Ahẹ Ụgama 30
30
Ohomorihi avọ
(Ahẹ Idevidi ana a jị a mẹ̀ nā irehi Ohomorihi)
1Ẹnẹyịmavara ẹwụ mị vaa sị ụbanyịị yị nị
agụvị ka wa sị mị dọ tụ́
Wẹ rẹ vaa navọ ka ọnịvị amị è huna mị dị ẹ̀ vaa jẹ.
2Ẹnẹyịmavara ana vị Ohomorihi amị
mê nowu va za wụ ka wa ba mi owu
ịzẹyịza di u ba mi owu, dị ụ mẹ mị ụkụ nị.
3Wẹ rẹ vaa zẹẹ ka me sú
ụ ka asị mị sị eteesu vara ịta kú ẹngụ.
4Ẹwụ nịnị aza ana sị ayị yọ, waa jị ahẹ kụ́ ọ
Waa jị ahẹ nịnị, we siī gono ò!
5Ọ mā kụ́ ayị gọdọ ama vị ọọ̄ mẹ ọyịzaa yị ọza pooro ịnị ẹhẹ nị
Ọza ọ zụ jị òrèrè ịrahụ, ama eyi ọ̀ọ naa nị dị ịnẹ anị kuku ee hine.
6Ịjị ẹngụ amị rọ mê ro ka ẹ yị nyị ịsị ẹẹ̄ vẹ.
7Ẹnẹyịmavara, ịjị ọnọọ vị ọnị ụ sị mị jẹẹ nganganga anka ataba ana kara ẹkụra avọọ.
Ama ịjị ụ va và eyi hụrẹ mị ẹngụ angwahi ộ ka mị vẹ.
8Dị mị va ta wụ ubo nọ, Ẹnẹyịmavara
Di mi nowu va za wụ ka wa vayị amị nị.
9Ẹnẹyịmavara, mèe sú ye re ọgụ ọnị waa rị ịnị anị?
Mị ka àa raà sị mi chire ẹtẹ, sị mị kụkụ zụ mẹẹ wụ?
Wáā yẹ ka ọza ene su ọ yị zụ kwẹẹtẹ dị ọ̀ọ kụ́ avọ?
Ẹnịnị ẹ yị zụ aa kà a zụ̀ aza ụ mẹmẹẹ mẹ ịzẹyịza.
10Ẹnẹyịmavara, aarịhịnị navọ wa wụ́ ịpọda amị dị wa vayị amị
navọ wa gụ mị ụvọ.
11Ẹmị vị ana ayị anị vịdị du, wa raà mẹ ka ayị amị ọ kukuu hine, dị maā nyị ẹzẹ
Ụ ka asị mi kuku sụ ùnè, ama maa jẹ,
12dị ma kụkụụ sị avaba ayị amịị jị ahẹ ga wụ pooro-pooro
Ẹnẹyịmavara ana vị Ohomorihi amị, ẹwụ mị vaa kụ́ avọ pooro nị.
Currently Selected:
Ahẹ Ụgama 30: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
