Anihwiripi 3

Ijeesu ọ zụ vara ọza ọnịrẹyịzẹyịza nị

1Ẹwụ nịnị ẹyịnyara amị, maa za ịrẹyị amị ịrẹsụ. Waa jẹ nịnị agụvị Ananyị yị. Ẹ yị nyị ọ mẹ̀ ka yị ẹmị, mèe ree tenyi ọ chẹrẹ ịsị mị rẹ vịdị sị chẹrẹ tụ́ hi wu nịnị. 2Sị eyi pe ẹngụ awụ nịnị agụvị aza edivi ana aa mẹ̀ ebira anka irezi avọọ. Ẹ́nịnị maà mẹ̀ ụkọrọ Ohomorihi, ẹ ka ẹ̀ yị vị ọza dà ẹngụ anị, eyi ọ yị yà. 3Ẹyị ọnị Ụhwẹ Ọnịnị sị ụkata yị ka yaa hẹkẹ Ohomorihi, ẹngụ ẹyị ọnọọ ọ vana jị ụvẹvẹnẹ obooro nị. Ịsa oni Ijeesu mẹ ịnị ẹhẹ ayị, ẹyị aa sịị mẹ ụbanyị nị. Ẹyị ẹ yị sị ayị tụra ịsa ana a mẹ tụ́ ịnị ọchẹngụ kẹnẹ. 4Àa ka na kà, ẹmị a vọrọ ka ọ̀ yaanị sị ayị tụra ịsa ọchẹngụ huna aza vọ nị. 5#Iro 11.1; Ụkọ 23.6; 26.5M mẹ̀ vị ẹkụhị ịhịnta kẹnẹ, a jị mị ụvẹvẹnẹ nị. Anisirẹrị obooro mị vị nị. Ini ovwoovu Ịbẹnjamịnị mị chị hụrẹ vẹ nị. Anihiburu mị vị nị, dị ahịka Anihiburu ọ rẹ ma mị nị. Àa va vị ịrẹyị ọda Aniju nịnị ị yọ, ini ogu Anihwarisi nịnị mị yà nị. 6#Ụkọ 8.3; 22.4; 26.9-11Máa kụ́ ẹngụ hi ịrẹyị Anịju nịnị ẹtẹẹtẹrẹ, dị mị hyakụ aa sị ụyaa rị Anịragụ Ohomorihi nị. Àa ka na kà ịrẹyị ọza ọnị ọda kà a ka ọ́ọ vị ọnịrẹyịzẹyịza, mẹ yị nyị ohuvọ da. 7Avaba ịsị mị vịdị ro ka ọgụ ẹ vị mị nị, ịsa kẹnẹ-kẹnẹ mi kuku re wa tụ́ nị, agụvị ịrẹyị Ikirisiti. 8M mẹ̀ hụrẹ va yẹ Ijeesu Ikirisiti ka ọnị ọ nyị mị nị, avaba ịsa ana vọ vị ọnị mị kụkụ za ịrịka tụ́ ịnị ịsa kẹnẹ-kẹnẹ. Ọnọ o huna avaba ịsa ẹnẹẹ nị. Mé yi re wa anka ịhyẹrẹ, agụvị ma kụkụ va rị ọgụ obooro ana vị Ikirisiti. 9Mee sì ka ẹmịrị ọ ọ̀ yị vabẹ. Mé yi kuku si ka aa hị́ mị ọnịrẹyịzẹyịza ini oze ka maa sị ayị tụra ọda. Ama mee sì ka àa hị́ mị ọnịrẹyịzẹyịza ini oze ka maa sị ayị tụra Ikirisiti. Ẹngụ ịzẹyịza ọnọọ, Ohomorihi ọọ̄ sị yị ọza ana sị ayị tụra a nị. 10Avaba ịsị mee sì ọ vị ka ma yẹ Ikirisiti, dị ma rẹ yẹ ụkata ana mẹ ka ọ̀ há hụụnị isu. Mi ree sì ka me beri ọ rị ụya, dị ma rẹ zụ nyị ẹngụ ayị ọnị Ikirisiti nyị o me sú. 11Mị vavọọ ee sì, ịsavọọ ma zụ ha hụụnị isu.

Áa vọrọ ka Anikirisiti ẹ̀ yịị kà a tụ́ ọvịdị

12Mẹ yị kà a ka ịsị maa dụ, ụvọ amị óo kú ọ; mẹ yị rẹ kà a ka ma sị gụ. Ama maa kà a tụ́ ọvịdị ka ụvọ amị ọ̀ nyẹngụ kú ịsa ọnọọ, oni Ijeesu hụ agụvị anị nyị mị. 13Ẹwụ nịnị ẹyịnyara amị, mẹ yị kà a ka ụvọ amị o reè kú ịsa ọnọọ da. Ịsị maa mẹ̀ kẹnẹ ọ vị ka maa sị ayịị hụụnị ịsa ana sị mẹ và tụ ịrẹma; maa vụrịị kà a tụ ọvịdị, máa sị eyi tụ́ ịnị ịsa ana yà ọvịdị amị 14Mị vụrị aa yịị kà a tụ́ ọvịdị ne tù ọzarẹyịrẹsụ, agụvị dị ma zụ dọ ọgụ ọnọọ, oni Ohomorihi hụ agụvị anị hị́ mị ini Ikirisiti; ọnị ọ vị ka ma na ra ẹbẹẹba nị. 15Avaba ẹyị ana sị vịra tụ́ ịnị ịrẹyị Ohomorihi, áa vọrọ ka ẹngụ ariro ọnọọ ọ̀ yà ịnị ayị ayị. Ariro awụ nịnị ọ̀ọ jị ọnọọ nyee ịnị ịsa ẹnyị, Ohomorihi vaa sịị zụ̀ wụ nịnị bẹẹ. 16Ịrẹyị ene hu ọ vị ka, ịzẹyịza ọnị ịsị yẹ, a vẹ yaa yịị kà a tụ́ ọvịdị ịnị anị. 17#1 Ịkọ 4.16; 11.1Ẹwụ nịnị ẹyịnyara amị, wa yịị hama mị nịnị. Sị eyi pe aza ana aa hama yị nịnị, agụvị ka ahụ ayị éyee sii hi ẹtẹ nị. 18Ụpọọpọsa m maanị sịị kà a wụ nịnị nị; m mèe tenyi ọọ kà aanị, m maa jị oreree tụ́ ọ nị, ka aza ẹnyị yà ịzọọ, ana ahịka ẹyaa mẹ̀ ebira anka ọnịvị ọchị apavahị oni Ikirisiti sú ị́rẹsụ anị nị. 19Oyivu ẹtẹ ọ vaa za ịrẹyị ẹnịnị ịrẹsụ nị. Izinẹ ẹnịnị ẹ́ sị mẹ Ohomorihi ẹnịnị nị; ịrẹyị ana a vọrọ ka ụhị ọ̀ sịị nyị wa, dị ẹyaa sịị mẹ ụbanyị. Ịsa ẹhẹ kẹnẹ ẹ sị ayị tụ́ ịnị anị nị. 20Àa vị ẹyị yọ, eehi ayị yà ẹbẹẹba. Yee zí ka Ijeesu Ikirisiti Ananyị yị ọ̀ và hụụ ịzọọ vẹ. 21Ọ vaa sị ụkata anị ọnị ọ sị nyị ehuna avaba ịsa, dị ọ sị vara ọchẹngụ ayị ịnị ẹhẹ ọnọnị, dị ọ kụkụ mẹẹ ka ò véné ọchẹngụ anị ana nyị igirima.

Currently Selected:

Anihwiripi 3: EBTP

Highlight

Copy

Compare