsị mee sì ộ,
waa wụ́ owu ọnị maa na.
10Ayị amị aa jị pèé-pèé, mẹ yị kụkụ nyị ụkata
mẹ yị hyakụ kuku re ẹtẹ bẹẹ.
11Ọta amị ọnịrị aza ẹnị ẹmịrịị vịdịị zị ògù vi ene kuku ee re mii zwe agụvị ịrẹyị ene tù mị.
Anokokoro amị vị ana kụkụ kana hụrẹ mị ẹngụ huu.
12Aza ene ee sì ka ẹnị ẹ̀ mẹ mị ịsa odivi dị ẹnị ẹ̀ wụ̀ mị vi ene èe bè mi
Ẹnịnị vị ana aa kà ịrẹyị odivi anị pooro kẹnẹ, di e yee cheeche.
13Mị kụkụ yà anka ogutọ ẹnẹ ẹ̀ zụ wụ́ ịrẹyị avọọ nị
dị mị rẹ sị mẹẹ anka ogurenu ẹnẹ ẹ̀ zụ kà ịrẹyị nị
14Mị ka ma sị vara ọza ẹnẹ ẹ̀ yị mā wụ́ ịrẹyị, dị ọ̀ yị rẹ zụ kà ịrẹyị.
15Ẹnẹyịmavara, ẹwụ mị jẹẹ ee zi nọ
Ohomorihi ana nyị mị, mâ yẹ ka u vee tụ́ mi ohi.
16Maa dá ịpẹ ka wa navọ kwogwo asị ụ zẹẹ ka ọnịvị amị è nyị mi unyi ịnị ẹngụkata amị
asị ụ zẹẹ ka è re oze jẹ ka ma sị hyẹdụ.
17Maa vaa hyẹdụ ộ, ẹngụ amị vị ana aa yịị zị mị pooro.
18Mâ dọ irenu ịsa odivi ọnị mị mẹ
ịvị amị ọ raà mẹ ka ayị amị ọ̀ vazi.
19Ọnịvị amị nịnị ệ rụrụ
Ẹnịnị vị ana nyayịnẹ nyị ụkata
Aza ana aa kụ́ ayị amị kẹnẹ-kẹnẹ ẹ sị rụrụ baaba.
20Aza hi ịzọọ ana ahịka màa mẹ wa ọyịza, ịsa odivi e yee sii si mị atọ nị
Màa dụ ka ò zoza yị wa, dị eni ee du mi ịrẹsụ.
21Ẹnẹyịmavara ana vi Ohomorihi amị
navọ asị u hi ayị amị, asị u noze rịrị mị.
22Ananyị yị ana aā dọ mịị ha, navọ we jintu vẹ wa va gụ mị ụvọ.
Currently Selected:
Ahẹ Ụgama 38: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
