Ahẹ Ụgama 144
144
Ohinọyị ọnya ộ kụ́ Ohomorihi avọ
(Ahẹ Idevidi)
1Ẹnẹyịmavara ene ee sere mị ka asị a nyị ịsị ẹ zụ kanyị mị maa kụ́ wụ avọ.
Ọnị ọ kọ mị, di o re tenyi mi ẹngụ ka ma zụ kụ̀ ịrẹkụ nị.
2Ọnị ọ vị Ohomorihi amị nị.
Ô sì ịrẹyị amị, ịda anị mi zwe na tẹ̀ nị.
Ọnị ọ sị mị tẹ ka asị a nyị ịsị ẹ zụ kanyị mị vụrụ-vụrụ, dị aa dọ mịị tụ́ nị.
Ịda anị mi zwe na tẹ̀ nị. O reè hụ́ anẹkụra ẹtẹ yị mị.
3 #
Ijov 7.17,18; Ahẹ 8.4 Ẹnẹyịmavara, sị ọza vị ana vị da, ọnị waa sị ayịị nọ ịnị ịrẹyị anị?
Mị ka sị aā hị́ ọza ọnị ịrẹyị anị aa jị wụ areyi?
4Ọza vị ana sị mẹẹ anka ahị ana aa tụ́ụ parahu avọọ.
Ẹhẹ ọza maanị aa kiiki aanị.
5Ẹnẹyịmavara, há ihinẹba, di we chi vẹ.
Sị ụvọ kanyị ataba, dị ẹnịnị ẹ̀ẹ dá areyi.
6Tụ́ apaana ihinẹba dị wa sị gara ọnịvị awụ ha.
Ne ọpa awụ hi wa, vi ẹ kụ́ ahụ nya iruvo.
7Navọ we chi vẹ dị wa sị mị hụụnị akanya ana kara mị anka adagu avọọ, dị wa dọ mị tụ́;
navọ wa dọ mị tụ hụụnị ụvọ azọga,
8ana maanị sị avaba ẹngụ vị ireche-ireche aanị.
Ẹnịnị vị ana aā hyakụụ hị́ eku ireche.
9Ohomorihi, mị vaa jị ahẹ ọwọọwa gono wụ, dị mị sị àgidibò di mee hú ọ kụ wụ avọọ.
10Ẹwaa mẹ ka ohinọyị nịnị ẹ̀ huna ọnịvị ẹnịnị nị,
dị ụ dọ Idevidi ozi ahụ awụ tụ́ ka asị a wụ ọ nị.
11Aarịhịnị navọ wa dọ mị tụ hụụnị ụvọ azọga ana hị́ eku ireche aanị.
12Navọ ezi anọrụ ayị màa hụụ vẹ, ẹ̀ nyị ụkata anka ọchị ẹnị ẹngụ anị zoza ẹtẹẹtẹrẹ avọ.
Di ezi anẹẹ ayị è zoza anka ọhẹ ana mẹ dị a sị mẹ irehi ohinọyị ọvị.
13Navọ à nyị ịsọyịrị irenyi-irenyi gwẹtẹ ịnị ụhwọ ayị,
dị atẹmẹ ẹ gwẹẹtẹ hi ẹtẹ kẹnẹ ịnị aarẹ ayị.
14Navọ imaaru ayị ẹ̀ẹ ma ezii hi ẹtẹ kẹnẹ, di asị a nyị ana wọrọ ịrẹẹ.
Asị a rẹ nyị ọnị ozi anị sụ́.
Navọ asị a nyị ọza ẹnị ẹngụ anị kụkụ kata ịnị ẹkụra ayị.
15Ẹngụ aza ọnị wàa maanị mẹ yị vaa dàa jẹ.
Aza ẹnị Ẹnẹyịmavara ọ̀ọ vị Ohomorihi anị ẹ̀ nyarị ịrẹsụ ọyịza.
Currently Selected:
Ahẹ Ụgama 144: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
