Ụhịrẹyị 4

Ịrẹyọyẹ ọnị ada a sị pa ozi

1Ẹwụ nịnị ezi, wụ́ ịrẹyị ada awụ nịnị. Sị ụtọ pe ịrẹyị ẹnịnị agụvị wa yẹ ịrẹyị. 2Ajuwe ozoza ma sị wụ aanị nị. Asị ụ ne e ta o. 3Ụmẹ ọnị mị sị vị ozinụvọ, dị mị vị ọnọrụ ikonya tụ ọnyị ọnịrị ada amị ụvọ. 4Ada amị ọ kà a yị mị ka asị mị hi ayị ịrẹyị anị. Ọ kà ma saasa a agụvị ẹhẹ amị o zee yị mị. 5Asị mị hi ayị ịrẹyị anị, dị asị va ịrẹma ka a agụvị ma nyị ịrẹyọyẹ, dị eyi amị o hweyi. 6Ọ kà asị mị ne ịrẹyọyẹ ta agụvị vị o sere mị. Màa sị ụvọ za a ọ̀ vaa dọ mị tụ. 7Aanị ọza mẹẹ nyima ọyị nyị ịrẹyọyẹ nị. Vịdị dụ ịrẹyọyẹ da, dị wa vaa dụ ịsa ana vọ. 8Waa dụ ka wa yẹ ịrẹyị. Ọnị ọ vaa sị wụ tụ ẹba, dị ụ nyị ụbanyị nị. 9Ịrẹyọyẹ vị anaā jị ọza ubobo ohinọyị.

Ịrẹyọyẹ vi ene sere ọza, dị ọ̀ sị ọ ku orubo

10Ozi emi, wụ́ ịrẹyị amị. Wàa dọ ịrẹyị amị tụ ịzọọ, u vee ku orubo nị. 11Ma raa zụ ụ ịrẹyọyẹ ọnịrị a mẹ vọrọ ka wa ra ẹhẹ awụ. 12Wàa zị ụsẹ, ẹ yị nyị ịsị ẹ vaa jẹ oze awụ. Wèe zwe echi, wẹ yị vaa tụ ahụ. 13Sị ụvọ za ịrẹyị ana a ka yị wụ. Ịrẹyọyẹ ọza sị mẹ̀ ẹhẹ nị. 14Asị ụ hama aza anaā mẹ̀ ebira odivi, asị ẹwụrị wa zị ụsẹ vabẹ. 15Asị ụ hama wa, asị ụ saasa wa, sị oze ẹnịnị tịtẹ yị wa. 16Aza ọhịmị ẹ mā zụ sụ ara ẹ vị ẹ mẹ̀ ịsa odivi. Ẹnịnị vị anaā jị areyi agụvị dị ẹ kụ odivi tu ọza. 17Ebira odivi ọ vị ịsọyịrị ẹnịnị, dị ezigi ọyị mẹ̀ sị mẹ anka enyi oyihú yị wa avọọ nị. 18Ọnịrẹyịzẹyịza ọọ̄ ma hụrẹ ayịnẹ. Ẹhẹ anị ọ mā nyị ọjịrẹka. 19Ẹhẹ aza edivi vị ana sị mẹ anka ịrahụ ruma-ruma avọọ. Ẹẹ̄ vangga jịnẹ ịsa ọnị ẹnịnị e yi re nị. 20Ozi emi, wụ́ ịrẹyị ana a ka yị wụ. Sị ụtọ pe ẹtẹ. 21Asị ụ hi ayị ịrẹyị ẹnẹẹ, waa tama ayị anị. 22Ịrẹyị ẹnẹẹ vị ana a mẹ̀ ẹhẹ zee yị aza, dị ẹ nyị ẹngwọọrọ. 23Sị eyi pe ẹtẹ ụ mẹmẹ e ro ịrẹyị. Ọza mee ro ịrẹyị ọọ ra ẹhẹ anị nị. 24Asị ụ cheeche, asị ụ vene ọza. 25Navọ ịsị ụ và tụ ọvịdị kẹnẹ ọ jị wụ areyi. 26#Ihib 12.13Sị eyi pe oze ọnị waa zị, agụvị wa yẹ ịsị waa mẹ. 27Asị ụ há hụrẹ oze nọ eyi ụvọrị a vị eyi ụvọha. Va hụụnị ebira odivi.

Currently Selected:

Ụhịrẹyị 4: EBTP

Highlight

Copy

Compare