Ụhịrẹyị 1

Uruvo ene eē si che ụhịrẹyị

1 # 1 Ohi 4.32 Isoromọnị ozi Idevidi ana vị ohinọyị ẹtẹ Isirẹrị ịnị ụmẹ ọnya aanị ô che ụhịrẹyị ẹnẹnị nị. 2Ụhịrẹyị ẹnẹnị vị anaā sịị ọzaa nyị ịrẹyọyẹ, dị ọ ha ọza eyi tu ịrẹyị, dị ọ rẹ mẹ ka ọza ọ yẹ ajuwe ana vị ọyịza nị. 3Ụhịrẹyị vị anaā sịị ọzaa nyị eyohweyi, dị ọ mẹ ka ọza ọ nyị ịzẹyịza, dị ọ mẹ ịsị ana vọrọ, dị ọ sị ayị ọnya mẹ̀ ịsa. 4Ọnị ọọ̄ si eyi obeduu hweyi nị, dị ọ mẹ̀ ka ezweyi ẹ yẹ ịsa, dị ẹ yẹ ịrẹyị. 5Ọza ana àa yẹ ịrẹyị ọ sị ụtọ pe ụhịrẹyị ẹnẹnị, dị ọ yẹ ịrẹyị hu avọọ. Ọza ọnị eyi anị hweyi vaa nyị eyohweyi hu avọọ, 6ọ̀ọ yẹ ụhịrẹyị, dị ọ yara swẹ ụhị, dị ọ rẹ yẹ aa sị ịrẹyị ana hị́ ọsa nị, ọnịrị dị ọ yẹ a mẹẹ che ebira nị. 7#Ijov 28.28; Ahẹ 111.10; Ụhị 9.10Ịrẹyọyẹ vị ene nyima hụụnị angwa Ẹnẹyịmavara oyi hi. Ọnụra kẹnẹ ọọ̄ sị eyi wụ̀ ịrẹyọyẹ ọnịrị ajuwe ọza nị.

Ajuwe ọza mẹmẹ nyẹngụ nyị ịrẹyọyẹ

8Ozi emi, wụ́ ịrẹyị ada awụ, dị asị ụ si eyi wụ́ ịrẹyị ọnyị awụ. 9Ịrẹyị ẹnịnị vị anaa sị ọza nyị ụbanyị anka ọza ana jị uboobo ohinọyị avọọ. Avọọ ọ̀ mẹ rẹ hụ ọza enyi anka ọmọ anaa sị tụ ọbẹ avọọ nị. 10Ozi emi, aza edivi èe vene wụ, asị ụ dọ beri wa. 11Ẹ̀ẹ kà ẹwaa saasa ẹnị na tẹ̀ zi ọzọnọza, di wee dudu wụ̀ ọ nịnị, 12dị waa jị ọyị yị aza anaa mẹ ẹhẹ ẹnịnị. 13Ẹ̀ẹ sị wa wụ̀, dị ẹ kụ ogu akàaka irenyi-irenyi aza ẹnẹẹ ne hí irehi ẹnịnị. 14Ẹnịnị ẹ̀ẹ hị́ wụ ka waa saasa ẹnị agụvị dị ẹnị ẹ ga ogu ene e yi tu wu, 15ozi emi, asị ụ saasa wa. Si oze ẹnịnị tịtẹ yị wa. 16Ẹngụ vị anaā hụ ọyị mẹ̀ ebira odivi. Eyiha-eyiha ẹẹ̄ sị dọ ọza ụhwẹ nị. 17Ọpa ọnị ọza re o mē che e. 18Ama anako nịnị vi ene vee su usu ụkọrọ ụvọ ẹnịnị. Ebira odivi ẹnịnị vị anaa vụ ụhị tu wa. 19Ẹ maa sị ako jị ọyị yị aza, avọọ ẹnị mẹ rẹ vee re nị. 20#Ụhị 8.1-3Ịrẹyọyẹ vị ana sị mẹ anka ọza ana a jẹẹ ozehinava ọnịrị ịnị orere dị aa nọ ọ ka ọzọza ọ vaa wụ́ ịrẹyị avọọ nị. 21Avọọ ọ ma nọ ịnị ohu ọnịrị ịnị orere ka aza ẹ vaa wụ́ ịrẹyị. 22Ẹwụ nịnị ọnụra tee! ịzị ụ vaa mẹ ụra nee tu nịnị? Ịhị eyi awụ nịnị vee hweyi? Ịzị ụ vaa ka ọsọọsa nee tụ nịnị? 23Sị ụtọ pe ohuvọ ọnị maa tụ wụ nịnị. Maa sị ịrẹyọyẹ pá wụ, dị wa yẹ ịrẹyị. 24Irezi ẹnịnị ẹ mā wụ eesi-eesi. Ẹnịnị ẹ yị ma wụ́ ịrẹyị ọza. 25Ẹnịnị ẹ yị mā dọ ịrẹyị ọza tụ ịzọọ. Ẹ yị mā dọ ka aa tụ ẹnị ohuvọ. 26Mi vee nyị wụ unyi ịrẹyị odivi òo tu wu nị. Dị maa mẹ̀ wụ isiya ụmẹ ọnị wàa hụrẹ ayịnẹ. 27Ayị vaa hụrẹ wụ ịnẹ anka opomi mẹẹ̄ tụ́ avọọ, di ezigi vee tù wụ nịnị anka okoruwa avọọ nị. Dị ahịka ayodu ọnịrị ayịhụrịnẹ o chi wụ ẹngụ nị. 28Ịrẹyọyẹ kà, ẹ́ vaa hị́ ọnị ịnị ụmẹ ọnọọ, dị ọnị e yi tu wa ohi. Ẹ vaa sị avaba ẹngụ-ẹngụ si ọnị, di e yi re ọnị. 29Ka ẹnịnị ẹ raà vịdị nyị ịhyẹrẹ anị, dị ẹ yị rẹ hí angwa Ẹnẹyịmavara nị. 30Wẹ yị dọ ịrẹyị ọza tụ ịzọọ. Àa tụ wụ ohuvọ, wẹ yi mā wụ. 31Ịsa ọnị ụ chire ụ vaa ha nị. Ịrẹyị ẹngụ awụ vee du wụ eyi. 32Ụra ọnụra awụ ọ vaa wụ̀ wụ nị. Eyogu ẹngụ awụ e vú ụ ẹtẹ nị. 33Ama ẹ yị nyị ịsị ẹ vaa mẹ̀ aza ana sị ụtọ pe ịrẹyị ịrẹyọyẹ. Angwa e yi vee hi wa.

Currently Selected:

Ụhịrẹyị 1: EBTP

Highlight

Copy

Compare