Ahẹ Ụgama 109
109
Ọza ọnị ịrẹyị tù
(Ahẹ Idevidi ana ya ịnị ụvọ ọjahẹ)
1Ohomorihi ọnị mịị̄ kụ́ avọ, navọ kwogwo asị ụ jẹẹ re ẹtẹ kẹnẹ.
2Aza edivi nịnị ẹ kụ́ dà pè mị, e yee cheeche kú mị,
3nyị m mẹ̀ mẹ wa, ệ kwẹẹtẹ tù mị kẹnẹ ẹ yaa kà ịrẹyị ana sị zụ̀ ka ệ nyị ịhyẹrẹ amị.
4Mê sì ịrẹyị ẹnịnị dị ẹ yaa kụ́ ayị amị.
Maa mẹ̀ aduwaa yị wa, ama dị ẹ yaa kịị kụ́ mị ịrẹkaa zị.
5Màa mẹ wa ọyịza, dị ẹ sị ịsa odivi si mị atọ.
Mê sì ịrẹyị ẹnịnị, ama dị ẹnị aa nyị ịhyẹrẹ amị nị.
6Navọ wa sị ọza ana vaa kwẹẹtẹ tù ọ, dị ahịka ọnịvị anị ee pè e kụ́ ịrẹka nị.
7Ịhị àa mẹ̀ ọkarẹyị anị, navọ ahịka ọnị a jị ịvị yị nị.
Ọ̀ọ mẹ̀ aduwa, aduwa ọnọọ ọ̀ vara eyi jị ịvị yọ.
8 #
Ụkọ 1.20
Asị ụ zẹẹ ka ò kú orubo, dị ahịka ọza ẹnẹsa ọ dọ ọ udi anị nị.
9Mẹ ka ezi anị ẹ̀ vi ezi-oku, di ose anị ọ̀ vị osoku.
10Navọ ahịka vị ezi anị aa pà ịsaa rị zị, dị a dụ wa hụụnị eburu ẹnịnị.
11Navọ ahịka vị ọnụta va dọ ọ avaba ogu ọnị ọ nyị,
dị azọga ẹva kú avaba ogu ọnị ọ sị ụvọ anị mẹ.
12Asị a nyị ọza ọnị ụ zẹẹ ka ọ̀ vayị anị ọnịrị ezi anị ana sị vara ezi-oku.
13Asị ụ zẹẹ ka à kụkụ tamayị ịrẹha irima anị ini ovwoovu ẹnịnị.
14Ẹnẹyịmavara, navọ asị u hi ayị ịvị ọnị ohiku anị mẹ, wa tịị tamayị ịvị anị ọbanyị.
15Ẹnẹyịmavara, waa tamayị ịvị ẹnị ẹ mẹ, dị wa mẹ ka è hi ayị ẹnịnị ịnị ẹhẹ.
16O mē ro ka â vọrọ ka ọnị ọ̀ mẹ ẹyịza,
à yị vị ka òo re oniruwa ana ayị anị si du dị òo sị ọ ka ọnị ọ̀ wụ ọ.
17Oō si ka ọnị ọ̀ọ tụ́ ozirenu, navọ ozirenu ẹnẹẹ ẹ̀ vara eyi zaa.
18Ozirenu vị ọnị ọ sị mẹ awuru chire.
Ọ sị ngụ ọ avaba ẹngụ anka enyi avọọ.
Ẹchụkụ anị vị ọnị ọ hyakụ ngụ anka angwẹ mẹ̀ẹ ngụ ịsa avọọ.
19Ozirenu vị ana vaa za a ẹngụ ọmaama, dị ọ jị kara a ọtẹ bẹẹ.
20Ẹnẹyịmavara, navọ ahịka avọọ ú mè si ọnịvị amị ana aa kà ịrẹyị odivi amị atọ nị.
21Ama navọ wa hụ agụvị ẹngụ awụ wa mẹ̀ ịsa ene zoza yị ẹmị,
ẹwụ Ẹnẹyịmavara ana vi ohinọyị keekere.
Uū sì ịrẹyị ọza ọnị ụ sịị mẹ̀ ịsa ozozaa yọ, navọ wa hụ agụvị avọọ wa dọ mị tụ́.
22Emi vi onosiye ọnịrị oniruwa, ayị amị vị ana nyayịnẹ du ẹnẹmẹhị.
23Ẹhẹ amị aa vaa ta anka ụmọmọ mẹ̀ẹ ta oruva avọọ.
A sị mị banyị và ha anka ị̀cháchā avọọ.
24Mẹ yị rị ịsa, idinku amị kụkụ aa banyị, mâ ta kwọrọ, mị kụkụ tịtẹ gawụ-gawụ.
25 #
Imt 27.39; Ịmk 15.29 Ọnịvị amị vị ana kụkụ aa mẹ mi isiya, èe re mị di e yee henyi ịrẹsụ ẹnịnị.
26Ẹnẹyịmavara ana vị Ohomorihi amị, navọ wa dọ mị tụ́ anka ú mèe sì ịrẹyị ọza.
27Ẹnẹyịmavara, navọ ọnịvị ẹ̀ yẹ ka ẹwa sị ụkata awụ, vavọọ, mẹẹ nị.
28Òo zee e eyi ẹ̀ẹ tụ́ ozirenu, ẹwụ vị ana vaa mẹ ka ò zee mị.
Navọ ahịka vị aza ana aa dụ mị va hyẹdụ nị, dị emi ozi ahụ awụ ọ̀ va jẹ ịrajẹ.
29Ụhị ọ vaa nyị ọnịvị amị nị
Ụhị vi ene e ve sii kú ẹngụ anka ịta avọọ.
30Mị vaa há irenu amị dị ma kà a ka Ẹnẹyịmavara ộ nyị ụbanyị.
Ịzị aza ẹ̀ẹ wara gu hi vị ọnị mi vaa kụ́ ọ ịzọọ.
31Ọnị ọọ̄ gụ oniruwa ụvọ nị, dị ọ dọ ọ tụ́ hụụnị ụvọ aza ana aa jị ịvịị yọ.
Currently Selected:
Ahẹ Ụgama 109: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
