Ụhịrẹyị 7

Ịrẹyọyẹ vị ana dọ ọza ha hụụnị evene ịrẹkọyịsẹ

1Ozi emi, saasa ịrẹyị ọnị mị ka yị wụ. Asị ụ zẹẹ ka ayị o hi wụ. 2Sị ụvọ za ịrẹyị amị dị ẹhẹ awụ o zoza. Sị eyi pe ịrẹyị amị anka ipapameyi meē sere igoreyi ọza avọọ. 3Waa tamayị ịrẹyị ọnọọ ụmẹ tụra ụmẹ. A sị ụ zẹẹ ka ayị o hi wu. 4Ẹwụrị ịrẹyọyẹ ọ sị ụvọ za ẹngụ anka ẹyịnyara ọnịrị ọtọta ana sị ayị yị ẹngụ avọọ. 5Ịrẹyị ọnọọ o vee sere wụ hụụnị ụvọ ịbẹhị ene e vene ọza.

Ọnyẹnẹẹ ene vene ọnọrụ ọnịrị ọmụha ẹnị ẹ yẹ ịrẹyị

6Â nyị ụmẹ ọnya aanị ọnị Isoromọnị sị re ẹtẹ hụụnị ozokete irehi anị. 7Ô re ọmụha ọnya ịnị akakana ẹnịnị ana vọ ana mẹ ụra. 8Ọmụha ọnọọ vị ana aa parahu akaha irehi ọnyẹnẹẹ ọnya aanị, oze ọnọọ ọ gụrị irehi anị. 9Ụmẹ ọnọọ vị ụmẹ oruva suususu ọnị ẹtẹ sị hozi. 10Dị ọnẹẹ ọnọọ kụ́ ẹnya anka ọsẹrẹka na gẹrị ọ nị. Dị a mẹ̀ ọbọ ọnị aa sị vene ọmụha ọnọọ nị. 11Ịbẹhị anị ọ sị ụhị wara rị. Ọ sị chomina tụ ẹhẹ. Ọ mā za uruvo kwẹẹtẹ ịnị eehi anị. 12Wèe re ịzẹnị, u re e ịzị ọsọọ, avaba aha ọ̀ yaa be ọnọrụ nị. 13Ọmụha anaa ngụ ọ ụvọ, dị ọ za ku ayị. Ụhị ẹ yị nyị ọ dị ọ kà ịrẹyị yọ. 14Ộ ka ajịnị ọnị mẹ̀ ịsa ịsọvọ ẹngwọọrọ ana aa rị. Ọnị o re si ụta ịzẹzẹ anị. 15Ọ kà agụvị ọnọrụ ọnọọ ọnị jịnẹ tụ́ ẹhẹ aanị nị. Ọnị o re hee yọ. 16Ọnị ọ ra tụ ịsa tịtẹ ee zi ọ. Ộ ka ịta ana kụ hụrị Ijipiti vẹ ọnị tụ ku aha ọyị sụ anị nị. 17Eturare vị ọnị ọnị che sẹ aha ọyị sụ ka ọọ da agụ ọyịza-ọyịza zi ẹnị. 18Dị ọ ka ọmụha ọnọọ ọ vẹ dị ẹnị ẹ na hụ ẹnya pooro dị eyi ọ nị. Dị ẹnị ẹ nyayịnẹ mẹrị ẹngụ ẹtẹẹtẹrẹ. 19Dị ọ̀ ka ọva anị ọ̀ hụrẹ eehi na aha onoze. Ọ yi ya ịnị eehi. 20Ọ sị ẹkẹhị banyị rị ụvọ. Ọ vaa mẹ̀ ọsẹ ẹẹva dị ọ vaa varẹma vẹ.

21Avọọ ọ̀ mẹ sị ireche vene ọmụha ọnọọ za nị. 22Obooboro ọmụha ọnọọ vavọọ aa dụ ọ hyọọrọ na anka ụnọ anaa na wụ avọọ nị. Ọ ngụ ọsẹrẹka ọnọọ ụvọ anka ịrẹpa ọ za ùnè avọọ. 23Ọ sị mẹ anka inomi ene hira na ngụ ịrẹpa anaa va zị ọ ịnị ịrẹngwẹ anị nị. Ịjị ịsa sụ ọ kẹnẹ ọ va yẹ ka eyi usu anị ọ sị nị.

Sị oze ọnyẹnẹẹ eneē vene ọza tịtẹ, ẹ yị vị we si usu.

24Ẹwụ nịnị ezi emi, sị ụtọ pe ẹtẹ dị wa wụ́ ịrẹyị ọnị ma vaa ka booro aanị. 25Asị ụ zẹ ka ẹngụ ọnyẹnẹẹ ọnọọ o vene wụ nịnị. Asị ụ dụ ọ zịị. 26Ô re du ẹhẹ anọrụ ọrụrụ-ọrụrụ ha. Dị aza otomiroku su ịrẹsụ anị nị. 27Ọza enee si usu aa nọ ịda anị nị. Oze ana hụra na ngụ eku ọ vị nị.

Currently Selected:

Ụhịrẹyị 7: EBTP

Highlight

Copy

Compare